Read Quechua Bolivia DC Bible PROVERBIOS 27 Bible Online

PROVERBIOS 27 - Quechua Bolivia DC Bible bible

PROVERBIOS 27

¹Ama q'aya p'unchaymantaqa alabakuychu, imaraykuchus mana yachankichu imachus q'aya kanantaqa.

²Saqey waj runas qanta alabanasunkuta; mana allinchu qan kikiyki alabakunaykeqa.

³Rumiswan t'iyuwan imaqa llasas kanku, wampoj phiñakuyninrí, chaykunamanta aswan llasa.

⁴K'ajaj phiñakoyqa ñak'arichin, phiñakuytaj imatapis thuñin. Chaywampis, pitaj munapayayta atipanqari?

⁵Sut'inta uyampi k'amiy aswan allenqa, ch'inllamanta munakunamanta nisqaqa.

⁶Allinmin sut'imanta nanachej kausaypi atienekunaqa, uj enemigo much'aykukojmanta nisqaqa.

⁷Pichus sajsasqa kajqa misk'itapis qhesachan; yarqhasqa runarí, k'arkutapis misk'ejta mikhuykun.

⁸Uj p'isqoqa thapanmanta karupi purimun; ajinallataj maypichus nacesqanmanta karupi purimoj runaqa.

⁹Runaj sonqontaqa k'achata q'apaj jawinas kusichin; runatapis k'acha kausaqespa yuyaychaynin kusichin.

¹⁰Ama kausaqeykita, nitaj tataykej kausaqentapis saqerpayaychu. Llakiyniykipi, ama wauqeykiman riychu; qayllaykipi tiyakojraj astawan allin, karupi kaj wauqeykimantaqa.

¹¹Yachayniyoj kay, wawáy, kusichiwankitaj; ajinamanta allinta kutichisaj pischus contraypi phiñakojkunaman.

¹²Yuyayniyojqa reparan imachus mana allin kajta, pakakuntaj; mana yuyayniyojrí chimpaykullan, chantá ñak'arintaj.

¹³Pichus mana rejsisqanmanta garante sayajmantaqa, p'achanta qhechuy, uj prendata jina jap'iy.

¹⁴Tutamanta rispa kausaqeta qhaparispa napaykoyqa mana allinchu, paymantaqa alqochakushasunmampis jina kanman.

¹⁵Paray tiempopi, wasi ukhuman para sut'umullampuni; chayman rijch'akun maqanakuta mask'aj warmeqa.

¹⁶Payta jark'anaqa wayratapis jark'ashasunman jina; chayrí aceitetapis makinchejpi jark'ayta munasunman jina.

¹⁷Fierroqa fierrollawantaj ausakun, runapis runallawantaj allinchakun.

¹⁸Pichus higosta wiñachejqa poqoyninta mikhun; pichus patronnimpa imasninta qhawajqa, allimpaj qhawasqa kanqa.

¹⁹Yakupi runaqa uyanta rikukun; ajinata runapis imachus sonqompi kajta rikuchin.

²⁰Wañuyman ukhupachawan runaj munapayayninwanqa, mana jayk'ajpis sajsakunchu,

²¹Qoritawan qolqetawanqa nina ch'uyachan; runatari kausaqempa alabasqan ch'uyachan.

²²Wampu runataqa wampu kayninta mana qonqachisunmanchu, kutanapi kutin kutinta trigota jina kutashaspapis.

²³Ovejasniykita sumajta qhaway; ovejasniykita allintapuni michiy.

²⁴Qhapajyayqa, nitaj pillupis, wiñaypajqa kanqachu.

²⁵Maypachachus pastor q'omeryamojtin, qhorapis p'utumojtin, orqosmanta qhoraspis ruthukojtin;

²⁶chaypacha ovejasniykimanta millmata ruthunki p'achallikunaykipaj; cabrasniykita vendenki jallp'asta rantikunaykipaj.

²⁷Cabrasniykimanta ashkha lecheta ch'awanki, qan kausanaykipaj, jinallataj wasiykipi kajkuna, kamachisniyki ima.