Read Quechua Bolivia DC Bible ECLESIASTÉS 5 Bible Online

ECLESIASTÉS 5 - Quechua Bolivia DC Bible bible

ECLESIASTÉS 5

¹Diospa wasinman rispaqa as allinta puriy; astawan qayllakuy sumajta uyarinaykipaj, wampu runas jina uywa ñak'asqata jaywanaykimanta nisqaqa. Chaykunaqa mana yachankuchu mana allin kajta ruwashasqankuta.

²Ama simiykeqa imatapis parlallachunchu, nitaj sonqoykipis Diospa ñaupaqempi imatapis ruwasaj nichunchu. Diosqa janaj pachapi kashan, qantaj kay jallp'a patallapi kashanki. Chayrayku imatapis pisillata parlay.

³Anchata imaspipis yuyajtin mosqoy jamun, jinallataj ashkhata parlaypi pantayqa tiyan.

⁴Imatachus Diosman nisqaykitaqa junt'aypuni, imaraykuchus wampusqa mana payta kusichinkuchu. Junt'aypuni imatachus nisqaykitaqa.

⁵Chaynejta, mana junt'anapajqa mana imatapis ruwasaj ninachu.

⁶Ama saqeychu simiyki juchallichisunanta, ama imatapis Diospa kachamusqan angelpa ñaupaqempi pantani niychu. Imajtintaj qanqa Diosta chay parlasqaykiwanqa phiñachiwajri, ruwasqasniykitataj Dioswan chinkachichiwajri?

⁷Maypichus chay jina mosqoykuna tiyan chaypeqa, qhasi mana kaj imaspis tiyallantaj, jinallataj ashkha palabraspis tiyallantaj, chaynejta qanqa Diosta manchachikuypuni.

⁸Sichus may naciompi wajchasta ñak'arichejta rikunki, cheqan kajtapis mana kajman tukuchejta, jinallataj cheqanchaypis mana kajtenqa, ama chaykunamanta mancharikunkichu. Paytaqa uj kuraj kaj qhawamushan, paytataj uj aswan kuraj kajñataj qhawamushan, paytapis aswan kuraj kaj patamanta qhawamushallantaj.

⁹Chaywampis, jallp'aqa tukuypaj allin, reypis jallp'allamantataj kausan.

¹⁰Pichus qolqeta munakojqa astawan munallampuni. Pichus kapuykunata munakojqa ni ima allinkunata orqhonchu. Chaypis qhasi mana kajllataj.

¹¹Astawan qhapajyajtenqa, aswan mikhojkuna tiyan. Ima allintaj dueñopaj kanqa, chay tukuy kapuynin qhawarinallampaj kajtinri?

¹²Llank'aj runaqa, pisitapis ashkhatapis mikhuspa, sumaj misk'ejta puñukun. Qhapaj runatarí, kapuynin mana allinta puñojllatapis saqenchu.

¹³Kay pachapi uj imata ancha llakiyta rikuni: Qhapajkunaqa kapuyninta mana allinnillankupaj waqaychasqankuta.

¹⁴Chay imastaqa mana allin imasllapi tukuchinku, wawasninkupajtaj manaña imapis kanchu.

¹⁵Imaynatachus mamampa wijsanmanta q'alalla llojserqa, ajinallatataj q'alalla kutiponqa mana imayoj. Llank'asqanmantaqa mana imatapis apanqachu, imaynachus nacerqa kikillantaj chinkaponqa.

¹⁶Kayqa manapuni allinchu, imaynatachus kay pachaman jamorqa kikillantataj kutipunanqa, jina kajtenqa imapajtaj chay jinatapuni qhasi mana kajta llank'arqari?

¹⁷Chay jawa runaqa tukuy kausaynimpi laqhapi jinalla mikhonqa pata patallata purispa, llakiywan mana imayojtaj.

¹⁸Chayta rikuspa noqaqa nini, allimpuni runapajqa mikhunan, ujyanan, tukuy imata kay pachapi, sayk'uywan ruwasqasninwan kusikunan, imastachus chay pisi kausayta Dios qosqampi, chaymin chayaqenchejqa.

¹⁹Ajinallataj Diosqa pi runamampis qhapajyayta, allin imastawan qon, chaywan kusikunampaj, llank'asqanmanta mikhunampaj, imachus paypaj kajta kusiywan jap'inampaj. Kayqa Diosmantapuni jamun.

²⁰Dios chay jinatapuni kusichisqanrayku runaqa mana anchata kausayninmanta dakunchu.