Read Quechua Bolivia DC Bible TAKIYKUNA 4 Bible Online

TAKIYKUNA 4 - Quechua Bolivia DC Bible bible

TAKIYKUNA 4

¹Qanqa k'achita kanki munasqetáy, k'achitapuni kanki. Ñawisitusniykeqa paloma ñawisitus jina rikukun suk'umpayki urapi. Chujchasniykeqa, Galaad kinraykunapi ashkha cabras mast'alla puñurashajkuna jina.

²Kirusniykeqa millmasnin ruthurasqa ashkha ovejas jina, sumaj mayllasqetaspis llojsimushankuman jina, sapa ujninkupis iskay uñayojkama kankuman jina, ni ujllapis mana uñasniyojchu kanmanchu jina.

³Simisituykeqa sumaj puka q'aytitu jina, parlakusqaykipis k'achitu, sonqo suwaj. Uyitaykeqa granada kichasqa jina, suk'umpayki urapi.

⁴Kunkitaykeqa Davidpa qhawana torren jina, chaypi enemigomanta pakakunapaj ruwasqa jina. Chay torrepitaj waranqa escudos warkhusqas kashanku. Chay escudosqa tukuy wapu soldadospata.

⁵Ñuñusniykeqa iskay taruka uñasman rijch'akunku, awachuspis kankuman jina, lirios t'ikas ukhupi mikhushajman.

⁶Amaraj sut'iyamushajtin, amaraj laqha chinkapushajtin, noqaqa mirra orqoman risaj, jinallataj incienso lomamampis.

⁷Qanqa k'achitapuni kanki munasqetáy, chaki puntaykimanta uma puntaykikama. Qampeqa manapuni ima mana allimpis kanchu.

⁸Libanomantapacha noqawan jamuy ari, noviáy. Arí, Libanomantapacha jamuy ari, Amana orqomanta qhawarimuy ari, jinallataj Seirmanta, Hermón orqomantawan. Chantaqa leonespa jusk'usninmanta, pumas tiyakunku chay puntasmantawan.

⁹Sonqoyta suwarpariwanki, hermanitáy, noviáy. Ujta qhawarispalla sonqoyta suwarpariwanki, kunkaykipi ujnin kaj walqaykiwan ima.

¹⁰Chay jina k'achapuni noqapaj munakuyniykeqa hermanitáy, noviáy. Vinomantapis aswan misk'i munakuyniykeqa, q'apaj jawinaswan jawikusqasniykimantapis aswan k'acha, ima q'apajkunachá tiyan chaykunamantapis aswampuni.

¹¹Ay, noviáy, qampa simiykimantaqa misk'i llojsimun. Qalluyki urapeqa misk'iwan lechewan kashan. P'achasniykeqa Líbano jina k'achata q'apashan.

¹²Qanqa, hermanitáy, noviáy, kanchayoj huerta jina kanki; yaku jina pakasqa, yaku juturi jina sumaj pakasqataj.

¹³Chay huertapi maypichus granada sach'a q'erqemuspa sumaj misk'ita poqon alheña t'ika,

¹⁴nardo t'ika, azafrán t'ika, q'apashaj kaña, canelapiwan, tukuy incienso sach'as; mirra, áloe, tukuy sumajta q'apashaj imaspiwan.

¹⁵Chanta rijch'akullankitaj huertapi yaku juturiman, ashkha yaku phullchimojman, Libanomanta uraykamoj yakuman ima.

¹⁶Patanejmanta wayra, sayarikuy. Uranejmanta wayra, jamuy kayman. Huertaypi wayraripuway, tukuy t'ikasniyta q'aparichipuway. Huertaykiman jamuy ari, munasqáy, chay sumaj misk'i poqoykunata mikhurikuy.