Read Quechua Bolivia DC Bible SALMO 59 Bible Online

SALMO 59 - Quechua Bolivia DC Bible bible

SALMO 59

¹Diosníy, enemigosniymanta libraway. Contraypi oqharikojkunamanta salvaway.

²Sajra runaspa makisninkumanta libraway. Runa wañuchismanta salvaway.

³Atiyniyoj runasqa tantaykukunku, wateqallawankupunitaj wañuchiwayta munaspa.

⁴Señor, mana noqa contraykipi oqharikorqanichu, nitaj juchallikorqanichu. Mana ima sajratapis ruwanichu. Chaywampis maqanawankupaj wakichikunku. Rijch'ariy ari, jamuytaj yanapariwaj, qhawaytaj.

⁵Señor, Tukuy Atiyniyoj Dios, Israelpa Diosnin, rijch'ariy, jamuy, jasut'iy, Diosta mana yuyajkunata. Ama khuyakuychu chay wasanchajkuna sajrasmanta.

⁶Alqos jina ch'isin ayñaspa kutiykamunku, llajtataj muyunku;

⁷siminku phosoqeyarishan, jayata parlaspa ninku: Mana pipis uyariwanchejchu, nispa.

⁸Qantaj, Señor, paykunamantaqa asikunki. Diosta mana yupaychajkunata kusipayanki.

⁹Diosníy, qanllapi waqaychasqa kasaj, qan sinch'i kallpay, pakakunaytaj kanki.

¹⁰Munakuwaj Diosniy taripawaj jamonqa. Enemigoy atipasqa kasqanta rikuchiwanqa.

¹¹Ama wañurachiychu, aylluy ama qonqakunampaj. Atiyniykiwan ch'eqerachiy, k'umuykachachiytaj. Señorqa pakawajninchej.

¹²Tukuy ima nisqankupi juchallikunku. Jatunchakuyninkuwan ch'ipasqas kachunku. Mana cheqanta jurasqasninku ima urmachichun.

¹³Phiñakusqaykiwan paykunata chinkachiy, pampachay. Amaña kausachunkuchu. Yachachunku Dios rey kasqanta, Jacob ayllupi kay pachaj k'uchusninkama.

¹⁴Alqos jinataj ch'isin ayñaspa kutiykamuchunku, llajtatataj muyuchunku.

¹⁵Paykunaqa chinkasqas purichunku, mana sajsakuspataj tutantin aullaspa purichunku.

¹⁶Noqamantaqa, tutamanta takipusqayki, kunka llik'ikuyta qhaparispa, munakuyniykimanta atiyniykimantawan. Qanqa jark'akuwajniy. Qampi pakakuni, llakiyniy p'unchaypitaj pakakunay karqanki.

¹⁷Diosníy, qanman takisqayki. Qan sinch'i sayanay, jark'akunaytaj kanki. Munakuwaj Diosniy kanki.