Read Quechua Bolivia DC Bible SALMO 25 Bible Online

SALMO 25 - Quechua Bolivia DC Bible bible

SALMO 25

¹Qanman almayta oqharini, Señor Diosníy.

²Qampi atienekuni, Diosníy, ama p'enqaypi rikhurinaypaj, ama noqamanta contrariosniy asikunankupaj.

³Qampi suyajqa mana ujpis p'enqaypi rikhurenqachu. P'enqaypi rikhurichunku contraykipi qhasimanta oqharikojkuna.

⁴Ñankunasniykita rikuchiway, Señor, purinasniykinejta pusaway.

⁵Cheqan kayniykinejta pusaway, yachachiwaytaj. Qan kanki ari salvaj Diosniy. Tukuy p'unchaynintin qampi suyakuni.

⁶Yuyarikuy, Señor, k'acha kayniykimanta, khuyakuyniykimantawan, imaraykuchus wiñaypaj kanku.

⁷Wayna kashaspa juchallikusqasniymanta ama yuyarikuychu, nitaj contraykipi oqharikusqasniymantapis. Señor, uj jatun munakuyniykiman jina, k'acha kayniykiman jinataj noqamanta yuyarikuy.

⁸K'acha sonqo cheqampunitaj Señorqa, chayrayku juchasapaspa kausayninta cheqanchan.

⁹Llimphu sonqoyojkunata cheqan kayman jina pusan. Wajcha runasmantaj ñankunasninta rikuchin.

¹⁰Khuyakuy, cheqantaj junt'a, Señorpa ñankunasnenqa, paywan trato ruwasqankuta kamachisqasnintawan, waqaychanku.

¹¹Jatun sutiykirayku Señor, jatun juchayta pampachapuway.

¹²Diosta manchachikoj runaman, pay yachachenqa ñanta ajllakunanta.

¹³Chay runaqa allin kaypi kusikonqa, wawasninkutaj jallp'ata chayaqenkupaj jap'enqanku.

¹⁴Señorqa payta manchachikojkunawan khuska kausakun, tratontataj rejsichenqa.

¹⁵Noqaqa Señorqa qhawaspallapuni kashani, imaraykuchus pay mana allin kajkunamanta librawan.

¹⁶Qhawariway, Señor, khuyakuwaytaj, imaraykuchus sapallay kashani, llakisqataj.

¹⁷Sonqoyman llakiykuna yapakamuwan, phutiykunas ukhumanta orqhoway.

¹⁸Llakiykunas mayta ruwawasqankumantawan qhawariway, juchasniytataj pampachapuway.

¹⁹Enemigosneyqa ashkhaman tukunku, manchay sinch'itapunitaj chejniwanku.

²⁰Kausayniyta waqaychay. Salwawaytaj ama p'enqachisqa kanaypaj, imaraykuchus qampi atienekuyki.

²¹Allin kajniywan, cheqan kajniywan, waqaychawachunku, imaraykuchus qampi suyani Señor.

²²Señorníy, tukuy llakiykunamanta Israelta libray.