Read Quechua Bolivia DC Bible YACHAY 13 Bible Online

YACHAY 13 - Quechua Bolivia DC Bible bible

YACHAY 13

¹Ch'usaj umasniyojpuni karqanku Diosta mana rejsej runasqa. Mana aterqankuchu rikusqankunejta kausakojta rejsikapuyta. Manataj aterqankuchu ruwasqasnejta yachayta pichus tukuy imata ruwarqa.

²Mana chayrí, dioskuna jinata yupaycharqanku ninata, wayrata, mana sayaj phukuyta, qoyllurkunata, phullchimoj yakuta, janaj pachapi kaj k'anchaykunatawan. Tukuy chaykunaqa paykunapaj dioskuna karqanku, mundontinta kamachejkuna.

³Sichus chaykunaj k'acha kayninkuta rikuspa dioskunapunichá kaykuna, nispa nerqanku, yachachunku chaykunaj señorninku aswan k'acha kasqanta, imaraykuchus paypuni, k'acha kajta ruwajqa, kanankuta nerqa.

⁴Chaymantataj, sichus t'ukorqanku rikuspa atiyniyoj kasqankuta, rikuspataj kayman jaqayman kuyurisqankuta, yuyachunku aswan atiyniyojpuni kasqanta chaykunata ruwarqa.

⁵Mundontimpi rikuspa jatuchaj kajta, k'acha kajtataj, rejsiyta atinchej chaykunata ruwajta.

⁶Chay jinamanta yuyaj runastaqa ama p'enqachinachu. Ichapis pantasqas kashanku, manaraj Diosta tariyta atispa, mask'ashajtinkupis.

⁷Diospa ruwasqasnin ukhupi kausanku. Chaykunata rikuspataj, rejsikapuyta munanku. K'achitu kasqanraykutaj, jap'erqochikunku.

⁸Jinapis, juchanku kakullampuni.

⁹Imajtin ari, qayllaykuspaña tukuy imaman yuyayninkuwan, mana kunankama tarinkuchuri tukuy imaj Señornintaqa?

¹⁰Khuyakunapajpuni kanku paykunaqa. Sonqosninkuta qopunku mana kuyurikuyta atejkunaman. Runaspa ruwasqasninkutaqa dioskunata sutichanku: Qorimantawan, qolqemantawan imasta, k'achituta ruwasqasta. Uywasman rijch'akojkunatapis, dioskunata ninku. Chantaqa, ñaupa runas k'achanchasqanku chay wijch'unallapajña rumispis, paykunapaj dioskunallataj karqanku.

¹¹Kunanqa yuyarikuna wakin llant'eros ruwasqankumanta. Llant'eroqa, juch'uy sach'ata urmachiytawan, qaranta qechukapun usqhayllata. Chay k'ullumantataj imallatapis ruwarqon wasimpi sirvinampaj.

¹²Puchorqa chay k'aspistarí, llant'apaj jallch'an, mikhunanta wakichikunampaj.

¹³Mana ni imapajña sirvej k'ullutarí, phujllakuspalla k'achanchaykun. Chay mosqosniyoj wist'u kurkutaqa, runa rijch'akojman tukurparichin.

¹⁴Kutispi, makisninmantaqa llojsin qhesachana animalman rijch'akoj. Chantaqa, pukamanta llut'arqompacha, jusk'usmampis t'uruta ñit'ispa.

¹⁵Chaymantataj, perqapi uj t'oqota ruwan. Chaypitaj k'ullutaqa fierrowan sayachin.

¹⁶Chayta ruwan ama k'ullu urmanampaj. Yachan ari chay k'ulloqa sapallanmanta mana kuyuriyta atisqanta. Lantilla kasqanrayku, runapuni kayman jaqayman apanan tiyan.

¹⁷Jina kajtimpis, chay k'ullumanta mañakun, imallamantapis pisichikushajtin. Casaranampajpis mañakullantaj. Wawasnimpajpis mañakullan, mana penqachikuspa mana kausakojman parlasqanmanta. Onqosqa kashajtintaj, mana kallpayojmanta mañakullan.

¹⁸Kausanampajqa, mana kausayniyojmanta mañakun. Mana ni imata ruwayta atejwanqa yanapachikuyta munashan. Waj ladosman rinan kashajtin, mana chakisniyojmanta mañakun.

¹⁹Qhatuman rinan kajtin, imallatapis ruwanan kajtimpis, mana makisnimpi kallpayojwan yanapachikuyta munashan.