Read Quechua Bolivia DC Bible PROVERBIOS 7 Bible Online

PROVERBIOS 7 - Quechua Bolivia DC Bible bible

PROVERBIOS 7

¹Uyariway palabrasniyta, wawáy; yuyayniykipi kamachiykunasniyta jap'iy.

²Kasuy kamachiykunasniyta, yachachisusqaytawan; ñawi papaykita jina waqaychay, chantaqa kausanki.

³Dedosniykiman wataykuy, sonqoykipi sumajta jap'eqay.

⁴Yachaytaqa panaykita jina qhaway, yuyaytataj warmi aylluykita jina qhaway.

⁵Chaykuna jark'asonqanku qhencha warmimanta, chay sajra warmi misk'achej palabrasninwan sonqota suwajmanta.

⁶Uj kuti noqa wasi ventanaymanta, reja nisqa k'ajllunejmanta qhawasharqani.

⁷Chaynejta risharqanku manaraj yuyayniyojkuna wayna runas. Ujnin kajta rikorqani aswan wampullaraj kajta.

⁸Uj esquinaman chayaspataj, calleta chimparqa chay warmej wasinnejman.

⁹Ñapis inti yaykusharqaña. Chantá laqhayaykamumpachataj.

¹⁰Jinallamanta payta taripaj uj warmi llojsimumpacha, qhencha warmi jina k'achanchasqa, sonqompitaj sajra yuyayniyoj.

¹¹Uj qhalincha k'anchilla warmi, wasimpi mana kakuy atej.

¹²Tukuynejpi wateqaspa purin, callespi, plazaspi, esquinaspi ima, pichá ñaupajta rikhurimojta urmachinampaj.

¹³Chay warmeqa chay majt'illuta ojllaykuspa much'aykun, mana p'enqarikuspataj nin:

¹⁴Noqa uywa ñak'asqata qonayta nerqani, chaytataj kunan p'unchay junt'ani.

¹⁵Chayrayku, qanta taripasoj llojsimorqani, qantaqa rikuytapuni munarqayki, kunantaj taripayki!

¹⁶Puñuna camaytaqa sumajta k'achanchakuni, Egiptopi poqoj linomanta ruwasqa phulluswan qhataykuni.

¹⁷Chaytataj sumaj q'apashaj jawinaswan q'apaychaykuni, mirrawan, áloe nisqawan, canelawan ima.

¹⁸Jamuy, munakuywan machaykusun, munanakuspataj sut'iyamunankama kamusunchej.

¹⁹Qosayqa mana wasiypichu kashan; payqa karuman rin.

²⁰Payqa apakun uj wayaqa qoqawita, chayrayku khuskan killamanta chayamonqa.

²¹Chhikata parlaspa k'acha misk'i palabrasninwan, wayna runataqa umanta muyurpayachin.

²²Ch'inmanta waynaqa qhepanta rillanña, imaynatachus uj toro ñak'anaman yaykun ajinata, uj wampu jasut'ichikunampaj jap'ichikun ajinata.

²³Chaymantaqa sonqonta uj flecha t'ojsin, imaynatachus p'isqo sipitawan jap'ichikun, mana yachaspa chaypi wañunan kasqanta, ajinata.

²⁴Kunanqa, wawasníy, uyariwaychej; allinta uyariwaychej imastachus yuyaychasqasniyta.

²⁵Sonqoykeqa chay warmej ñankunasninmanta t'aqakuchun. Ama chinkaychu paypa qhepanta rispa.

²⁶Chay warmeqa ashkhata nanachisqasta kacharin, jinamanta aswan kallpasniyojkunata ashkhasta wañurachin.

²⁷Chay warmej wasinman reyqa, wañuy ñanta jap'iriyman ninakun.