Read Quechua Bolivia DC Bible PROVERBIOS 18 Bible Online

PROVERBIOS 18 - Quechua Bolivia DC Bible bible

PROVERBIOS 18

¹Imatapis payllapaj munaj runaqa, imatachus mask'asqasnin junt'akunallanta munan; imachus allin kashan chaytaqa pantachillampuni.

²Wampoqa manapuni imatapis yachayta munanchu; manachayqa sonqompi kajta willayllata munan.

³Juchasapa jamojtenqa, qhesachaypis jamullantaj, alqochakuywantaj p'enqay jamun.

⁴Runaj palabrasnenqa ukhu yaku jina, correshaj mayu jinataj yachaypa juturenqa.

⁵Mana allinchu cheqanchajkuna juchasapasman kutikunankoqa, mana juchayojtataj qhasimanta juchachanankupis.

⁶Wampusqa siminejta imamampis chhapukunku, palabrasnenqa jasut'ita mask'akunku.

⁷Wampoj palabrasnenqa pay kikin urmanallampajtaj kashan, palabrasnillantaj ch'ipaykun.

⁸Cuentosninkoqa misk'i mikhuna jina, runaj ukhunmampuni chayan.

⁹Qhellaswan chinkachejkunawanqa, hermanosman tukunku.

¹⁰Señorpa sutenqa uj sumaj torre jina, chayman cheqan runasqa pakakunankupaj qayllanku.

¹¹Qhapaj runaqa yuyakun kapuynin jark'achisqa llajta jina kasqanta, alto perqasniyojpis kanman jina.

¹²Runaykachaypa qhepantapacha mana allinman urmayqa jamun; llamp'u sonqoman tukuypa qhepantataj allin kayman chayana jamun.

¹³Ancha wampu kaymin, p'enqaytaj, manaraj allinta yuyarishaspa kuticheyqa.

¹⁴Uj onqojtaqa wapuchakuynin yanapan; onqosqa kashaspa mana wapuchakojtarí, pitaj yanapanqari?

¹⁵Allin yuyayniyojqa yachayta astawan jap'in, yachayniyojkunaj ningrenqa yachayta mask'an.

¹⁶Runaj qosqanqa tukuy punkusta kicharin, jinamanta kuraj kaj runaman yachachin.

¹⁷Juiciopi ñaupaj kaj palabrasqa allinman rijch'akun; enemigon chayamojtintaj tukuy mana kikintachu nin.

¹⁸Suertella pleitosta tukukuyman apan, suertellaqa nin pichus ganan atiyniyojkunamantaqa.

¹⁹Uj phiñachisqa wauqeqa astawan wisq'aykukun, muyuykuchisqa llajtamanta nisqaqa. Quejanakuykunaqa palacio punku aldabas jina t'aqanachin.

²⁰Imatachus simimpa parlasqanwan runaj wijsanqa junt'anqa; imatachus simin parlan chaywan sajsakonqa.

²¹Wañuywan kausaywanqa simej atiynimpi kashan; pichus chaykunata munakojqa chaywan sajsakonqa.

²²Pichus warmichakojqa allin kayta tarin, Señorpa khuyakuyninta tarin.

²³Wajcha runaqa khuyakuyta mañakuspa parlakun; qhapaj runarí wapu waputa parlan.

²⁴Wakin kausaqesqa mana cheqan kausaqespunichu kanku, wakin kausaqesrí, kikin wauqenmantapis astawanraj munakunku.