Read Quechua Bolivia DC Bible PROVERBIOS 31 Bible Online

PROVERBIOS 31 - Quechua Bolivia DC Bible bible

PROVERBIOS 31

¹Masa sutiyoj llajtaj reynin Lemuelpa palabrasnin kay jina kanku; chaykunata maman yachacherqa:

²Imatawanñataj nisqayki, wijsaymanta llojsej, wawáy? Qanqa Diospa qowasqan waway kanki.

³Ama kallpaykitaqa warmisman qoychu, chay warmisnejtamin reyesqa urmanku.

⁴Chayqa mana allinchu, Lemuelníy. Mana reyespa ujyananchu vinoqa, nitaj machachikoj ujyanaspis kamachejkunaj ujyananchu.

⁵Jinata ujyaspaqa leymanta qonqapunkuman, llamp'u sonqoyojkunaj kajninkutataj mana allinman tukuchinkuman.

⁶Chay ujyana vinota, sinch'ita machachej ujyanastapis, chay mana allin kajkunaman, llakisqa kajkunamanwan qopuy.

⁷Ujyachunku ama yuyarikunankupaj, wajcha kasqankuta, may ñak'ariypitaj kasqankutapis.

⁸Qhapariy, mana qhapariyta atejkunaj cuentanmanta; jark'ay, mana kutichikuyta atinkuchu chaykunata.

⁹Jatunmanta qhapariy, cheqan kajta ruway, wajchasta jark'ay, jinallataj llamp'u sonqoyojkunatapis.

¹⁰Sumaj warmeqa mana tarikullanchu; k'achitu qhoya rumismantapis aswan valorniyojraj.

¹¹Qosanqa tukuy sonqo paypi atienekun, payqa ni jayk'aj imatapis pisichenqachu.

¹²Qosampajqa allin kajtapuni ruwan, manapuni mana allin kajtaqa, sapa p'unchay tukuy kausaynimpi.

¹³Chay warmeqa millmatawan, lino nisqatawan mask'an, k'uchi makisninwantaj chaykunamanta imastapis ruwan.

¹⁴Ranqheroj buquen jina, karumanta mikhunata apamun.

¹⁵Laqha laqhata jatarinña; wawasninman mikhuchin, warmi kamachisninmampis imachus qonan kajta qopun.

¹⁶Uj jallp'ataqa allinta qhawarisparaj rantin, makisninwan ganasqanwantaj chaywan uvasta plantan.

¹⁷Cinturanta sumajta kallpachakunampaj wataykukun; tukuy sonqotaj ruwaj churakun.

¹⁸Allinta qhawan ima qhatunasnimpis allinta rinampaj, tutakamataj ruwan.

¹⁹Kikin makisninwantaj phushkantaj k'antintaj.

²⁰Wajchasman makisninwan jaywarin, jinallataj pisichikojkunamampis.

²¹Rit'imojtimpis familianrayku mana manchachikunchu; tukuyninku purinku, sumaj p'achallisqas kasqankurayku.

²²Paypaj ruwakun sumaj phullusta, p'achasnimpis sumaj kaj lino nisqamanta, pukawan tiñisqataj.

²³Qosampis sumaj rejsisqa llajta punkupi, chay llajtamanta sumachaj runaswan khuskataj tantakuykunaspi tiyarikun.

²⁴Payqa linomanta p'achasta, chumpistawan ruwan, chaykunatataj qhatojkunaman venden.

²⁵Kallpawan allimpaj qhawasqa kaywantaj p'achallisqa, qhepa p'unchaykunaman imapis jamunanmantataj mana manchachikunchu.

²⁶Sumaj yachaywampuni imatapis parlan, munakuywantaj k'achata imatapis yachachin.

²⁷Payqa wasimpi imaynachus kananta allinta qhawan, ni jayk'ajpis mikhuykullanchu mana paypata kajtaqa.

²⁸Wawasnenqa, k'acha mama ninku. Qosantaj kay jina alaban:

²⁹K'acha warmisqa ashkha kanku; qanrí tukuyninkuta atipanki.

³⁰Warmej k'acha rijch'aynenqa ch'aukiyaylla, k'achitas kasqankupis qhasi mana kajlla. Señorta manchachikoj warmipuni, allimpaj qhawasqaqa.

³¹Makisninwan ruwasqasninmanta allimpaj qhawaychej, ruwasqasninraykutaj llajta punkupi alabaychej.