Read Quechua Bolivia DC Bible YACHAY 16 Bible Online

YACHAY 16 - Quechua Bolivia DC Bible bible

YACHAY 16

¹Chayrayku paykunaqa maychus kajta castigasqas karqanku chay kikin animalkunanejta. Juch'uy animalkunapis paykunata nanaykucherqanku.

²Aylluykitarí qanqa mana castigarqankichu. Manachayqa, allin ñawiwan qhawaykorqanki. Aylluyki yarqhachikushajtintaj, manaraj rejsisqan mikhunata qorqanki, codornizkunata.

³Chaykuna, yarqhachikushajtinkupis, manaña mikhuyta munarqankuchu, rikuspa chay animalkunata, qan paykunaman kachaykorqanki chaykunata. Kaykunarí, pisillata yarqhachikuspa, mosoj mikhunawan sajsasqas karqanku.

⁴Aylluykita sarojkunaqa sinch'i yarqhaywan atipachikunankupuni karqa. Aylluykirí llamirinallan karqa contrasninkoj ñak'ariykunasninta.

⁵Maypachachus wañuchina jampiyoj phiña animalkuna runasniykej patankuman uramarqanku, paykunawan phiñakusqaykeqa mana qhepakorqachu wiñaypaj. Jinallatataj, maypachachus qhatatakoj kataris qhaniyninkuwan runasniykita wañuracherqanku, wawasniykiwan phiñakusqaykeqa mana wiñaypajchu kakorqa.

⁶Wananankupajlla tumpata mancharikorqanku. Chaypachaqa, salvakunankutapuni willaykorqanki, qampa kamachikusqaykimanta yuyarikunankupaj.

⁷Pichus chay señalman kutirikorqa, salvasqa kanan karqa. Mana salvananqachu karqa chay rikusqan, manachayqa, qampuni, tukuykunata salvaj, paykunata salvanayki karqa.

⁸Chay jinamanta, noqaykuta chejnejkunaman rikucherqanki qampuni ima laya nanaymanta runasta kacharichisqaykita.

⁹Paykunata langostaspis ch'uspis wañuracherqa. Paykunataj manapuni aterqankupischu wañuymanta ayqeyta. Chay jina castigowan castigasqaspuni kananku karqa.

¹⁰Wawasniykitarí ni katarispis wañuchina jampiyoj kirusninkuwan atipayta aterqankuchu. Qanqa ari, khuyakuyniykiwan qayllarqanki thañichinaykipaj.

¹¹Wach'iykuchikorqanku nisqasniykimanta yuyarikunankupaj. Chaywampis, qhajpachalla salvakorqanku, ama qanmanta qonqakunankupaj. Chaymantataj, ama sonqosninkuta rumiyachinankupajtaj, manaña qosqasniykita jap'ikuyta atispa.

¹²Mana thañisqaschu karqanku mayqen qhorallanejtachus, mayqen jawiykunasnejtachus. Simi nisqayki thañicherqa, Señor, tukuy imata thañichin chaylla.

¹³Qanqa atiyniyoj kanki kausay patapi wañuy patapipis. Qanqa wañuyman yaykuchiwayku. Qanllataj wañuymanta orqhoykuwayku.

¹⁴Runaqa, sajra kaywan atipachikuspa, wañuchiyta atin. Manaña atinchu kausarichiyta. Manataj atinchu almata kutirichiyta wañupusqanmantaña.

¹⁵Mana ni pi atinmanchu makiykimanta ayqekuyta.

¹⁶Mana rejsisuyta munajkunata, qanqa sinch'i makiykiwan castigaykorqanki. Manaraj rikusqanku parapis, patankuman urmarqa. Jinallataj, chijchipis, qhon qhonkuna yakuspis. Chantaqa, ninawampis oqoykuchikorqanku.

¹⁷Chaymantataj, t'ukunapaj chay ruwasqaykeqa, maypachachus tukuy imata tukuykuchej yakoqa, mana ninata thasnuyta aterqachu. Manachayqa, nina astawan jatunyarqa. Mundontimpi kajqa jark'an ari cheqan sonqoyoj runasta.

¹⁸Kutispi larway pisiyarqa mana animalkunata tukuchinanrayku, mana creejkunaj contrampi kachamusqas chaykunata. Chaymin ruwakorqa mana creejkuna runas yachanankupaj Diospa cheqanchakuynin paykunata qhatisqanta.

¹⁹Kutispitaj, yaku chaupipis chay larway mayqen ninamantapis aswan sinch'itapuni larwarimorqa, chay mana sonqoyoj runaspa tipiykunasninkuta chinkachinampaj.

²⁰Aylluykimanrí ángel mikhunata chayachimorqanki. Mana ni imata aylluykimanta kajkuna ruwananku kajtillan, paykunamantaqa janaj pachamantapacha kachamorqanki mikhunallapajña wakichisqa t'antata. Chay t'antaqa, runaj simimpiña kaspa, ima laya mikhunallamampis tukusqanta ninchejman. Sapa ujpaj misk'ipuni karqa.

²¹Chay mikhunata qospataj rikucherqanki wawasniykita munakusqaykita. Sapa ujpa gustonman jina ima laya mikhunallamampis tukorqa, imaynamantachus sapa uj munarqa, ajinata.

²²Chaymantaqa, rit'i jina, qhasa jina kajtimpis, mana ni imata nakorqachu nina ukhupi. Chay jinamanta ari, wawasniyki yacharqankuña imaynatachus contrasninkoj tipiykunasninku tukukaporqanku, nina para urmamojtin chijchiwan khuska, lliphipejtintaj para chaupipi.

²³Chantaqa, cheqan sonqoyoj runas mikhunankupajri, chay kikin ninaqa mana kallpayojñachu rikhurerqa.

²⁴Qanqa ruwasqayki, qanta tukuy imata ruwajta sirvisuspa, sinch'itapuni oqharikun sajra runasta nanachiykunampaj. Thañikuntaj qayllajtin qampi suyajkunaman.

²⁵Ajina ari, chay kutipipis, ujta tijrakuspa, khuyakuyniykej kamachinman tukorqa. Chay khuyakuyniykeqa tukuyman mikhunata qon. Chay jinamanta, ninaqa pisichikojman yanaparqa munasqankuman jina.

²⁶Chayta ruwarqanki, Señor, munasqa wawasniyki yachanankupaj mana jallp'aj poqoynin runata kausachisqanta, manachayqa nisqayki kausachisqanta qampi suyakojkunata.

²⁷Imachus ninawanqa mana tukukorqachu, qhajpacha unuyarqa intej k'anchaynillanwan.

²⁸Chay jinamanta, aylluyki yacharqa runa chhapu chhapullataraj sayarinan kasqanta agradecesunampaj, yachanampajtaj qanmanta mañakunan kasqanta sut'iyaytapuni.

²⁹Mana agradecekoj runaj suyakuynenqa unuyampacha, imaynatachus chhullunka chiripi unuyan ajinata. Mana sirvej yaku jina ririkapun.