Read Quechua Bolivia DC Bible TAKIYKUNA 6 Bible Online

TAKIYKUNA 6 - Quechua Bolivia DC Bible bible

TAKIYKUNA 6

¹Tukuy warmismanta aswan k'achita warmi, maymantaj rin munakusqaykiri? Maymantaj chanta ripunman munasqaykiri? Qanwan khuska rispa mask'amunachej.

²Munasqayqa huertanman rin, k'achituta q'apashaj huertanman. Chay huertampi michimunampaj, rosa t'ikastawan pallamunampaj.

³Noqa munakusqaypata kani, paypis noqajta. Payqa ovejasninta rosas t'ikas chaupipi michin.

⁴Qanqa, munasqetáy, k'acha kanki, may munana Tirsa llajta jina, Jerusalén llajta jinataj. Ñaupajman rishaj soldados jina mana imanina.

⁵Amaña chay jinata qhawawaychu, sinch'itaña chay ñawisniykeqa sonqoyta suwawan. Chujchasniykeqa Galaad kinraykunaspi mast'alla cabras jina kanku.

⁶Kirusniykeqa millmasnin ruthurasqa ashkha ovejas jina, sumaj mayllasqetaspis llojsimushankuman jina, sapa ujninkupis iskay uñayojkama kankuman jina, ni ujllapis mana uyasniyojchu kankumanchu jina.

⁷Uyitaykeqa granada q'allurpayasqa jina, veloyki ukhumanta rikukamushan.

⁸Reinasqa sojta chunka kanku, pusaj chunkataj tantasqaslla, sipaskunataj ashkhas kanku.

⁹Noqaj palomitayri uj k'atalla, pay k'atalla allin kajqa. Pay k'atalla mamanmantaqa llojsimun, payqa mamampaj may munasqa. Tukuy sipaskuna payta rikuytawan ninku, kusikuyniyojmin payqa, nispa. Paytaqa reinaswan, tantasqalla kaj warmiswan maytapuni alabanku.

¹⁰Pitaj paqarinmanta intej k'anchaynin jina qayllamushanri? Killa jina k'achitari, inti jina manchayta k'ancharispari, ñaupajman rishaspa soldados jina mana ima ninari?

¹¹Nuez huertaman uraykorqani, imaschus chay vallepi poqon chaykunata qhawarej, imaynatachus uvas k'aspi q'erqemushajta, granadaspis t'ikashanchus manachus chaytawan qhawarej.

¹²Manaraj kay imasmanta yachashajtiy, kamachejpa carretampiña rikhurini.

¹³Kutirimpuy, kutirimpuy ari sulamita, kutirimpuy, kutirimpullay ari, rikusuytapuni munayku. Imatataj rikuyta munankichej sulamitamantari? Rikuyta munayku uj tusuyta jaraspi jina.