Read Quechua Bolivia DC Bible SALMO 80 Bible Online

SALMO 80 - Quechua Bolivia DC Bible bible

SALMO 80

¹Israelta michej, uyariy, José aylluta tropaykita jina pusanki, querubinespa patampi tiyakoj k'anchaykamuy.

²Rijch'ariy Efraimpa, Benjamimpa, Manasespa ñaupaqempi ima; jamuspataj atiyniykiwan salvawayku.

³Diosníy, munay ari ñaupaj kasqaykuman kutinaykuta, k'acha ñawiwantaj qhawariwayku, salvasqastaj kasqayku.

⁴Señor, Tukuy Atiyniyoj Dios, mayk'ajkamataj phiñasqa kanki, aylluykej mañakusqanmantari?

⁵Waqayniykuta mikhuchiwayku, jik'un jik'unta waqasqaykutataj ashkhata ujyachiwayku.

⁶Qayllaykupi kajkunaj kusipayananta ruwawayku, enemigosniykutaj noqaykumanta asikunku.

⁷Tukuy Atiyniyoj Diosníy, munay ari ñaupaj kasqaykuman kutirinaykuta. Allin ñawiwan qhawawayku, salvasqataj kasqayku.

⁸Egiptomanta uj uvas sach'ata orqhorqanki. Qanta mana rejsisoj nacionesta wijch'orqanki, chaymantaj plantaykorqanki.

⁹Jallp'ata picharqanki, chay uvas sach'ataj saphichakorqa, tukuy suyuntinmantaj junt'aykorqa.

¹⁰Orqosta llanthuwan qhataykorqa. Aswan jatun cedro sach'astapis atiparqa.

¹¹Mar qochakama ramasnin chayarqa, poqoynintaj Eufrates mayukama.

¹²Imaraykutaj cerconta urmacherqanki, ñan purejkuna poqoyninta p'itinankupajri?

¹³K'ita khuchis, phiña animales oqoykapunku uvas chajraykita.

¹⁴Atiyniyoj Dios, kutirimullay ari, cielomantapacha qhawarimullayña. Sonqoykita nanachikuspa watukapullayña kay uvas chajraykita.

¹⁵Qan kikiyki plantasqaykita, q'erqemojkunata sumajta wiñachisqaykita.

¹⁶Sinch'i phiñakuyniykiwan qan tukuchiy, chay k'utojkunata, ruphachejkunatawan.

¹⁷Yanapaytaj ajllasqayki runata, qampaj ajllakusqayki runaj churinta.

¹⁸Manaña jayk'ajpis qanmanta karunchakusqaykuchu. Kausayta qowayku, qanllatapunitaj wajyakusqayku.

¹⁹Atiyniyoj Señor Diosniyku, imaynachus kasqaykuman kutirichiwayku. Khuyakuyniykiwan qhawamuwayku, salvasqastaj kasqayku.