Read Quechua Bolivia DC Bible YACHAY 15 Bible Online

YACHAY 15 - Quechua Bolivia DC Bible bible

YACHAY 15

¹Qan, Diosniyku, sumaj kanki. Qanqa nisqaykita junt'ankipuni. Qanqa pacienciakunki. Tukuy imata khuyakuyniykiwan kamachinki.

²Noqaykoqa, juchallikuspapis, qampatapuni kayku. Atiyniykitaqa rejsikapuyku. Manaña juchallikusqaykuchu. Yachayku ari wawasniykita jina qhawawasqaykuta.

³Runa, qanta rejsisuspa, allintapuni cheqanyachiyta atin. Yachaspataj atiyniyoj kasqaykita, wiñay kausaypa saphinta churan.

⁴Noqaykoqa mana pantachikorqaykuchu chay runaspa ruwasqanku fiero imaswan. Nitaj qhasimanta llut'aykusqanku chay imasqa pantachiwarqaykuchu.

⁵Mana yuyayniyoj runas chaykunata rikuspa, imasllamampis pusachikunku. Sonqosninkuta k'askanku mana kuyuriyta atej wañusqa lantiman.

⁶Mana allin kajta munapayajkuna kanku lantista ruwajkuna, munakojkuna, yupaychajkuna ima. Chayraykoqa, mana allin kajlla kosapuni paykunapaj.

⁷K'analleroqa, mayta unanchakuspa ruwarqon llamp'u llink'imanta, imatachus runas wasisninkupi necesitanku chaykunata. Kikin llink'illamanta ruwaykun mikhuna waqaychana wirkhista, wijch'unasta churanapaj wirkhistawan. Paypuni nin imapajchus chay wirkhisqa.

⁸Chaymantataj, qhasi mana kajllata, kikin llink'imanta dios nisqata ruwallantaj. Chaytaqa ruwan pichus qanimpalla jallp'amanta nacerqa, pichus pisi watasllamantawan kutimponqa maymantachus orqhosqa karqa chayman, maypachachus kausayninta jaywanan tiyan.

⁹Jina kajtimpis, manapuni dakunchu wañupunanmanta. Manapuni yuyantajchu kausaynenqa mana wiñaypajchu kasqanta. Qorimantawan qolqemantawan imasta ruwajpata yachapukunman tukun. Chay ruwasqanmantataj umanta oqharin.

¹⁰Paypa sonqonqa ushpha jinalla. Suyakusqanqa, jallp'amanta aswan qhesachanapaj. Kausayninmantapis t'uroqa astawan valen.

¹¹Mana ari pay kikinta ruwaj Diosta rejsikaporqachu. Mana rejserqachu payman ruwaj almata qojta. Mana rejserqachu pitachus payman kausay samayta qorqa.

¹²K'analleroqa yuyarqa kausay phujllakunallapaj kasqanta. Paypaj, kausay qhatulla karqa, maypichus runa qolqechakun. Payqa umampi nerqa: Tukuy ima sirviwachun qhapajman tukunaypaj, sajra kajpis, nispa.

¹³Chay runaqa, pichus kikin t'urumanta ruwan p'akikuna k'anallasta lantistawan, yachan tukuykunamanta astawan, juchata tarisqanta.

¹⁴Aylluykita chejnikojkuna sarojkunataj, manapuni yuyayniyojchu karqanku. Yuyakuypeqa, mana yuyayniyoj wawitaswampis atipachikorqanku.

¹⁵Waj runaspa lantisninkutapis, tukuyninkuta, dioskuna jinata jap'ikaporqanku. Chay lantisqa ñawisniyoj kanku, manataj rikuyta atinkuchu. Senqayoj kanku, manataj samayta atinkuchu. Ningrisniyoj kanku, manataj uyariyta atinkuchu. Makisniyoj kanku, manataj llankhayta atinkuchu. Chakisniyojpis kanku, manataj puriyta atinkuchu.

¹⁶Mañasqalla kausayniyoj runaqa chaykunata ruwarqa. Mana ni mayqen runallapis ruwayta atinmanchu uj diosta, pay kikinman ruwakojta.

¹⁷Wañupunan kashajtin, juchallikoj makisninwanqa mana kausayniyojllata ruwayta atin. Yupaychaykunasmantaqa, paymin aswan valorniyojpuni. Payqa kausayniyoj ari. Chaykunataj, manapuni.

¹⁸Paykunaqa may millachikunapaj jina animalkunatapis yupaychanku. Chay animalkunata yupaychanku, tukuy animalkunamanta astawan pisi umayojkunata.

¹⁹Chay animalkunata rikuspaqa, mana rikunchejchu waj animalkunaj k'acha kayninkuta. Chay animalkunata Diosqa mana ñawiswanchu qhawan, manataj bendicionninta qonchu.