Read Quechua Bolivia DC Bible SALMO 77 Bible Online

SALMO 77 - Quechua Bolivia DC Bible bible

SALMO 77

¹Diosta sinch'ita qhaparikuni pay uyarinawampaj.

²Llakikuyniy p'unchaypi Señorta mask'ani, mana sayk'usqataj makisniyta payman oqharini. Sapa ch'isi paymanta mañakuni, mana sonqochakuyta atinichu.

³Diosmanta yuyarikuspa waqani. Yuyayniyman churakusaj nini, kallpaytaj pisiyan.

⁴Qan Señor, ch'irmiykojllatapis mana saqewankichu. Noqataj titipacha kani, mana parlaytapis atinichu.

⁵Ñaupa p'unchaykunamanta, watasmanta yuyarikuni.

⁶Ch'isisnin takisqaymanta yuyarikuni. Sonqoypitaj unanchakuni, tapukunitaj:

⁷Phiñasqallapunichu Señorqa kanman? Manañachu qhawarimuwasunman?

⁸Munakuynenqa wiñaypajpunichu tukukapun? Ruwasaj niwasqanchejpis wiñaypajpunichu tukukapun?

⁹Diosqa k'acha kayninta qonqapunmanchu? Chhika phiñasqapunichu kanman, manaña khuyakuyniyoj kanampaj?, nispa.

¹⁰Astawan yuyajtiy sonqoy nanan. Patapi kaj Diosqa manaña imaynachus kaj kikinñachu noqanchejwanqa.

¹¹Yuyarikusaj tukuy sumaj ruwasqasninmanta, waj tiempospi Señorpa ruwasqasninmanta.

¹²Tukuy chay ruwasqasniykipi yuyasaj. Chay ruwasqasniykimanta willasaj.

¹³Diosníy, ñanniykeqa llimphupuni. Ima Diostaj qan Diosniyku jina jatunri?

¹⁴Qan ari sumajkunata ruwaj Dios kanki. Atiyniykita runasman rejsichinki.

¹⁵Atiyniykiwan watejmanta jap'ikapunki aylluykitaqa, Jacobpa wawasninta, Josej wawasnintawan.

¹⁶Diosníy, mar qochaqa rikukuspa manchachikusorqa. Ukhu yakusnimpis kharkaterqanku.

¹⁷Phuyustaj ashkha yakusta jich'amorqanku, cielopitaj qhon qhon karqa, lliuj lliujtaj tukuynejpi.

¹⁸Qhon qhonkunasniyki sinch'i sonaj wayrapi uyarikun. Lliuj lliujkunastaj kay pachantinta lliphipirin, jallp'ataj ikhakuywan kharkatin.

¹⁹Mar qochapi ñanta kicharerqanki, ashkha yakustataj pasarqanki, nitaj pipis lastroykita tarerqachu.

²⁰Ovejasta jina llajtaykita pusarqanki, Moisesnejta, Aaronnejtataj.