Read Quechua Bolivia DC Bible ECLESIASTÉS 2 Bible Online

ECLESIASTÉS 2 - Quechua Bolivia DC Bible bible

ECLESIASTÉS 2

¹Noqaqa sonqoypi nerqani: Kunanqa mayta kusikusaj; kay tukuy allin kajwan kusirikusaj, nispa. Chaypis qhasi mana kajllataj.

²Chaypacha nerqani: Aseyqa sonseralla; aychaj munaynimpis qhasi manakajlla kasqanta.

³Yuyayniypi nerqani: Kay yachaypi kashaspaqa, kay aychayman vinollatapis ujyarichisaj ari, ajinamanta wampu kayniywan yachanaypaj, mayqenchus allin kasqanta kay pachapi runaspaj, chayllapi tukuypis kausashaspa yuyanankupaj.

⁴Jatuchaj imasta sumajta ruwani; wasista ruwarakuni; uvas sach'asta wiñachikuni.

⁵Kanchasta, huertasta ruwakorqani, chaykunamantaj imaymana poqoj sach'asta churarqani.

⁶Yaku qochasta ruwakorqani, chaywan churasqay sach'asta qarpanaypaj.

⁷Qhari kamachista, jinataj warmi kamachistapis ranterqani, wakin kamachisniyrí kikin wasiypi nacerqanku. Tiyapullawarqataj ashkha wakasniy, ovejasniy ima, noqamanta ñaupajta Jerusalempi kajkunajmanta astawan.

⁸Chantaqa tantallarqanitaj ashkha qolqeta, qoritapis. Tiyapullawarqataj reyespa kapuynin, chay llajtaspa kapuynin ima. Tiyapullawarqataj takejkunasniy, qharispis warmispis, tukuy laya kusikuykunas, mana yupay atina warmispis.

⁹Noqaqa tukuymanta patapi kani, Jerusalempi noqamanta aswan ñaupajta kajkunamanta nisqaqa. Chaywampis yachayneyqa manapuni pisiyarqachu.

¹⁰Ñawisniypa tukuy rikusqanta ruwarqani. Imaswanchus sonqoy kusikuyta munan, chaytapis ruwarqani. Tukuy llank'asqaywan mayta kusikorqani. Kay kusikuyneyqa chay ruwasqasniymanta t'inkaymin.

¹¹Chaymantaqa, tukuy imata makiyniywan ruwasqasniyta qhawarini, imaynamantachus chaykunata ruwasqasniytawan. Chaytaj karqa noqapajqa qhasi mana kajlla, wayra jap'ikuy jinalla, kay pachapi mana imapaj allinniyoj.

¹²Chaymantaqa, ujtawan unancharqani yachaymanta, sonseralla kaymanta, wampu kaymantawan. Pipis imatañataj ruwanman uj reypa cuentanmanta yaykuspa, tukuy imapis ruwasqaña kajtinri?

¹³Noqataj rikuni wampu kayta yachay atipasqanta, imaynatachus k'anchayqa laqhata chinkachin, ajinata.

¹⁴Yachayniyoj runaqa umampi ñawisniyoj, wampu runarí laqhayajpi purin. Chanta repararqani, chay tukuy imasqa tukuypaj uj rejlla kanqa.

¹⁵Chaymanta sonqoypi nerqani: Imachus wampu runapajqa kanqa, jinallataj noqapajpis. Jina kajtenqa ima allintaj yachayniyoj kasqayri? Chaypis qhasi manakajllataj.

¹⁶Ni yachayniyojmanta, nitaj wampumantapis wiñaypaj yuyarikunaqa kanchu. Qhepa p'unchaykunamanqa tukuy imas qonqasqa kanqa, ajinallatataj yachayniyojpis wampu runapis wañuraponqanku.

¹⁷Chayrayku, kay pachapi kausayniywanqa mayta amichikorqani; tukuy ruwasqasniypis qhasi mana kajlla, wayra jap'ikuy jinalla.

¹⁸Jinallataj kay pachapi may sayk'uywan tukuy ima ruwasqasniywan mayta amichikorqani. Chaykunata saqenay tiyan pi runaschus noqamanta qhepaman kanqanku chaykunaman.

¹⁹Pitaj yachanman, yachayniyojchus, chayri wampuchus kanantari, may sayk'uywan tukuy ima ruwasqasniytapis jap'ikapunantari? Chay tukuyta kay pachapi may yachayniywan ruwarqani. Chaykunapis qhasi mana kajllataj.

²⁰Chay tukuy imasta kay pachapi may sayk'uywan, yachayniywantaj ruwasqasniymanta sonqoyqa q'asallapuni.

²¹Runaqa chay jina yachaywan, sumajta rejsispa, sumaj yuyaywantaj ruwasqantaj pichus mana imatapis ruwajman saqenanqa manapuni allinchu. Chaypis qhasi manakajllataj, jatun pantaytaj.

²²Chayrayku runaqa, imatataj tarin chay jinatapuni kay pachapi llank'asqanmanta, phutikusqanmantatajri.

²³Tukuy kausaynimpi llakiyllapuni, ima ruwasqasnimpis phutiylla, tukuy tutantin yuyaynenqa chayllapipuniy uyashan. Chaypis khasi manakajllataj.

²⁴Runapajqa chay tukuy imasmanta astawanqa allimpuni mikhunan, ujyanan, tukuy ruwasqanwan kusikunan. Chay tukuyta noqaqa yachallanitaj Diosmanta jamusqanta.

²⁵Mana pay jina ruwajtenqa pitaj mikhunman, pitaj kusikunmanri?

²⁶Diosqa pichus payta kusichejman yachayta qon. Jinallataj rejsiyta, kusikuytawan. Juchasapamanri Diosqa saqellan tukuy imasta tantajta, qhapajyajtapis, pichus Diosta kusichejman qonampaj. Chaypis qhasi mana kajlla, wayra jap'ikuy jinallataj.