Read Quechua Bolivia DC Bible TAKIYKUNA 1 Bible Online

TAKIYKUNA 1 - Quechua Bolivia DC Bible bible

TAKIYKUNA 1

¹Takiykunamanta aswan sumaj takeyqa Salomompa ruwasqan.

²Simiykiwan much'aykuriway ari! Munakuyniykeqa vinomantapis aswan misk'i.

³K'achituta q'aparishan, jawiykunasniyki q'apashaj jawiykunamanta astawan. Sutiykeqa q'apashaj jawinatapis jich'arpasunman jina. Chayrayku, sipaskunaqa sinch'ita munakusunku.

⁴Pusarikuway ari; iskayninchej khuska risunchej. Reyníy, wasiykiman pusakapuwan ari. Qanwan may kusiywan kusikusunchej; chaypitaj yuyarisunchej munakuwasqaykimanta, vinomantapis aswan misk'i chayta. Chayrayku qanta sipaskunaqa mayta munakusunku.

⁵Jerusalén sipaskuna, noqaqa yana kani, jinapis k'achita; Yana kani, Cedarpa toldosnin jina; K'achita kani, Salomompa jark'achina telasnin jina.

⁶Ama yana kasqaytaqa qhawawaychejchu, nitaj ruphay yanayachiwasqantapis. Kikin turasniy noqapaj phiñarikorqanku; uvas chajrasta qhawajta saqewarqanku, kikin uvas chajraytataj saqerparini.

⁷Yachanaypaj willaway ari, munakuwajníy. Maypitaj ovejasniykitaqa michimunkiri? Chaupi p'unchaytaqa mayman qhatispataj samarichimunkiri? Imaraykutaj noqa uj puriskiri jina puriymanri?, kausaqesniykej uywasnillanta qhawaspari?

⁸K'achitasmanta aswan k'achita, mana yachanki chayqa, ovejaspa lastronta qhawarispa rillay. Cabritasniykita michikamuy, michejkunaj ch'ujllasnin chaynejpi.

⁹Munakusqetáy, qanqa noqajta kanki; faraompa carretanta qhatatej caballo jina k'achita kanki.

¹⁰Uyitasniykeqa k'achitas kanku, ningriykimanta faluchos chaupipi; walqayoj kunkaykipis k'achitu.

¹¹Faluchostaqa qorimanta ruwapusqayku, qolqewan cantosnin k'achanchasqata.

¹²Rey mesampi tiyakushajtin, nardo t'ikay q'aparirin.

¹³Munakusqay noqapajqa uj maki q'apiy mirra jina; samarikuntaj ojllayniypi.

¹⁴Munakusqay noqapajqa, En-gadipi uvas ukhupi alheña t'ikas jina.

¹⁵Qanqa k'achita kanki, munasqetáy, k'achitapuni kanki, ñawisniykeqa iskay irpasman rijch'akun.

¹⁶K'achitu kanki, munakusqáy; k'achitu kanki. Q'omer qhoraqa puñunanchej.

¹⁷Wasinchejpa kurkusnenqa cedromanta, cipreses nisqa maderamanta techasqataj.