Read Quechua Bolivia DC Bible SALMO 55 Bible Online

SALMO 55 - Quechua Bolivia DC Bible bible

SALMO 55

¹Diosníy, mañakusqasuyta uyariway. Amapuni mana uyarejqa tukuychu.

²Uyarillaway, kutichillaway. Llakiyniypi wajyakuyki.

³Enemigosniypa parlasqanku, sajra runaspa qhaparisqanku kharkatichiwanku. Anchatapuni llakichiwanku. Chejnikuywan qhatiykachawanku.

⁴Sonqoyqa ukhuypi phawarin, wañuymanta manchachikusqayrayku.

⁵Anchatapuni manchachikuni, kharkatishanitaj.

⁶Kay jinatataj nini: Munayman palomajta jina lijrasniy kapunawanta! Chaypachaqa phawayman, samariytataj atiyman!

⁷Karumantaj phawaspa ripuyman, ch'in pampaspitaj tiyakapuyman.

⁸Usqhayllata pakakoj riyman, sinch'i paramanta muyoj wayramantapis.

⁹Paykunata chinkachiy, Señor, parlayninkuta pejtuy. Maqanakuta, chejninakuyllata paykunapeqa rikuni.

¹⁰Tuta p'unchay llajtata muyuykachanku. Chaypi tiyan sajra kay, wañuchinaku, millay kausay ima.

¹¹Callesnimpis ch'aukiyaywan, ch'atanakuywan ima junt'a.

¹²Mana enemigoychu toreawan; chaytaqa aguantayta atiyman. Nitaj chejnikuwajpis contraypi oqharikunchu, paymantaqa atiyman pakakuyta.

¹³Qan llajta masiy karqanki, aswan sumaj amigoy,

¹⁴piwanchus Diospa wasimpi tantakoj kani k'achata parlarikunaypaj. Runa ukhupitaj paywan puriykachakoj kani.

¹⁵Wañuy ujllata enemigosniyta jap'ichun. Kausashaj jallp'a uraman yaykuchunku, imaraykuchus sajra kaj sonqonkupi kashan.

¹⁶Noqarí Diosta wajyakusaj. Señor salvawanqa.

¹⁷Willakusaj waqasajtaj, sut'iyayta, chaupi p'unchayta, ch'isiyayta ima. Payrí parlasqayta uyarenqa.

¹⁸Maqanakojtiy pay librawanqa. Kausayniyta salvawanqa, ashkhapis contrariosniy kajtinku.

¹⁹Kamachej wiñaypaj Dios, uyariwanqa, paykunatataj k'umuykachachenqa, paykuna juchasninkumanta mana kutirikusqankurayku, nitaj Diosta manchachikusqankurayku.

²⁰Makinkuta amigosninkoj contranta oqharinku. Trato ruwasqankutataj p'akinku.

²¹Parlasqankoqa mantequilla jina llamp'u. Sonqonkupi maqanakuyllata yuyanku. Parlayninkoqa aceitemanta aswan llamp'u. Chaywampis, chay parlasqasninkoqa sumaj khuchoj espada jina.

²²Llakiykunasniykita Señorman saqey. Payqa sinch'ita sayachisonqa. Payqa kasukoj runataqa, mana urmajta saqenmanchu.

²³Chaywampis, qan Diosníy, paykunata jallp'aj sonqonman chinkaykuchinki. Runa wañuchiswan, llullaswanqa, mana khuskan kausayllatapis kausanqankuchu. Noqari qanllapi atienekuyki.