Read Quechua Bolivia DC Bible YACHAY 10 Bible Online

YACHAY 10 - Quechua Bolivia DC Bible bible

YACHAY 10

¹Yachayqa qhawaykorqa chay ñaupajta ruwasqa kay pachaj tatanta, pay sapallan ruwasqa kashajtin. Yachaytaj paytaqa juchanmanta kacharicherqa.

²Yachaytaj payman kallpata qorqa tukuy ima patapi sayanampaj.

³Maypachachus uj juchasapaqa k'ajaj phiñaynimpi yachaymanta t'aqakorqa, chinkayman rerqa, wauqenta chejnikuspa wañuchisqanrayku.

⁴Maypachachus payrayku yaku kay pachata chinkacherqa, yachaypuni kay pachata chinkaymanta ayqecherqa, cheqan sonqoyoj runata yakunta pusaspa chhalla k'ullullapi.

⁵Maypachachus uj sonqolla khuskachakuspa tukuy laya runasqa, rumi sonqosninkurayku ch'eqerasqas karqanku, yachaypuni ajllakorqa cheqan sonqoyoj runata, payta waqaychaspa mana k'aminayojta Diospa ñaupaqempi. Kallpayojtataj sayacherqa anchata wawanta munakojtimpis.

⁶Yachaypuni cheqan sonqoyoj runata kacharicherqa maypachachus Diosqa chinkacherqa phishqantin llajtata ninata parachimuspa.

⁷Chay runaspa sajra sonqosninkumanta yuyarikunapaj, kunankama uj t'ajra pampapi q'osñimushanraj. Chaypi sach'asqa mana poqochikunkuchu. Chaypitaj, yuyarikunapaj uj mana creej runamanta, uj kachi lanti sayarishan.

⁸Chay runasqa yachaymanta karunchakusqankurayku, manaña aterqankuchu sumaj kajta rejsiyta. Chantapis, qhepankupi yuyarikunasta saqerqanku, runas yachanankupajpuni paykuna wampu sonqos kasqankuta.

⁹Yachayrí, payta qhatejkunata llakiymanta kacharicherqa.

¹⁰Yachayqa sumaj ñanninta cheqan sonqoyojta pusarqa, wauqempa phiñakuyninmanta ayqeshajtin. Rikucherqataj Diospa reinonta. Chantapis, santo imasta yachacherqa. Ruwasqampirí, ñaupajman rinampaj yanaparqa. Llakiynintataj sumaj poqoyniyojman tukucherqa.

¹¹Chaymanta, payta jark'arqa rikhurimojtinku paypa kapuyninta munapayaj ñak'arichej runas. Chantaqa, payta qhapajyacherqa.

¹²Contrasninkumanta jark'arqa, waqaycharqataj payta urmachiyta munajkunamanta. Sinch'i maqanakupipis atipaykucherqa, chay jinamanta yachanankupaj Diosta yupaychayqa aswan sumaj kasqanta tukuy imamanta astawan.

¹³Yachayllataj karqa pichus mana saqerparerqachu qhatuchikoj cheqan sonqoyoj runata, mana chayrí juchallikuymanta karuncharqa.

¹⁴Yachayqa paywan khuska kakorqa wisq'aykojtinku, manataj saqerparerqachu phujyu ukhupi, kamachikuy tojnuta payman qonankama. Chaymanta, payta sayaykucherqa ñak'arichejkunaj patampi. Payqa rikhurichin llakichejkunasnin llullakusqankuta, wiñay lliphipiyniyojtaj qhepakun.

¹⁵Yachayqa kacharicherqa ajllasqa aylluta, mana k'aminachikoj runasta, llakichejkunaspa makisninkumanta.

¹⁶Payqa, Señorta yupaychaj runaj sonqonman yaykorqa. Payllataj tukuy laya t'ukunasta ruwaspa, sayarqa manchachej reykunaspa ñaupaqempi.

¹⁷Ajllasqa runasman ñak'arisqankumanta t'inkata jaywarqa. Sumaj ñanninta paykunata pusarqa. P'unchaypi paykunata llanthuykorqa, tutapitaj qoyllurkunaj k'anchaynin jina karqa paykunapajqa.

¹⁸Yachayqa paykunata puka qochanta thaskicherqa, pusarqataj p'ultiykuchej yakunta.

¹⁹Chaypachaqa, yakus p'ultiykucherqanku paykunaj contrasninkuta. Chantaqa, ukhumanta ajtuykorqa.

²⁰Jinamanta, cheqan sonqoyojkunaqa sajra runaspa imasninkuta jap'ikaporqanku. Paykuna, Señor, santo sutiykita yupaycharqanku. Tukuyninku ujllapi, atiyniykiwan yanapasqaykimanta yupaychasorqanku.

²¹Yachayqa opaspa simisninkuta kicharerqa, wawaspa qallusnintataj phaskarqa.