Read Quechua Bolivia DC Bible PROVERBIOS 8 Bible Online

PROVERBIOS 8 - Quechua Bolivia DC Bible bible

PROVERBIOS 8

¹Yachayqa jatunmanta qhaparin, yuyaytaj uyarichikunankama sayan.

²Payqa loma pataspi sayan, ñan palqaykunapi ima sayamun.

³Punku yaykunaspi, llajta punkuspi ima uyarichikun.

⁴Runas, kay palabrasneyqa qankunaman jamun.

⁵Waynakuna, mana yuyayniyoj wampus, wampus, yachakuychej allin yuyayniyoj kayta.

⁶Uyariwaychej: Jatuchej imasta parlarisaj, nisqaykichej cheqan imasmanta.

⁷Imatachus nisqaykichej, chaytaj cheqanmin; mana munanichu noqaqa llullata parlayta.

⁸Tukuy palabrasneyqa cheqampuni kanku; mana chaypeqa ch'aukiyakuy kanchu.

⁹Pichus yuyayniyoj kajpaj, allintataj umampi jap'eqajpaj, palabrasniy sut'i cheqantaj kanku.

¹⁰Qolqeta, ch'uwa qorita jap'inaykichejmantaqa, jap'iychej ari yachachisqasniyta, allin imasta rejsiytawan.

¹¹Yachayqa may sumaj, valorniyoj rumismanta nisqaqa, ni aswan munana kajpis yachaymanqa ninakunchu.

¹²Noqa yachayqa, sumaj yuyaywan tiyakuni, sumaj yuyaychaykunatapis tarini.

¹³Señorta manchachikoyqa sajra kajta qhesachaymin. Jatunchakuyta, runaykachayta, sajra ñanta, llullastawan, noqaqa chejnini.

¹⁴Noqapi kashan yuyaychaywan, ruwaywanqa. Noqa kani yuyay, kallpataj.

¹⁵Noqanejta reyesqa kamachinku, kurajkunapis kamachiykunasninkuta kacharinku.

¹⁶Noqanejta kurajkunaqa kamachinku, noqanejta tukuy kamachejkuna jallp'api kamachinku.

¹⁷Noqa munakuni pichus munakuwajta. Pischus mask'awajkunaqa tariwanku.

¹⁸Noqawan kashan qhapajyaywan, allin kaywan; jinallataj sumaj qhawasqa kay, unaypaj qhapajyaypis.

¹⁹Noqaj qosqayqa aswan allin ch'uwachasqa qorimanta nisqaqa. Imatachus rikuchisqayqa aswan sumajmin ch'uwa qolqemanta nisqaqa.

²⁰Noqaqa cheqan ñanta purini, justicia ñanta.

²¹Pischus munakuwajkunamanqa chayaqenkuta qopuni, wasinkutapis qolqewan junt'achini.

²²Señorqa ruwasqasninmanta ñaupajta ruwawarqa, manaraj tukuy imatapis ruwashaspa.

²³Qallarikuymantapachapuni ruwawarqa, manaraj kay pachata ruwashaspa.

²⁴Manaraj jatuchej mar qochas kashajtin ruwawarqa; chaypachaqa manaraj mayus, nitaj yaku juturispis karqachu.

²⁵Manaraj orqosta ruwashaspa, Señorneyqa ñapis yumawarqaña.

²⁶Chaypacha manaraj jallp'ata ruwarqachu, nitaj camposnintapis, ni ñut'u jallp'allapis wakisqachu karqa mundo ruwakunampaj.

²⁷Maypachachus payqa cielota mar qochaj patampi sayacherqa, chaypacha noqa chaypi karqani.

²⁸Maypachachus Diosqa cieloman phuyusta churarqa, ukhu mar qochaj juturisninta sumajta sayacherqa.

²⁹Maypachachus mar qochaj yakusninta kamacherqa, maypichus kananmanta ama llojsinankuta, maypachachus jallp'aj cimientosninta churashajtin;

³⁰chaypacha noqa chaypi karqani, paywan khuska sapa p'unchay. Noqaqa payta kusichillarqanipuni. Tukuy rato paypa ñaupaqempi phujllaspa karqani.

³¹Kay mundota ruwasqampi phujllakorqani, runaspa wawasninwan mayta kusikorqani.

³²Kunanqa, wawasníy, uyariwaychej; noqa jina kaychej, chantaqa kusikunkichej.

³³Uyariychej imatachus nisqayta, yachayniyojtaj kaychej; ama yachaytaqa qhesachaychejchu.

³⁴Kusikuyniyojmin pichus uyariwajqa, wasiy punkullapi sapa p'unchay sayaspa, wasi punkusnimpa quejosnimpa qayllampi suyaspa.

³⁵Pichus noqata tariwajqa kausayta tarin; jinamanta Señorpa khuyakuynintapis tarenqa.

³⁶Pichus contraypi juchallikojrí, kausaynillantataj ch'aukiyakun. Pichus noqata chejniwajqa, wañuyta munakun.