Read Quechua Bolivia DC Bible YACHAY 1 Bible Online

YACHAY 1 - Quechua Bolivia DC Bible bible

YACHAY 1

¹Kay pachapi kamachejkuna, cheqan kajta munakuychej. Señormantaqa allinta yuyaychej. Llimphu sonqowantaj payta mask'aychej.

²Paymanta mana asirikojkunaqa payta tarillanqanku. Payqa rikhurillan paypi creejkunaman.

³Pantasqata yuyajkunaqa Diosmanta karunchakunku. Mana umayojkunaqa, paymanta asirikunku chayqa, paymin atiyninwan paykunata opayachin.

⁴Yachayqa sajra sonqoman mana yaykunchu. Manataj sayanchu juchallikoj runapi.

⁵Runasta yachachej Santo Espiritoqa, ch'aukiyajkunawan mana kakunchu. Santo Espiritoqa, sajrata yuyajkunamanta ayqempacha. Jinallataj, mana cheqan kajta rikuytawanqa, karunchakapun.

⁶Yachayqa, runasta munakoj phukuymin. Jinapis, mana qonqaponqachu runaqa Diospa contrampi rimasqanmanta. Diosqa yachampuni imatachus runa yuyasqanta. Sut'itataj runaj sonqonta qhawan. Chantaqa, runaj nisqantapis uyarishampuni.

⁷Señorpa Espiritonqa kay pachata junt'ashan. Tukuy imata rikojqa runaj nisqanta yachampuni.

⁸Chayrayku ari, sajrata parlajqa mana paymanta pakakuyta atinchu. Diosninchej cheqanyachejtin, chay runaqa mana ayqeyta atenqachu Diospa qhepan kaj siminmanta.

⁹Sajra sonqoyoj runaqa, mat'ita tapuchikonqa. Maychus kajta jap'inampajqa, sapa nisqa Dioskama chayanqa.

¹⁰Diosninchejqa ningrin kicharisqa tukuy imata uyarin. Thutuspapis runa parlajtin, payqa uyarillampuni.

¹¹Chayraykoqa, amapuni thautiychejchu. Amapuni ni ima sajrata niychejchu. Pakayllamantapis parlajtiykichej, jap'ichikuwajchej. Runaqa wañuyman rinman llulla siminrayku.

¹²Pantaspa purinkichej chayqa, wañuyman chayawajchej. Mana allin kajta ruwaspa, chinkawajchej.

¹³Diosninchejqa mana wañuyta ruwarqachu. Kausayniyojkuna tukuchisqas kajtinku, payqa mana kusikunchu.

¹⁴Diosninchejqa tukuy imata ruwarqa kausanampaj. Kay pachaj poqoynenqa runaj kausaynimpajmin. Mana kanchu chaypi runata wañuchejqa. Manachayqa, kay pachapi wañuy mana kamachinchu.

¹⁵Cheqanyachiy mana wañunchu.

¹⁶Sajra runasqa wañuyta wajyanku qhaparispa, makisninkuwampis. Paykunapajqa wañuy kausaqenku. Wañuytaqa tukuy sonqo mask'anku. Wañuywantaj uj tratota ruwanku. Wañuymantapuni kanankupaj jina kanku.