Read Quechua Bolivia DC Bible ECLESIASTÉS 1 Bible Online

ECLESIASTÉS 1 - Quechua Bolivia DC Bible bible

ECLESIASTÉS 1

¹Kay palabrasqa willaraj pata, Jerusalempi rey Davidpa wawampata. Chaytaj nin:

²Qhasi mana kajlla, qhasi mana kajlla. Tukuy imapis qhasi mana kajlla.

³Kay pacha runaqa chay jina apura apurata, qhasi mana kajllapaj tukuy imatapis ruwan.

⁴Runaqa mirashantaj, wañushantaj; jallp'ataj kikillampuni sayan.

⁵Inteqa ujnejmanta llojsimun, ujnejmantaj chinkaykun, chaymantaqa usqhayllata kutirimun ujtawan llojsimunampaj.

⁶Wayraqa uranejman rin, patanejmantataj muyuykamun. Ajinata wayraqa muyuykamuspa muyuykamullantaj kutin kutinta.

⁷Tukuy mayus mar qochallamampuni rishanku, mar qochataj yakuswan mana junt'akunchu. Yakusqa maymantachus jamorqanku chayllamantaj kutirinku watejmanta jamunankupaj.

⁸Tukuy parlasqanwan amichikuspa runaqa, manaña imatapis niyta atenqachu. Ñawitaj imatapis rikuyta munashallampuni, ningripis uyariyta munashallampuni.

⁹Imachus ñaupajta kajqa kikillampuni kanqa. Imachus ruwasqa kajqa kikillampuni ruwasqa kanqa. Mana imapis mosojmanta ruwasqaqa kay pachapi kanchu.

¹⁰Imallapis kanchu kayqa mosoj ninapajqa? Chay imasqa unayña, manaraj noqanchej kashajtinchej karqankuñapuni.

¹¹Ñaupakunaqa qonqasqas kanku, kikillantaj qhepaman kajkunapis, mana yuyarisqaschu kanqanku.

¹²Noqa willarajqa qankunaman kay imasmanta parlajqa, Jerusalempi Israelpa reynin karqani.

¹³Noqaqa tukuy sonqoywan, tukuy yachaywantaj mask'aspa yachayta munarqani, kay pachapi kay tukuy imas ruwakusqanmanta. Kay phutiy ruwanata Diosqa runasman qorqa, chayta ruwaspa kausanankupaj.

¹⁴Kay pachapi imaschus ruwakushan chaykunata allinta qhawarqani. Chaywampis chay tukuy imasqa qhasi mana kajlla, wayrata jap'ikuylla.

¹⁵Imachus wist'u kajqa manaña cheqanchakuyta atinchu. Imachus mana tukuynin kajqa manaña yupakuyta atinchu.

¹⁶Noqataj sonqoypi nerqani: Noqaqa may jina kasqayta yuyakuni, Jerusalempi noqamanta ñaupajta tukuy kajkunamanta nisqaqa aswan yachayniyoj kani; Noqaqa sonqoypi aswan yachayniyoj, yuyayniyojtaj kani.

¹⁷Tukuy sonqoywan yachakuni imachus yachay kasqanta. Chaymantaqa yachallanitaj imachus manakajlla kajkunata, qhasi sonseraslla kajkunatawan. Chay imasta yachanaqa wayratapis qhatiykachasunman jinalla.

¹⁸Cheqamanta ashkha imasta yachayqa, uj uma nanay jina. Pichus ima yachayta yapajqa, astawan llakiyta yapan.