Read Quechua Bolivia DC Bible SALMO 27 Bible Online

SALMO 27 - Quechua Bolivia DC Bible bible

SALMO 27

¹Señorqa k'anchawajniy, salvawajniytaj. Pimantataj manchachikuymanri? Señorqa kausayniyta jark'awan.

²Mayk'ajchus ñak'arichiwajkuna, sajra runas enemigosniy ima, contraypi tantakuspa jamunku chaypacha. Paykunallataj misk'aspa urmanku.

³Uj tropa soldadospis muyuykuwachunku, sonqoyqa mana manchachikonqachu. Contraypipis sayarichunku, noqaqa tiyasqa sonqollapuni kasaj.

⁴Ujllata Señormanta mañakuni, chaytataj mask'asaj; Señorpa wasimpi kakuyta tukuy kausayniypi, may k'acha kasqanta t'ukuspa qhawanaypaj.

⁵Llakiykuna jamojtin, Señorqa pakawanqa. Tiyakunan wasin ukhupi pakawanqa; chhanka patamantaj salvasqata churawanqa.

⁶Ajinamanta umayta oqharisaj, muyuynimpi enemigosninku kashanku chay, enemigosniypa patampi. Ajinata uywa ñak'asqasta Señorman jaywasaj; yupaychaykunasta qhaparispa takisaj.

⁷Qanta qhaparikamuyki, Señor, uyarillaway. Noqamanta khuyakuwan, kutirichiwaytaj.

⁸Sonqoyqa qanmanta niwan: Señorta mask'ayki.

⁹Ama noqamanta pakakuychu. Phiñakuspa ama qhesachawaychu. Qanlla yanapawajniy kanki. Ama sapayta saqerpariwaychu, amataj kachariwaychu, qanmin salvawajniy Diosqa kanki.

¹⁰Tata mamay saqerpariwajtinkupis, Señorqa mana saqerpariwanqachu.

¹¹Señor, ñanniykita rikuchiway. Cheqan ñantataj pusaway, enemigosniyrayku.

¹²Ama paykunaj munayninmanqa saqerpariwaychu, imaraykuchus contraypi sayaykunku, llulla testigoswan, sajra runaswan.

¹³Noqaqa Señorpa k'acha kayninta rikusajpuni kay kausaypi.

¹⁴Señorpi atienekuy, kallpachakuy, ama llauchhuyaychu ari, Señorpipuni atienekuy.