Read Quechua Bolivia DC Bible SALMO 22 Bible Online

SALMO 22 - Quechua Bolivia DC Bible bible

SALMO 22

¹Diosníy, Diosníy, imaraykutaj saqerpariwankiri?; imaraykutaj mana salvawankichuri?; imaraykutaj mana waqaspa mañakusqayta uyariwankichuri?

²Diosníy, tuta p'unchay wajyakuyki, qantaj mana uyariwankichu. Mana noqapaj samariy kanchu.

³Qantajrí Santo kanki. Tukuy Israelpa yupaychanan rey.

⁴Tatasniykoqa qampi suyakorqanku, qampi suyakorqanku, qantaj librarqanki.

⁵Yanapanaykita mañakorqanku, qantaj librarqanki. Qampi suyakorqanku, qantaj mana p'enqaypichu rikhurerqanki.

⁶Noqaqa mana runachu kani, manachayqa khuru jinalla. Runaj asikunantaj kani.

⁷Rikuwajkunaqa gestopayawanku, umankutataj khiwinku.

⁸Niwankutaj: Kayqa Señorpi suyarqa, pay librachun. Chhikatapuni munakojqa salvachun ari.

⁹Jinataj ari: Qan mamaypa wijsanmanta nacechiwarqanki. Mamaypa ojllaynimpi ñuñushasqaymantapacha.

¹⁰Manaraj nacekusqaymantapacha noqaqa waqaychayniykipi karqani, mamaypa wijsanmantapacha qanqa Diosniy kanki.

¹¹Ama noqamanta karunchakuychu. Llakiy patapi kashani; nitaj pi yanapawajniy kanchu.

¹²Contrariosniy ashkha phiña toros jina muyuykuwanku, Basán nisqamanta phiña toros jina.

¹³Phiña leones jina qhaparinku, siminkuta kicharinku, phinkimuwankutaj oqoykunawankupaj.

¹⁴Jich'akoj yaku jina kani. Tukuy tullusniy kutasqas kanku. Sonqoytaj mach'a jina kashan, ukhuypi unuyashan.

¹⁵Simeyqa k'analla jina ch'aki pacha kashan, qalluytaj pata simiyman k'askaykun, wañuy ñut'u jallp'aman churaykuwanki.

¹⁶Alqos jina, uj sajra runas tropa muyuykuwanku, chakisniyta makisniytataj jusk'urawanku.

¹⁷Tullusniyta yupakuyta atini, chaykamataj paykunaqa qhawamuspallapuni kanku.

¹⁸Paykunapura p'achayta rak'inakunku, ukhu p'achay patapitaj suerteta choqanku.

¹⁹Qantaj, Señor, kallpay kanki. Ama karunchakuychu, usqhayta jamuy yanapanawaykipaj.

²⁰Espadawan wañuchisqa kanaymanta libraway, ama saqeychu chay alqos wañuchinawankuta.

²¹Chay leompa siminmanta salvaway, Chay torospa wajrasninmanta jark'away.

²²Qanmanta noqa parlasaj wauqesniyman. Tantakojkunawantaj yupaychasqayki.

²³Qankuna, Señorta manchachikojkuna, alabaychej. Jacobpa mirayninmanta kajkunaqa tukuy payta jatunchaychej. Tukuyniykichej Israelmanta kajkunaqa yupaychaychej.

²⁴Payqa wajchakunaj muchuyninta mana qhesachanchu, nitaj qonqarparinchu, manataj paykunamanta pakakunchu.

²⁵Llajtaykej jatun tantakuynimpi yupaychasqayki, qanmanta manchachikojkunaj ñaupaqempi, nisqaytataj junt'asajpuni.

²⁶Wajcha runas mikhonqanku sajsakunankukama, Señorta mask'ajkuna payta yupaychanqanku. Wiñaypajtaj kausaychej.

²⁷Tukuy laya runas, tukuy llajtas, tukuy kay pachamanta runas, Señormanta yuyarikuychej, payman jamuychej, qonqorikuychejtaj ñaupaqempi.

²⁸Señorqa rey kasqanrayku nacionesta kamachin.

²⁹K'umuykuspa yupaychaychej pay sapallanta, tukuy ima patapi kajkuna. Jallp'aman kutiykojkunaqa Señorta yupaychaychej, imaraykuchus qankunallamantaqa mana kausayniyojchu kankichej.

³⁰Mirayniymanta kajkunaqa Señorta yupaychanqanku, paymantataj parlanqanku tukuy kausayninkupi.

³¹Qhepa nacekojkunamampis willanqanku Señorpa cheqan kayninmanta, ruwasqasninmantawan.