Read Quechua Bolivia DC Bible PROVERBIOS 24 Bible Online

PROVERBIOS 24 - Quechua Bolivia DC Bible bible

PROVERBIOS 24

¹Ama sajra runaj ruwasqasninta munapayaychu, nitaj paykunawan puriyllatapis munaychu.

²Paykunaj sonqonkoqa suwayllapi yuyashan, siminkupis sajrata ruwayllamantapuni parlan.

³Yachaywan wasitaqa sayarichinku, sumajta unanchakuspataj cimiento rumistaqa churaykun.

⁴Yachaywan wasinkoqa junt'a kanqa, munanapaj jina valorniyoj imaswantaj.

⁵Yachayniyoj runaqa astawan valen kallpayojmanta nisqaqa, yachayqa atipan atiytapis.

⁶Ch'ajwaqa ruwakun sumajta wakichikuspa, ashkha sumaj yuyaychajkuna kajtintaj atipanku.

⁷Uj wampoqa mana ima niyta atinchu kurajkunaspa ñaupaqempi, imaraykuchus paymanta yachayqa t'aqasqa kashan.

⁸Pichus yuyan sajrata yuyayllamanta chayqa, sajra yuyayniyoj runapaj qhawasqa kayllata tarikun.

⁹Wampu runaj yuyaynenqa juchalla; chay machu machutaqa manaña rikuyta munankuchu.

¹⁰Sichus qan llank'ana kashajtin qhellayanki chayqa, kallpayki astawan pisiyanqa.

¹¹Wañuyman apasqasta kacharichiy, wañuy patapiña kashajkunatapis libray.

¹²Sichus qan niwaj mana yachasqaykita chayqa, pichus sonqoykita rikojqa yachanqapuni, chay qhawasojniykeqa allinta yachanqa. Chay qhawajqa sapa ujman ruwasqanman jina qoponqa.

¹³Mikhurikuy wawáy, wayronqo misk'ita imaraykuchus chayqa sumaj; malliriytaj ima misk'ichus kasqanta.

¹⁴Ajina qampajqa misk'i jina kanqa, yachaywan, allinta rejsiywanqa. Chay imastachus tarinki chayqa, allin yuyayman chayanki, ajinamanta suyayniykeqa mana jayk'ajpis chinkachisqachu kanqa.

¹⁵Sajra runa ama ima sajratapis ruwaychu, allin runaj contrantaqa, nitaj wasinmanta imastapis suwaychu.

¹⁶Cheqan runaqa qanchis kutita urman, chantaqa uj qanchis kutillatataj sayarikun, sajra runasqa llakiyman urmaykonqanku.

¹⁷Ama kusikuychu, nitaj fiestata ruwaychu, enemigoyki misk'ajtin, nitaj urmaytimpis.

¹⁸Señorqa mana munanchu chay jinata rikuyta, pichus urmajpa patanmanta phiñakuyninta qhechonqa.

¹⁹Ama sajra runasraykoqa phiñakuychu, nitaj ruwasqasninkutapis munapayaychu.

²⁰Sajra runaman manapuni allinchu renqa, sajra runaqa uj k'anchana jina wañuponqa.

²¹Diosta chantá reytapis jatunchay, wawáy; enemigoswanqa ama tantakuychu.

²²Chay runaj tukukuynenqa ujllata chayarparimonqa, mana pipis yachanchu Diosqa, chantá reypis ima jasut'iytachus qonanta.

²³Chaykunapis kanku yachayniyojkunaj nisqasninku: Cheqanchana justiciapi wakillanta allimpaj qhawanaqa mana allinchu.

²⁴Pichus juchayojta llimphuchan orqhojtaqa runas maldicinku, chanta waj nacionespis qhesachanku.

²⁵Pikunachus juchayojta jasut'inku chaykunamanqa allimpuni rin, runasqa chayrayku paykunata alabanku.

²⁶Pichus sumajta kutichejqa, simimpipis ujta much'aykunman jina.

²⁷Jawapi imachus ruwanasniykitaraj allinta ruway, campopi ruwanasniykitapis ruwamuy; chaymantaraj wasiykita ruwakunki.

²⁸Ama qhasimanta runa masiykej contranta sut'inchankichu, amataj simiykiwan ch'akiyaychu.

²⁹Ama niychu: Imaynatachus ruwawarqa kikillantataj ruwasaj; runamanqa ruwasqanman jina kutichisaj, nispaqa.

³⁰Qhella runajpa chajrannejta rerqani, mana yuyayniyoj wampu runaj uvas chajrannejta ima.

³¹Chaykunapitaj rikorqani khiskasta wiñashajta, runa kanchantapis thuñisqata.

³²Chayta rikuspa umayman churakorqani; chayta qhawarispa kayta yachakorqani:

³³Jinata puñuywan k'aywinaykikama, makisniykita ojllaykuspa puñunaykipaj winkunaykikamataj;

³⁴wajchayayqa qanman chayamusonqa, uj puriskiri jina allin armasqa jamusonqa.