Read Quechua Bolivia DC Bible ECLESIASTÉS 11 Bible Online

ECLESIASTÉS 11 - Quechua Bolivia DC Bible bible

ECLESIASTÉS 11

¹T'antaykita yaku pataman qhallaykuy, chay qhepamantaj tarikapullankitaj.

²Qanchisman chayri pusajman p'akiray; imaraykuchus mana yachankichu ima sajrachus chay jallp'a pataman jamunanta.

³Sichus para yaku phuyus rikhurimunku chayqa, paraqa jallp'a pataman urmamonqapuni. Sichus uj sach'a pataman, chayri uraman urman chayqa, urmasqan pachampi qhepakun.

⁴Wayrata qhawajqa, mana tarpunchu, Phuyusta qhawajpis mana cosechanchu.

⁵Ajinata qanqa mana rejsinkichu maynintachus wayra risqanta, nillataj yachankichu uj warmej wijsampi imaynatachus uj wawa wiñasqanta; kikillantataj qanqa mana yachankichu Diospa ruwasqasninmanta; paypuni tukuy imastapis ruwan.

⁶Tutamanta mujuta tarpunki, ch'isiyaykuytapis tarpullankitaj; qantaj mana yachankichu mayqenchus aswan allin kasqanta, tutamanta kajchus, chayri ch'isiyaykuyta kajchus, chayri iskayninchus uj rejlla kasqanta.

⁷Cheqamanta k'anchayqa rikunaqa sumajpuni, intita rikunapis sumajpuni.

⁸Uj runaqa unay watastapis kausachun, may jinatapis kusikuchun, yuyarikunampuni tiyan ashkha laqhayay p'unchaykuna kananmanta. Qhepaman chay tukuy imas jamunan kashan chaykunapis qhasi mana kajlla.

⁹Wayna, mayta kusikuy tiempoykipi; wayna kashaspa imaschus allin kajwan kusikuy. Sonqoykej munasqampi puriy, imastachus rikusqaykipitaj. Chantaqa yachanayki tiyan, chay tukuymanta Dios cuentata mañasunanta.

¹⁰Sonqoykimanta phiñakuyniykita chinkachinayki tiyan, tukuy sajra kajmanta ukhuykita ayqechiy; imaraykuchus wayna kashaspa imastachus ruwanaqa qhasi manakajlla.