Read Quechua Bolivia DC Bible PROVERBIOS 6 Bible Online

PROVERBIOS 6 - Quechua Bolivia DC Bible bible

PROVERBIOS 6

¹Wawáy, sichus kausaqeykimanta sayanki chayqa, chayri waj runamanta cuentallikunki chayqa,

²qanllataj sipitata churakushanki, kikin palabrasnillaykiwantaj ch'ipasqa qhepakunki.

³Ñapis runaj makimpiña kanki, chaymanta llusp'inaykipajqa, wawáy. Kayta ruway: sonqoykita llamp'uchay, kausaqaykimanta mañay.

⁴Ama ñawisniyki puñuywan k'aywichunchu, ama uj chhikallantapis ch'irmiychu.

⁵Chay wañuchejmantaqa taruka jina ayqekuy; sipitata wakichejpa makinmanta uj p'isqo jina ayqekuy.

⁶Qhella runa, chhakasta qhawariy, qhaway imatachus ruwasqankuta, chantá yachakuytaj.

⁷Chaykunaqa ni pi kamachishajtin, ni pi imatachus ruwanankuta nishajtin.

⁸Mikhunata q'oñi tiempopi tantakunku, cosechapi mikhunata waqaychakunku.

⁹Qhella, mayk'ajkamataj puñullankipuniri? Mayk'ajkamataj winkullankipuniri?

¹⁰Puñuywan k'aywinaykikama, makisniykita purajman simp'aykukuspa puñunaykikama,

¹¹chay wajchayayqa chayamusonqa, chay wajcha kayniykeqa uj puriskiri runa jina maqanakupaj sayaykusonqa.

¹²Millay sajra runa kajqa, llullata parlaspallapuni purin.

¹³Parlaspaqa ñawillanwan ch'irmin, chakinwan señaspa parlan, dedosninwan rikuchispa.

¹⁴Sonqompeqa sajra kaylla junt'a, tukuy tiempopi sajra kayllapipuni yuyan, sajra kayllatapuni tarpun.

¹⁵Chayrayku, ujllata mana yuyaymanta llakiy payman jamonqa, uj ñawi ch'ipejpi mana kutiriyniyojta urmanqa.

¹⁶Sojta imasta Señorqa chejnikun, qanchis imastapis Señorqa millachikun:

¹⁷Leqhoj ñawista, llulla parlaykunata, mana juchayoj runata wañuchiyta,

¹⁸yuyaynimpi sajra imasta wakichejta, sajra imasman usqhayta thaskej chakista,

¹⁹llulla sut'inchajpa llullakusqasninta, hermanos ukhupi maqanachiyta munajta.

²⁰Yuyayniykipipuni jap'iy, wawáy, tatasniykej kamachisqankuta, yachachisqankutapis.

²¹Sonqoykipi jap'ikuy, kunkaykimantaj warkhukuy, wawáy.

²²Puriyniykipi pusasonqa, puñushajtiyki waqaychasonqa, rijch'arejtiykikama qanwan parlanqanku.

²³Cheqamanta kamachiykunaqa lamparamin, yachachiykunaqa k'anchaymin; k'amiykunawan reparachiykunawantaj kausay ñanmin.

²⁴Chaykuna sajra warmimanta jark'asonqa, qhencha warmej misk'i parlayninmantawan.

²⁵Ama k'achita kasqanqa sonqoykita suwasuchunchu, ama qhawaykachasqanwan atipachikuychu.

²⁶Uj qhencha warmeqa uj chhikan t'antawampis ripullan; casada qhencha warmirí, qharej qhepanmanta mana kacharikunchu.

²⁷Pichus ninata pechoman churakojpataqa, p'achasninta ruphampuni.

²⁸Pichus nina patata purin, chakisnin ruphampuni.

²⁹Ajina kanqa kausaqempa warminwan puñuykojpajqa, mana llusp'iyta atenqachu.

³⁰Suwaqa qhesachasqa kanqa, yarqhayninta thasnunanrayku, suwasqanraykupis.

³¹Suwashaspa jap'ichikun chayqa, chay suwasqanmanta qanchis jinatawan kutichipunan tiyan, tukuy kapuynintataj qopunan tiyan.

³²Chaywampis, casada warmiwan qhechachakojqa sinch'i wampupuni, jinata ruwajqa pay kikin chinkayman rishan.

³³Chay runaqa cosechanqa maqachikuyta, qhesachayta, p'enqakuynintaj mana jayk'ajpis chinkanqachu.

³⁴Tumpaj qhareqa nina jina, ima ratochus aynita kutichiyta munan. Chay qhareqa mana perdonanchu.

³⁵Mana munanchu ni imata jap'iyta, mana sonqonta tiyaykuchiyta munanchu mashkha imasta waqeshajtinkupis.