Read Quechua Bolivia DC Bible PROVERBIOS 3 Bible Online

PROVERBIOS 3 - Quechua Bolivia DC Bible bible

PROVERBIOS 3

¹Yachachisusqasniymanta ama qonqapuychu, wawáy; yuyayniykipi waqaychay kamachisqasniyta.

²Unay watasta kausakunki, may sonqo junt'asqataj kanki.

³Munakuymanta, cheqa kajmantawanqa ama jayk'ajpis t'aqakunkichu; qanqa chaykunata apaykachay uj walqapis kanman jinata, sonqoykipitaj sumaj qelqasqa kachun;

⁴chaywan khuyakuyta tarinki, Diospis runaspis allimpaj qhawasonqanku.

⁵Tukuy sonqoykiwan Diosman atienekuy, ama qampa yachasqallaykimanta atienekuychu.

⁶Tukuy ima ruwasqaykipi Señormantaqa yuyarikuy. Paymin pusasonqa cheqan ñantaqa.

⁷Ama may yachayniyoj kasqaykita yuyakuychu. Señorta manchachikuy, sajra kajmantataj t'aqakuy.

⁸Chaymá ukhuykipaj sumaj jampeqa, tukuy tullusniykitapis kallpachanqa.

⁹Tukuy qhapaj kapuyniykiwan Señorta yupaychay, cosechasniyki ñaupajta poqojkunapiwan.

¹⁰Ajinamanta pirwasniykeqa phullch'enqa, jinallataj vino jallch'anasniykipis.

¹¹Señorpa k'amisusqantaqa amapuni qhesachaychu, wawáy. Ama amichikuychu Pay imatachus nisusqanwanqa,

¹²imaraykuchus Señorqa pitachus munakun chayta jasut'in, uj tata wawanta munakuspa jasut'in, ajinata.

¹³Kusikuyniyojmin pichus yachayta tarejqa, pichus yuyayta jap'ejqa,

¹⁴imaraykuchus chaykunaqa aswan allinmin qolqemanta nisqaqa, poqoynimpis aswan allin qorimanta nisqaqa.

¹⁵Yachayqa aswan valorniyoj rumimanta nisqaqa, tukuy imata munasqasniykipis manapuni yachaymanqa ninakunchu.

¹⁶Paña makimpeqa unay watasta kausana kashan, lloq'e makimpitaj qhapajyaywan, allimpaj qhawasqa kaywan kashan.

¹⁷Ñanninta purinaqa may sumajpuni, ñanninta purinaqa sonqo kausaymin.

¹⁸Yachayta jap'eyqa kausaymin, kusikuyniyojmin chayta jap'ejkunaqa.

¹⁹Señorqa mundota ruwarqa sumaj yachaywan, cielotapis sayacherqa sumaj yuyaywan.

²⁰Yachayninwan mar qochasta t'aqarqa, phuyusmantataj chhullata iphuchimun.

²¹Wawáy, leyta yuyaychaytawanqa sumajta waqaychay; kay imasqa ñawisniykimanta ama t'aqakuchunchu.

²²Chaykunaqa qampaj uj sumaj kausayniykipi kanqanku, kunkaykipi uj k'achanchasqa walqa jina.

²³Chaywanqa ñanniykipi sumajta purinki, chakisniykeqa manapuni misk'anqachu.

²⁴Puñukapuspaqa ni imamanta manchachikunkichu, sumaj misk'ejta puñurikunki.

²⁵Ama manchachikunkichu imachus mana yuyasqamanta ujllata mancharichejmanta, ama manchachikunkichu sajra runaspa ñak'ariyninmanta.

²⁶Señorllamin suyayniykeqa kanqa. Paymin waqaychasonqa tojllaman ama urmanaykipaj.

²⁷Pichus imata khuyakunaykita mañakusojtenqa ama qhesachaychu, ruwanaykipaj jina kashajtenqa.

²⁸Ama runa masiykitaqa q'ayalla kutimunki niychu, chay kikimpacha jaywayta atishaspaqa.

²⁹Ama runa masiykej contrantaqa ima sajratapis wakichikuychu, qanman atienekuspa kashajtenqa.

³⁰Ama piwampis qhasimanta quejanakuychu, mana ima sajratapis ruwashasojtenqa.

³¹Sajra runaj munasqasnintaqa ama qampis munallaytajchu, nitaj ni mayqen sajra ñankunasnintapis ajllakuychu.

³²Señorqa chay sajrata ruwajkunata chejnikun, cheqanta ruwajkunawantaj allinta kausakun.

³³Señorpa maldicionnenqa juchasapaj wasimpi kashan, cheqan runaj wasintataj bendicin.

³⁴Cheqamanta Señorqa astawan asiykukun pischus asikojkunamanta, llamp'u sonqoyojkunamantaj k'acha kayninta rikuchin.

³⁵Allimpaj qhawasqa kaymin yachayniyojkunaj t'inkankoqa, wampuspa t'inkankutaj mana allimpaj qhawasqa kay.