Read Quechua Bolivia DC Bible SALMO 88 Bible Online

SALMO 88 - Quechua Bolivia DC Bible bible

SALMO 88

¹Salvawajníy, Señor Diosníy, tuta p'unchay ñaupaqeykipi mañakuyki.

²Uyarillaway mañakusqayta, qhaparikusqaytapis uyarillaway.

³Chay jinatapuni mana allin kajkuna chayamuwanku, wañuy patapiña kashani.

⁴Wañusqaswan yupasqaña kani, mana kallpayoj runa jina rikhurini.

⁵Ayaswan khuska wijch'usqa kani. Maqanakupi wañusqa jina p'ampasqa kani. Chaykunamantaqa qan manaña yuyarikunkichu, makiykimanta qhechusqa kasqayrayku.

⁶Uj ukhu t'oqoman wijch'uykuwanki, ukhuspi laqha cheqaman.

⁷Phiñakuyniykita noqapi thasnukunki, ashkha llakiy uraman chinkaykuchiwanki.

⁸Kausaqesniywantaj saqerparichiwanki. Paykunapajqa millachikunanku kani. Wisq'asqa kani, manataj ayqeyta atinichu.

⁹Chhikata waqasqaypi ñawisneyqa chharpuña. Sapa p'unchay qanta wajyakuyki, Señor, makisniyta qanman oqharispa.

¹⁰Wañusqaspajqa t'ukuna imasta ruwayta atiwajchu? Wañusqasqa agradecekunankupaj sayarimunkumanchu?

¹¹Munakuyniykimanta, cheqa kayniykimantawan, sepulturapi wañusqasqa ukhupi parlankumanchu?

¹²Chay laqhapi t'ukuna ruwasqasniyki rejsisqachu kanman? Cheqa kayniykipis qonqasqa jallp'api rejsisqachu kanman?

¹³Noqatajrí Señor qanta qhaparikuyki, tutamantaqa mañakusqayta qanman chayachiyki.

¹⁴Imaraykutaj qhesachawanki, Señor. Imaraykutaj noqamanta pakakunkiri?

¹⁵Wayna kasqaymantapacha llakisqa, wajchataj kani. Manchachiyniykiwan manchasqaña kani.

¹⁶Sinch'i phiñakuyniykeqa patayta wasarin, manchachiyniykitaj ñit'iwan.

¹⁷Tuta p'unchay muyuykuwan, yakupis tukuy imata wasarinman jina.

¹⁸Noqamanta rejsisqasniyta, kausaqesniytawan karunchanki; kunantaj laqhallaña kausaqeyqa.