Read Quechua Bolivia DC Bible YACHAY 11 Bible Online

YACHAY 11 - Quechua Bolivia DC Bible bible

YACHAY 11

¹Yachayqa israelitasta ñaupajman puricherqa santo profetanejta.

²Paykunaqa ch'in pampanta purej kanku, jarakoj kankutaj mana chimpay atina cheqaspi.

³Israelitasqa contrasninkoj ñaupaqempi sinch'ita sayarerqanku. Paykunawan tinkojkunata ayqecherqanku.

⁴Ch'akichikushajtinku wajyasorqanku. Wayq'o qaqamanta, sinch'i rumimanta, yaku llojserqa ujyanankupaj.

⁵Ajinamanta, imachus contrasninkupaj jasut'i karqa, paykunata phutiyninkupi sonqocharqa.

⁶Contrasninkoqa mayupi mana tarerqankuchu mana tukukoj yakuta, manachayqa qonchu yakullata, yawarniyojta, t'uruyojta ima.

⁷Chaywanqa castigasqas karqanku wawasta wañuchisqankurayku. Aylluykimanrí, mana suyajtinkupis, yakuta qorqanki may ashkhata.

⁸Paykunaqa, ch'akichikuyninkunejta yacharqanku imaynatachus qanqa contrasninkuta castigasqanki.

⁹Aylluyki ñak'arisqampi yacharqa ima llakiywanchus sajra runas ñak'arinku, qan phiñakuspa castigajtiyki. Chaytaqa ñak'arisqampi yacharqa, munakuywampis ñak'arichejtiyki.

¹⁰Aylluykitaqa k'amerqanki, imaynachus wawasniyoj runa wawasninta k'amin, ajinata. Aylluykej contrasnintarí llakiykucherqanki, imaynachus phiña runa rey runasninta chinkayman qharqon, ajinata.

¹¹Karupichus qayllapichus, kikillantataj ñak'arerqanku.

¹²Tukuy chaykunamanta yuyarikuspa iskay kutita llakikorqanku, iskay kutitataj waqarqanku.

¹³Uyarispa imachus paykunata ñak'arichisqanta, chay kikimpuni wajkunata kusichisqanta, Señor kasqanta yacharqanku.

¹⁴Pitachus ujpacha saqerparichisqanku, ujpachataj asirikuspa wijch'uykusqanku tukuy ima tukukuytawanqa, pay kikinta pataman oqharerqanku. Paykunaj ch'akichikuyninkoqa, mana cheqan sonqoyojkunaj ch'akichikuyninku jinachu karqa.

¹⁵Paykunaqa sajra sonqoyoj karqanku, mana yuyayniyojtaj. Chay jawa pantarqanku k'umuykukuspa mana unanchaj qhatatakojkunaman, qhesachana uywasmampis. Chayrayku ari, qanqa, paykunata nanaykuchispa, pisi uma uywasta paykunaman kachaykorqanki.

¹⁶Chayta ruwarqanki yachachinaykipaj runa castigachisqa kananta imawanchus juchallikun, chayllawantaj.

¹⁷Tukuy atiyniyoj makiykiwan mana kajllamanta mundota ruwarqanki. Kikin makiykillawantaj atiwaj paykunaman kachaykuyta yupa jukumarista, mana manchachikoj pumastawan.

¹⁸Mana chayrí, manaraj rejsisqa phiña animalkunata, chaypachallaraj ruwasqasta, qhanirpariyta munajkunata, senqankumanta larway ninata phukojkunata, asnaj wausita simisninkumanta llojsichispa, ñawisninkumantataj k'anchay wach'ista, kharkatitinapaj jina.

¹⁹Chaykunaqa, atinkuman wañurachiyta jap'iykuytawankama. Mana chayllachu, manachayqa ujta rikhurimuspalla chinkayman aparparichinkuman karqa.

²⁰Chaykuna mana kanman chaypis, uj phukuyllawan urmankuman karqa, cheqanyachej simi nisqaykiwan qhatichikuspa, q'ala picharparisqas atiyniykiwan.

²¹Qanrí, tukuy imata ruwarqanki allintapuni, maychus kajman jina.

²²Mayllapipis jayk'ajllapis qanqa atiyniykita orqhoyta atinki. Pitaj jark'akunman kallpayoj makiykimantari? Qanwan ninakuspaqa, mundo rijch'akun t'iyu rumisituman, aysanapi churasqaman. Rijch'akuntaj chhulla sut'uman, tutamanta pampaman t'akakojman.

²³Qanqa tukuykunamanta khuyakunki, tukuy imata atisqaykirayku. Qanqa ñawisniykita wisq'anki mana runaj juchanta rikunaykipaj, qanman kutirinankuta munaspa.

²⁴Arí, qanqa tukuy kajkunata munakunki, manataj sonqoykita nanachikunkichu ruwasqasniykimanta. Chejniwajchus imallatapis, chaytaqa mana ruwankimanchu karqa.

²⁵Imaynamantataj imallapis kakunman, qan mana munajtiykiri? Imaynamantataj imallapis kausanman, mana qampuni kausananta nejtiykiri?

²⁶Qanrí, tukuy imamanta khuyakunki, imaraykuchus tukuy ima qampatapuni, kausayniyojta munakoj Tata.