Read Quechua Bolivia DC Bible SALMO 35 Bible Online

SALMO 35 - Quechua Bolivia DC Bible bible

SALMO 35

¹Señor, noqawan churanakojkunaj contranta sayariy; maqay noqata maqawajkunata.

²Maqanakuna p'achasta churakuspa, jark'akunatawan oqharikuspa yanapanawaykipaj jamuy.

³Choqanaykita oqharikuspa qhatiykachawajkunaj ñaupaqenman llojsiy. Niwaytaj qan salvawajniy kasqaykita.

⁴Wañuchiyta munawajkunaqa p'enqachisqas ayqechunku. Sajrata ruwayta munajkunapis p'enqachisqas ayqechunku.

⁵Paykunata Señorpa angelnin wijch'uchun, wayraj apasqan ichhu jina.

⁶Ñanninkutaj laqha, llust'ataj kachun. Señorpa angelnin paykunata mask'aspa qhatiykachachun.

⁷Mana imallamanta tojllata churawarqanku. Mana imallamanta uj jusk'uta allarqanku chaypi urmanaypaj.

⁸Jinallapi llakiy jap'ichun, tojllankupitaj urmachunku. Llakiyman urmachunku.

⁹Chaypacha Señorpi kusikusaj, pay salvawasqanrayku.

¹⁰Tukuy ukhuy nenqa: Pitaj qan jinaqa, Señor? Wajchasta, usojkunata, paykunamanta aswan atiyniyojkunamanta libranki.

¹¹Sajra testigos sayaykunku, mana yachasqaymantataj tapuwanku.

¹²Allin ruwasqaymanta sajra kajwan kutichiwanku, chaytaj noqapajqa llakiy.

¹³Chaywampis paykuna onqosqa kashajtinku, noqa llakiy qhashqa p'achawan p'achallikorqani. Mana mikhuspa llakisqa kasqayta rikucherqani, sonqoy ukhupitaj Señormanta mañakullarqanipuni.

¹⁴Purerqani llakisqa, llauchhullataj, mamaymantapis llakisqa p'achayoj kayman jina; chayri uj kausaqeymanta, kikin wauqeymantapis llakisqa kayman jina.

¹⁵Urmajtiyrí tukuy noqamanta asikunku. Mana rejsisqay waj runas jina, maqawarqankutaj mana samarispa.

¹⁶Ñak'arichiwarqanku noqamanta asikuspa. Ñawisninkuwan leqhowaspa kirusninkuta k'aruchinku.

¹⁷Señor, mayk'ajkamataj kay jinata qhawankiri? Salvaway ari kay kausayniyta, chay qhaparispa purishaj leonesmanta.

¹⁸Graciasta qosqayki llajtaykej tantakuyniy ukhupi. Ashkha runaspa ñaupaqempi yupaychasqayki.

¹⁹Amapuni contraypi kajkunaqa kusikuchunkuchu. Ama ñawisninwanqa chejnikuwajkuna leqhopayawachunkuchu.

²⁰Paykunaqa ana sonqo tiyasqa kayta mask'ankuchu, kay pachapi sonqo tiyasqa kaj runaspaj contrampi sajra imasta wasanchanankupajqa wakichikunku.

²¹Contraypi siminkuta jatunta kicharispa ninku: Qhawaychej ñawisninchej rikun, nispa.

²²Qan rikunki, Señorníy, ama ch'inlla kaychu. Ama noqamanta karunchakuychu, Señor.

²³Sayarikuy, rijch'ariytaj, Señor Diosníy. Justiciata ruwaway, noqamantaj kutikuway.

²⁴Cheqanchaway, Señor Diosníy, cheqan sonqoykiman jina. Amataj noqamanta asikuchunkuchu.

²⁵Ama sonqonkupi nichunkuchu, nitaj suyachunkuchu. Kayta munarqanchej; tukuytaña tukuchinchej.

²⁶P'enqachisqas, musphasqastaj rikhurichunku. Llakiymanta kusikojkunaqa, p'enqaypipuni kachunku, noqamanta aswan jatun kayta munajkunaqa.

²⁷Kusikuchunku, kusiywantaj takichunku. Atipasqayta rikuyta munajkunaqa, Sapa kutitaj nichunku: Señorqa jatunchasqa kachun, kamachimpa allin kaynintataj munachun, nispa.

²⁸Simiywan parlasaj cheqan kayniykimanta, tukuy p'unchay yupaychasqayki.