Read Quechua Bolivia DC Bible SALMO 89 Bible Online

SALMO 89 - Quechua Bolivia DC Bible bible

SALMO 89

¹Sapa kuti Señorpa khuyakuyninmanta takillasajpuni. Runa mitamanta runa mitakama cheqan kasqaykimanta simiywan willasajpuni.

²Qhaparispa willasaj munakuyniykeqa wiñaypaj kasqanta; janaj pachankunapi cheqa kayniykita, sumajta sayachinki.

³Nerqanki: Ajllasqaywan uj tratota ruwarqani. Kamachiy Davidman jurarqani:

⁴Qampa mirayniykita wiñaypaj sayachisaj, tiyanaykitaj wiñaypaj kanqa, nispa.

⁵Señorníy, cielopi tukuy kajkuna, sumaj ruwasqasninkurayku, cheqan kasqaykimantawan jatunchasonqanku, ajllakusqasniykej tantakuynimpi.

⁶Ni ima diospis, ni pipis cielopi kajkunamanta, qan jinata kanchu, Señor.

⁷Qanqa Diosmin kanki, manchachikunataj, cielopi kausajkunawan muyurisqa.

⁸Señor Tukuy Atiyniyoj Dios. Pitaj qan jina atiyniyojri? Cheqa kaywan muyuykusqa kanki. Manataj qan jinaqa pipis kanchu.

⁹Phiña mar qochata qan kamachinki, wayrawan qhollchoqeyajtimpis qan tiyaykuchinki.

¹⁰Mar qochapi jatun sierpeta ñat'orqanki uj ayata jina. Enemigosniykitataj makiykej kallpanwan ch'eqeracherqanki.

¹¹Cielopis jallp'apis qampata kanku. Qan kay pachata ruwarqanki, tukuy ima chaypi kajtapis.

¹²Qan ruwarqanki uray ladota, pata ladotapis. Tabor orqowan, Hermón orqowampis, kusisqas sutiykiman takinku.

¹³Makisniyki sinch'i atiyniyoj, Paña makiykeqa kallpayoj, atipantaj.

¹⁴Tiyanaykeqa justiciawan cheqan kajpi sayachisqa; munakuywan cheqa kaywantaj ñaupaqeykitapuni rinku.

¹⁵Sutiykita yupaychaj aylloqa kusikuyniyojmin. Señor, uyaykej k'anchasqampitaj purinku.

¹⁶Sutiykipitaj tukuy p'unchay kusikonqa, cheqan kasqaykiwantaj kusikun.

¹⁷Cheqamanta qan kanki chay aylloj kallpan, k'acha kaynintaj; qampa munayniykirayku atiyniyku yapakun.

¹⁸Señorqa jark'awajninchej, Israelpi ajllasqa reyninchej.

¹⁹Unayña ajllasqaykiman parlarqanki uj rikuypi jina, qanta qhatisojkunatataj nerqanki: Uj wapu runata aylluymanta ajllakuni, payta pataman oqharerqani, yanaparqanitaj.

²⁰David kamachiyta tarerqani. Payta ajllaspa sumaj aceitewan jawerqani.

²¹Paytaqa yanapasajpuni, atiyniywantaj kallpachasaj.

²²Enemigosnenqa mana yaykuykonqankuchu; sajrakunataj mana payta atipanqankuchu.

²³Manachayqa enemigosninta rikunankuta t'ojsisaj, payta chejnikojkunatapis t'unaykusaj.

²⁴Cheqa kayninwan munakuyninwantaj paywan kanqa. Noqaraykutaj atiynin yapakonqa.

²⁵Mediterraneomantapacha Eufrates mayukama sayachisaj atiyninta.

²⁶Pay niwanqa: Qan tatay kanki; Diosniy kanki, salvawajniy, jark'akuwajniytaj, nispa.

²⁷Noqataj ruwasaj pay kuraj wawa kananta, tukuy reyespa patampa kanqa.

²⁸Paypaj munakuynenqa kallanqapuni. Paywan trato ruwasqaypis kikillampuni kanqa.

²⁹Paypa mirayninmanta kajqa kamachenqapuni janaj pacha kanankama.

³⁰Yachachisqasniytachus paykuna mana junt'ankuman chayqa, kamachisqasniyman jinachus mana kausanqanku chayqa,

³¹kamachisqasniytachus p'akinkuman chayqa, manataj kamachisqasniyta junt'ankumanchu chayqa,

³²sajra kasqankuta mana uyariyta munasqankutawan, jasut'isaj, k'aspiwan jasut'isaj.

³³Chaywampis Davidta munakullasajpuni, paywan trato ruwasqaymantapis yuyarikullasajpuni.

³⁴Trato ruwasqaytaqa manapuni p'akisajchu, palabrayta junt'asajpuni.

³⁵Uj pacha cheqan kayniywan jurarqani, manataj Davidman llullakusajchu.

³⁶Paypa miraynintaj wiñaypaj sayachisqa kanqa, tiyanantaj kallanqapuni inti jina ñaupaqeypi.

³⁷Killa jina wiñaypaj sayanqa, janaj pachapi killaqa allin testigo sayan ajina.

³⁸Chaywampis, qanqa ajllakusqaykita qhesachanki, pisipitaj qhawarqanki, paywantaj phiñakorqanki.

³⁹Kamachiykiwan trato ruwasqaykita p'akinki, pilluntataj pampaman choqanki.

⁴⁰Tukuy perqasninkuta jusk'uranki, llajtasninkutapis raqaykunaman tukuchinki.

⁴¹Tukuy chaynejta purejkuna suwanku, qayllasnimpi kajkunataj asipayanku.

⁴²Qan enemigosninwan atipacherqanki, contrariosnintataj mayta kusicherqanki.

⁴³Espadanta muthuman tukucherqanki, manataj maqanakupi yanaparqankichu.

⁴⁴Atiyninta qhechorqanki, tiyananmanta pampaman wijch'orqanki.

⁴⁵Ashkha watas kausananta qhechorqanki, p'enqaywantaj junt'achinki.

⁴⁶Señorníy, Mayk'ajkamataj pakakunkiri? Mayk'ajkamataj phiñakuyniyki nina jina k'ajanqari?

⁴⁷Señor, yuyariy pisillata kausanay kasqanta. Pisi kausayniyojta runataqa ruwarqanki.

⁴⁸Ni pipis kausallanmanchu mana wañuspaqa, ni pipis ayqenmanchu sepulturamantaqa.

⁴⁹Señor, maypitaj kashan ñaupa munakuyniykiri? Cheqa kayniykirayku Davidman nisqaykiri?

⁵⁰Señor, yuyarikuy kamachisniykita enemigos toreasqankuta, noqataj sonqoypi apani tukuy asipayawasqankuta.

⁵¹Señor, chay jinata enemigosniykeqa qhesachawanku, mayllapipis chay jinata ajllasqaykitapis qhesachanku.

⁵²Wiñaypaj Señorqa yupaychasqa kachun. Ajina kachun.