Read Quechua Bolivia DC Bible PROVERBIOS 22 Bible Online

PROVERBIOS 22 - Quechua Bolivia DC Bible bible

PROVERBIOS 22

¹Sumaj sutichasqa, may uyarisqa kaywan aswan allinraj kanku, qorimantawan, qolqemantawan nisqaqa.

²Qhapajwan wajcha runawanqa uj rejlla kanku; iskayninku Diospa ruwasqasnin kasqankurayku.

³Yuyayniyojqa imachus sajra kajta rikun, manataj chimpanchu; mana yuyayniyojrí sajraman chimpaykun, chantaqa ñak'arin.

⁴Llamp'u sonqowan Señorta manchachikusqamanta t'inkaqa kanqa: Qhapajyay, allimpi qhawasqa kay, kausaytaj.

⁵Machu machuspa ñannimpeqa khishkas tojllaspiwan kashan, pichus kausayninta waqaychajrí, chaykunamanta ayqenqa.

⁶Wawamanqa allinta allin yachay kajta yachachiy; machuyaynimpipis ni jayk'aj qonqanqachu chay yachasqantaqa.

⁷Wajcha runataqa qhapaj runa kamachin; manukojkuna ukhupitaj, pichus manoj runa, kamachin.

⁸Sajrata tarpojqa sajrallatataj cosechanqa; sajra imasta ruwanampaj atiynintaj chinkachisqa kanqa.

⁹Pichus wajkunata khuyakuywan qhawajqa, bendicisqa kanqa, wajchasman mikhunanmanta qorisqanrayku.

¹⁰Machu machu runa llojsejtenqa phiñakuypis llojsillanqataj. Jinamanta tukukun quejanakus, phiñanakuykuna ima.

¹¹Reyqa astawan munakun llimphu sonqoyojta, astawan kausayta munan pichus k'achata parlajwan.

¹²Señorqa yachayniyojta sumajta qhawan, llullaspa palabrasnintataj Señorqa sut'incharparin.

¹³Qhellaqa achaquesta mask'an mana llank'ananrayku: Jawa callepi león kashan, wañuchiwanmanchari, nispa.

¹⁴Sajra warmej palabrasnenqa ukhu yaku qocha jina. Chayman urmanqa pipajchus Señor phiñasqa kashan chay.

¹⁵Wampu kayqa wawaspa yuyaynimpi kashan; jasut'eqa chaymanta karunchachenqa.

¹⁶Pichus qhapajyananrayku wajchasmanta sojsojqa, chayri qhapajman qojqa wajchayaypi tukukonqa.

¹⁷Sumajta uyariy yachayniyojkunaj parlasqankuta; sonqoykita churay imatachus yachachisusqayman.

¹⁸Sonqoykipi jap'ejtiykeqa may sumaj kasonqa, chaykunatataj niyta atinki ima ratollapis.

¹⁹Señorpipuni atienekunaykipaj, kay imastaqa kunan qanman yachachiyki.

²⁰Kinsa chunka palabrasta qelqamuyki. Chaypeqa kashan yuyaychaykunas, yachaykunawan ima;

²¹qanman yachachisunaypaj cheqa kajta rejsiyta, pichus kachamusoj tapusojtin allinta willanaykipaj.

²²Ama wajchamantaqa qhechuychu wajchu kasqanraykoqa, juezkunaj ñaupaqempipis amaña k'umuykachachiychu.

²³Paymantaqa Señor sayaykonqa, pikunachus chay jinata ruwajkunajta Señorqa kausayninta qhechonqa.

²⁴Sajra runajtaqa ama kausaqen kaychu, phiña runawanqa ama purillaypischu.

²⁵Jinamanta sajra ruwaykunasninta ama yachaqakunaykipaj, kunkaykimantaj waskhata ama añuykukunaykipaj.

²⁶Ama pimantapis cuentallikuychu, waj runaspa manusninmantaqa.

²⁷Sichus mana imaykipis paganaykipaj kanchu chayqa, puñuna camaykinintinta qhechusonqanku.

²⁸Ñaupa mojonesta ama wajman suchuchiychu, tatasniykej churasqasninkuta.

²⁹Pichus imatapis sumajta ruwajqa, reykunaspa kamachimpi kanqa, manataj mana kaj runaspallataqa.