Read Quechua Bolivia DC Bible SALMO 148 Bible Online

SALMO 148 - Quechua Bolivia DC Bible bible

SALMO 148

¹Señorqa yupaychasqa kachun. Señorta cielomantapacha yupaychaychej, Señorta janaj pachapi yupaychaychej.

²Qankuna tukuy angelesnin payta yupaychaychej. Qankuna, janaj pacha tukuy soldados, payta yupaychaychej.

³Intipis, killapis, yupaychaychej. K'anchaj ch'askas yupaychaychej.

⁴Payta yupaychaychej: Qan, jatun cielo kaj, cielo patapi kaj yakuspis.

⁵Señorpa sutinta yupaychaychej. Ujta kamacherqa, tukuy imataj ruwakorqa.

⁶Pay tukuy imasta churarqa wiñaypa wiñaynimpaj. Chaykunapajtaj kay kamachiyta qorqa mana p'akiy atinata.

⁷Jallp'a patamantapacha Señorta yupaychaychej, ukhu mar qochapi tukuy challwakunapis.

⁸Rayo, granizo, rit'i, urphupis, kamachisqasninta junt'aj sinch'i wayrapis.

⁹Lomas, orqos, poqoj sach'as, cedros;

¹⁰tukuy uywas, k'ita animales ima, qhatatakoj animales, tukuy lijrayojkuna ima, Señorta yupaychaychej.

¹¹Yupaychaychej kay pacha reykuna, tukuy ayllus ima, kay pachapi kamachejkuna, kurajkuna ima.

¹²Qharis, warmis, waynakuna, sipaskuna, machu runas ima yupaychaychej.

¹³Tukuy Señorpa sutinta yupaychachunku, paypa sutillan jatun kasqanrayku. Paypa jatun kaynenqa, jallp'a patapi, cielopipis kashan.

¹⁴Pay ayllunman atiyta qon. Tukuy paypi creejkuna yupaychachunku, israelitas munasqa ayllun. Señor yupaychasqa kachun.