Read Quechua Bolivia DC Bible YACHAY 12 Bible Online

YACHAY 12 - Quechua Bolivia DC Bible bible

YACHAY 12

¹Mana wañupoj samayniyki tukuy imapi kashan.

²Chayrayku, pisimanta pisilla urmajkunata castigaykunki. Qan ninkiraj: Pajtataj!, nispa. Rikuchinkiraj imapichus juchallikusqankuta, sajramanta ithirinankupaj, qampitaj creenankupaj, Tatáy.

³Qan millachikorqanki rikuspa imaynatachus kausasqanku ajllasqa jallp'aykipi tiyakoj ñaupa runasqa.

⁴Qan millachikorqanki imaraykuchus paykunaqa mana rikuy atina imasta ruwayta yachasqanku, layqa imasta, waj laya millay imastapis.

⁵Mana khuyakuspalla, paykunaqa wawitasta wañurachej kanku. Mikhunasninkupitaj, runa ch'unchulastawan, aychatawan yawarnintinta mikhuykoj kanku. Paykunaqa, tantaykukoj kanku paykunapuralla, chaykunata ch'inmanta ruwaj.

⁶Wawitasninkoqa mana qhaparikuyllatapis aterqankuchu. Chay tata mamasta, kikin wawitasninkuta wañuchejkunata, chinakachiyta munarqanki ñaupa tatasniykoj makisninkunejta.

⁷Chay jinamanta, munarqanki Diospa wawasnin ripunankuta munakusqayki jallp'aman, tukuy jallp'asmanta astawan munakusqayki chayman.

⁸Jinapis, runaspuni kasqankurayku, khuyakuywan qhawarqanki paykunata. Pisimanta pisi tukuchinaykipaj, maqanaku runasniykej ñaupaqenta, lachiwanasta kachaykorqanki.

⁹Qanqa, atinkiman karqa chay mana rejsisojkunata cheqan sonqoyoj makisninkuman jaywayta, maqanakupi urmanankupaj. Manachayqa, atinkiman karqa ujllapi t'unarparichiyta phiña animalkunawan. Munaspaqa, atillawajtaj tukuchiyta uj simillawampis.

¹⁰Mana chaytachu ruwarqanki. Qanman kutirinankuta suyarqanki, yachaspapis rumi sonqospuni kasqankuta, nacekusqankumantapacha may sajras, mana tijrachikuna yuyayniyoj.

¹¹Paykunaqa, qallariymantapacha qhesachana laya runas karqanku. Mana ni pimanta manchachikusqaykiraykuchu, paykunaj juchasninkutaqa saqerqanki mana castigoyojta.

¹²Pitaj nisunkimanri, imata ruwarqanki?, nispa. Pitaj ninman pantasqaykitari? Pitaj tumpasunkiman chinkachisqaykimanta qampuni ruwarqanki chaykunata? Pitaj ñaupaqeykipi sayanman chay sajra sonqoyojkunata yanapajri?

¹³Chantapis, qan sapallayki kanki runasta qhawaj Diosqa. Mana waj kanchu tapusunampaj allintachus manachus cheqanyachisqaykita.

¹⁴Ni mayqen reypis, ni mayqen kamachejpis atinmanchu oqharikuyta phiñakuspa runasninta llakichisqaykirayku.

¹⁵Cheqan sonqoyojpuni kanki. Kamachisqaykipi, tukuy imatapuni maychus kajman jina cheqanyachinki. Maymanta qan niwajri mana juchayojta llakichinankutari?

¹⁶Atiyniyoj kasqaykirayku tukuy imata cheqanyachinki. Tukuy runasqa qampata kanku. Chayrayku, paykunaj juchasninkutaqa pampachallanki.

¹⁷Kallpaykita rikuchinki chay runaspa ñaupaqenkupi, pikunachus yuyanku mana atiyniyojchu kasqaykita. Kajtinkutaj pikunachus yachaspapis jatun atiyniyoj kasqaykita, ñaupaqeykipi oqharikunku, chaykunataqa muspharparichinki.

¹⁸Jatun atiyniyoj kasqaykirayku, maychus kajllata cheqanyachinki, sumaj sonqoykiman jinataj kamachiwayku. Kallpaykitaqa jayk'ajllapis rikuchiyta atinki.

¹⁹Chay jinamanta, aylluykiman yachacherqanki imaynatachus cheqan sonqoyoj runa purinan tiyan: Cheqan sonqoyojqa khuyakoj runapuni kanan tiyan. Wawasniykita sonqoyacherqanki, imaraykuchus suyallanki juchasninkumanta llakikunankuta.

²⁰Wawasniykita chejnikojkunata, wañuymanña thaskejkunata, qanqa allinllamanta, sonqo nanaywan castigarqanki, suyasparaj juchasninkuta saqenankuta.

²¹Kikin wawasniykitataj, astawan munakuywan qayllarqanki juchasninkumanta tapoj. Yuyarikunki ari tatasninkuwan khuskachakusqaykimanta, sumaj kajta paykunaman qonaykimantataj.

²²Noqaykuta chejnikojkunataqa manchayta nanaykuchinki. Noqaykutarí k'amiykullawayku. Chayta ruwanki, noqayku cheqanyachinayku kajtin, k'acha sonqoykimanta yuyarikunaykupaj. Chantaqa, juchasniykumanta tapuchinayku kajtinri, chayta ruwawarqayku khuyakuyniykita suyanaykupaj.

²³Chay jawa, millayta kausakoj wampu runastaqa, kikin millay yupaychanasninkunejta llakicherqanki.

²⁴Paykunaqa, may karumampuni ririkaporqanku, pantasqa ñanta jap'ispa. Paykunaqa, k'umuykukoj kasqanku millachikuna animalkunaman, ayqerparikunapaj jina chaykunaman. Chay runasqa mayllamampis pusaykuchikusqanku, mana yuyayniyoj wawitaspis kankuman jina.

²⁵Chayraykullataj, qanqa, ñuñojsitusta jina asirichina jasut'iywan chupacherqanki.

²⁶Chay jina jasut'iywanqa mana wanajkunataj, chimpananku karqa Diospa qayllanman, paywampuni jasut'ichikoj.

²⁷Paykunaqa, rikuspa wajtachikusqankuta chay animalkunanejta, mayqenkunatachus dioskuna jinata yupaychaj kunku, ñawisninkuta khicharerqanku, rejsikaporqankutaj cheqa Dios jinata, pitachus ñaupajta mana munarqankuchu rejsikuyta. Ajinata, tukuy jasut'iykunamanta aswan jatun kajqa, patankuman uraykamorqa.