Read Quechua Bolivia DC Bible ECLESIASTÉS 6 Bible Online

ECLESIASTÉS 6 - Quechua Bolivia DC Bible bible

ECLESIASTÉS 6

¹Kay pachapi uj imata mana allin imata rikullanitaj, chayqa runas ukhupi kallampuni: Diosqa runasman qon qhapajyayta, tukuy imasta, allimpi qhawasqa kananta, imastachus munasqanta ima. Chay tukuywampis Diosqa mana saqenchu, chaykunawan kusikunanta, manachayqa waj runasraj chay kapuyninwan kusikunku. Chayqa jatun llakiy, qhasi mana kajtaj.

³Runaqa pachaj wawasniyojpis kachun, unaytapis kausachun, unay watasniyojpis kachun; sichus allin imaswan mana sajsakorqachu, nitaj allimpichu p'ampasqa karqa chayqa. Noqaqa nini, uj sullusqaraj paymanta nisqaqa aswan allin kasqanta.

⁴Chay wawaqa qhasi mana kajta nacen, laqhayajmantaj ripun chayqa, sutenqa laqhayaywan tapasqa kashan.

⁵Chantapis payqa mana intita rikunchu, nitaj yachallampischu. Chay tukuywan payqa sumajta samarikun, chay runamanta nisqaqa.

⁶Sichus chay wawaqa iskay waranqa watasta kausanman karqa, tukuy imas kajwan mana kusikuspalla chayqa. Chay tukuywampis manachu tukuyninku rinku chay kikin cheqallanmantaj?

⁷Tukuy ima llank'asqan runajtaqa mikhunallampaj, chaywampis manapuni sonqo junt'asqachu kayta atinchu.

⁸Yachayniyojkunajta imasnintaj tiyan, wampu runajmanta nisqari? Wajcha runajta imasnintaj tiyapun, wakin runaspa chaupimpi allinta puriyta yachasqanmantari?

⁹Rikunapuni aswan allin, qhasi manakajta imatapis rikuy rikuyta yuyananmanta nisqaqa. Chaypis qhasi manakajllataj wayra jap'ikuy jinalla.

¹⁰Yachakusqan imaschus kunan kajqa ñaupajtaña sutichasqa karqa, yachakuntaj imachus runa kasqan. Chayrayku paymanta atiyniyojwanqa mana pipis siminakuyta atinmanchu.

¹¹Cheqamanta ashkha palabrasqa qhasi mana kaj palabrasta rikhurichin. Chaywantaj mana imapis tarikunchu.

¹²Cheqamanta mana pipis yachanchu, chay tukuy kausaynimpi runapajqa imaschus allin kananta, imaraykuchus chay tukuy qhasi mana kaj ruwasqanqa llanthu jinalla chinkarin. Pitaj runaman willanqa kay pachapi kashaspa wañupojtin qhepaman imachus kanantari?