Read Quechua Bolivia DC Bible ECLESIASTÉS 8 Bible Online

ECLESIASTÉS 8 - Quechua Bolivia DC Bible bible

ECLESIASTÉS 8

¹Pitaj yachayniyoj runa jinari? Tukuy imaspis imatachus niyta munasqanta pitaj pay jina yachanmanri? Uj runaj uyantaqa yachaynin k'ancharin. Phiña uyatapis k'achaman tukuchin.

²Noqaqa yuyaychayki reypa kamachisqanta kasunaykitapuni, Diosman jurasqaykitawan.

³Ama ancha apurasqata reypa ñaupaqenmanta llojsiychu, amataj ima sajratapis ruwaspa pallaypunichu; imaraykuchus payqa imatachá munasqanta ruwasonqa.

⁴Reypa kamachisqanqa kasunapajpuni; mana pipis niyta atinchu, imatá kayta ruwankiri?, nispallapis.

⁵Pichus chay kamachisqasta kasukojqa mana ima sajratapis rikonqachu. Yachayniyoj runaqa allinta sonqompi yachan, mayk'ajchus imaynachus kanantapis.

⁶Imastachus munasqaykita ruwanaykipaj tanteanaykipajwanqa tiyan tiempo; imaraykuchus runaj sajra ruwaynenqa ancha jatumpuni.

⁷Mana yachanchu imaschus qhepaman jamunanta, nitaj pipis chay imas kananmanta willaykurej kanchu.

⁸Mana pi runapis kausayninta jap'inampaj atiyniyojchu, nitaj pipis wañuyta atipaj kanchu, mana imapis kanchu wañuywan maqanakunapajqa. Chay sajra runataqa manapuni chay sajra ruwasqanqa wañuymanta qhechonqachu.

⁹Chay tukuy imasta yacharqani, kay pachapi imaschus ruwakun chaykunata tukuy sonqoywan allinta unanchaspa. Mayk'ajpis runaqa, runa masinta kamachin, paypa mana allinnillampajtaj.

¹⁰Chanta rikullanitaj, uj juchasapa runata tukuy runas sumajta p'ampaykushajta. May llajtapichus cheqanta ruwaj runas Dioswan tinkukuna cheqaman sapa kuti rejkunatatajri, chay llajta ukhupeqa mana yuyarikullankupischu. Chaypis noqapajqa qhasi mana kajllataj.

¹¹Juchasapa runas mana usqhayta jasut'isqa kajtinkoqa runaspa sonqosninku astawan sajra ruwayman qokunku.

¹²Juchasapasqa pachaj kutitapis juchasta ruwashaspa, aswan unaytaraj kausanku. Chaywampis noqaqa yachani, pischus Diospa ñaupaqempi k'achata kausakunku, Diosta manchachikuspa chaykunata allimpuni rinanta.

¹³Jinallataj juchasapastapis sajra kajta ruwasqankurayku mana allin rinanta, kausayninkoqa llanthu jinalla chinkarinanta; Diosta mana manchachikusqankurayku.

¹⁴Chaywampis kay jallp'a patapeqa mana allinkunasraj tiyan: Cheqanta ruway k'acha runasta mana allinchu rin, sajra juchastapis ruwankuman karqa jina. Juchasapa runasmantaj cheqantapis ruwankuman jina allin rin. Chayta noqaqa nini qhasi mana kajllataj kasqanta.

¹⁵Chayrayku, noqaqa nini kusikoyqa sumaj kasqanta. Runapajqa kay pachapi mana imapis allin kajqa kanchu, mana chayqa mikhunan ujyanan, kusikunan imalla, imaraykuchus runapajqa chay imaslla qhepakun tukuy ruwasqanmanta kay pachapi Dios kausayta qonankama.

¹⁶Kay pachapi imaschus, imaynatajchus kashan chaykunamanta tukuy sonqo yachaj churakorqani. Chay imaspi tuta p'unchay yuyajtenqa mana puñuypis jap'ikunchu.

¹⁷Diospa tukuy ima ruwasqasninta rikuni. Runaqa mana yachanchu Diosqa imaynamantachus chay imasta kay pachapi ruwasqasninta. May jinata mask'ashaspapis runaqa manapuni tariyta atinchu. Yachayniyoj runaqa nichumpis kay imasta tarini, nispa; chaywampis manapuni kay imastaqa tariyta atinchu.