Read Quechua Bolivia DC Bible SALMO 65 Bible Online

SALMO 65 - Quechua Bolivia DC Bible bible

SALMO 65

¹Siompa Diosnin, Qanqa yupaychanapaj jinapuni kanki. Runasqa junt'ananku tiyan imatachus ruwasaj nisusqankuta.

²Qan uyarinki mañakususqankuta. Tukuy runas qanman jamunku.

³Sajra ruwasqasniyku atipawayku. Contraykipi juchallisqaykuta pampachawayku.

⁴Kusikuyniyojmin ajllakusqaykeqa, wasiykipi tiyakunampaj pusasqayki runaqa. Wasiykipi allin kaywan sajsachisqas kasqayku, santo wasiykipi kajwan.

⁵Salvawajniyku Dios, qan uyariwayku, may sumaj cheqanta ruwaspa. Mundontimpi kaj runasqa qampi suyanku. Karupi kaj mar qochapis qampi suyakun.

⁶Qan orqosta sinch'ita sayachinki, atiyniykiwan, kallpaykiwantaj.

⁷Qan mar qochaj phiñakuyninta thañichinki. Aylluspi ch'ajwaykunatapis ch'inyachinki.

⁸Karupi tiyakojkunapis kharkatinku, sumaj ruwasqasniykita rikuspa. Qanrayku kusikuywan qhaparinku, inti llojsimuynejmanta, inti yaykuykama.

⁹Qanqa jallp'ata watukunki, parachinkitaj. Mayta qhapaj kayniykiwan qhapajyachinki. Qanqa mayuspi yakusniykiwan trigostapis wiñachipunki, munayniykiman jina.

¹⁰Qan surk'asta yakuwan sajsachinki, larq'aspitaj yakuta junt'achinki. Ashkhata parachimuspa jallp'ata jasayachinki, poqoyninmantaj bendicionta churaykunki.

¹¹Qan watantinta bendicionwan junt'achinki, phuyusniykitaj ashkha poqoyta urmachimunku.

¹²Ch'in pampaspi pastoqa q'omerlla, orqostaj may k'achata p'achallikunku.

¹³Pampasman uywas junt'aykunku. Vallestaj trigo chajraswan p'achallikunku. Tukuytaj takinku, kusikuspataj qhaparikunku.