Read Quechua Bolivia DC Bible ECLESIASTÉS 3 Bible Online

ECLESIASTÉS 3 - Quechua Bolivia DC Bible bible

ECLESIASTÉS 3

¹Kay pachapeqa tukuy imapis tiempoyojlla. Kay jallp'a patapi tukuy ima ruwaypis horayojlla:

²Uj tiempoqa nacenapaj, uj tiempotaj wañunapaj. Uj tiempoqa tarpunapaj, uj tiempotaj tarpusqata oqharinapaj.

³Uj tiempoqa wañuchinapaj, uj tiempotaj jampinapaj. Uj tiempoqa thuñinapaj, uj tiempotaj wasichanapaj.

⁴Uj tiempoqa waqanapaj, uj tiempotaj asinapaj. Uj tiempoqa llakikunapaj, uj tiempotaj tusunapaj.

⁵Uj tiempoqa rumista choqanapaj, uj tiempotaj rumista tantanapaj. Uj tiempoqa ojllanapaj, uj tiempotaj t'aqanakunapaj.

⁶Uj tiempoqa mask'anapaj, uj tiempotaj chinkachinapaj. Uj tiempoqa waqaychanapaj, uj tiempotaj wijch'unapaj.

⁷Uj tiempoqa llik'inapaj, uj tiempotaj siranapaj. Uj tiempoqa ch'inyanapaj, uj tiempotaj parlanapaj.

⁸Uj tiempoqa munakunapaj, uj tiempotaj chejninapaj. Uj tiempoqa maqanakunapaj, uj tiempotaj allimpi kausanapaj.

⁹Runaqa ima allintataj orqhon chay jinatapuni imastapis ruwaspari?

¹⁰Noqaqa yachani, chay ruwanasta Diospuni runasman qosqanta, chay imasta ruwanankupaj.

¹¹Diosqa tukuy imata tiempompi k'achituta ruwarqa. Payllataj runaj sonqonman wiñay kasqanta churarqa, qallariymantapacha Diospa ruwasqasninta allinta yachanampaj; chaywampis runaqa manapuni yachayta atinchu imaynamantachus kashasqankuta.

¹²Noqaj unanchasqayman jina, runapaj aswan allin kanman kusikunan, kausaynimpitaj aswan allin imasta ruwanan.

¹³Ajinallatataj Diosqa tukuy runasman qon mikhunankuta, ujyanankuta, tukuy ima allin ruwasqankupitaj kusikunankuta.

¹⁴Chanta yachallanitaj, Diospa tukuy ima ruwasqasnenqa wiñaypajpuni kasqanta. Chay ruwasqasninmanqa mana yapanqachu, nitaj pisiyachenqachu. Chay imasta Diosqa ruwan runas paypa ñaupaqempi manchachikuywan kanankupaj.

¹⁵Mana imapis kanchu kay ruwasqasmanta ñaupajtaña kajqa. Nitaj kanqañachu imaschus karqañapuni chaymanta. Imaschus kashan chaypis karqapuni. Imaschus ñaupajta karqa chayta Diosqa rikhurichin.

¹⁶Kay pachapi rikuni, cheqan imasta ruwaykunamantaqa millay ruwaykunalla tiyasqanta. Imapis cheqan kananmantaqa sajra kajlla tiyan.

¹⁷Chaypacha sonqoypi nerqani: Cheqan runatawan, juchasapa runatawanqa Dioslla cheqanchanqa; imaraykuchus chaypeqa tukuy ima munanapis tiempoyojlla, jinallataj ruwanapis.

¹⁸Sonqoypi nerqani: Runaj kausayninmanta Diosqa runasta purisqankuwan probashan, ajinamanta reparakunankupaj paykunaqa uywas jinalla kasqankuta.

¹⁹Runaswan uywaswanqa uj rejllapuni rinku: Uywas wañunku, runaspis wañullankutaj, jinallataj samayninkupis iskayninkojta uj rejlla. Runasqa mana uywasmanta astawanchu. Chay tukuy imasqa qhasi manakajlla.

²⁰Tukuyninku kikillanmantaj rinku: jallp'amanta ruwasqa kasqankurayku, jallp'allamantaj tukonqanku.

²¹Pitaj yachanman runaspa almanqa janaj pachaman wicharisqanta, uywaspatataj ukhu pachaman yaykusqantari?

²²Chaynejta noqaqa yachani, runapajqa aswan allin llank'asqampi kusikunan, imaraykuchus paypataqa chaypuni ruwaynin. Mana pipis paymanqa rikuchinmanchu wañojtin imaschus kanantaqa.