Read Quechua Bolivia DC Bible YACHAY 17 Bible Online

YACHAY 17 - Quechua Bolivia DC Bible bible

YACHAY 17

¹Qampa yuyakusqasniyki jatuchejpuni. Mana ni pi entiendenmanchu. Chayraykoqa, mana yachakuyta munaj runas pantanku.

²Rumi sonqo runas yuyarqanku atillasqankuta qampa ajllakusqayki aylluykita sarurpariyta. Paykunataj laqhawan jap'ichikuspa, mana kuyuriyta atispataj unay ch'isipi, wisq'asqas wasisninkupi qhepakorqanku. Manataj qoyta yachasqanki chay k'anchaypis paykunaman chayamorqachu.

³Yuyarqankutaj manapuniña yachakunanta pakayllapi juchallikusqankuta. Yuyarqanku juchasninkoqa qonqaypa llanthunwan qhatasqas qhepakunankuta. Ch'eqerachikorqankutaj kayman jaqayman maytapuni manchachikuspa. Rikusqankoqa paykunata mancharicherqa.

⁴Ni wasisninkupi pakakuspapis chay manchakuymanta ayqeyta aterqankuchu. Tukuynejpi qhon qhonkunata uyarej kanku, uyarispataj manchachikoj kanku. Rikoj kanku mayta manchachej fiero imasta.

⁵Ninapis mana kallpayojchu karqa k'anchanampaj. Nitaj ch'askaspa lliphipiyninkupis k'anchaykuyta atisqachu chay manchachikuna ch'isipi.

⁶Paykunaqa rikoj kanku uj ninallata sapallanmanta larwajta tukuyta manchachispa. Chay rikusqankoqa ripuytawantaj, astawanñataj manchachikoj kanku.

⁷Qhasillata layqachiyatapis munaj kanku. Yachakusqankupis p'enqayllapi rikhurin.

⁸Pikunachus nisharqanku atisqankuta onqosqa sonqomanta ayqechiyta chay manchachikuyta, chay phutiytataj, paykunapis manchachikuywan onqorqanku, asirinapaj jina.

⁹Mana ni ima manchachina kajtimpis kharkatitinankupajqa, manchachikoj kanku animalkunata puriyta uyarispa, kataristataj qhaparikuyta uyarispa. Manchachikuywan wañupoj kanku. Ni wayrallatapis rikuyta munaj kanku, mayqenmanta mana ni pi ayqenmanchu chayta.

¹⁰Cheqamantaqa, sajra runas q'ewas kanku. Paykunalla tumpakunku. Paykunaj kikin sonqosninku contrankupi sayanku. Chayrayku, tukuy imamanta aswan mana allin kajta suyashanku.

¹¹Mana yuyayta munayqa, unanchaspa, chayqa manchachikuy.

¹²Aswan pisi kallpayoj kajtin runaqa sonqompi, astawantaj nanachikun mana yachaspa maymantachus ñak'ariynin chayamusqanta.

¹³Paykunaqa chay laqha chaupipi kasharqanku. Chay laqhaqa mana atiyniyojchu karqa. Jamorqa ukhumantapachapuni, maypichus wañoyqa kamachin mana atiyniyojlla. Paykunaqa puñukullasharqanku.

¹⁴Jinapis, millay imaswan qhatichikoj kanku. Chantapis, mana kuyuriyta aterqankuchu, mana kallpayoj rikhurispa, ujllata manchachikuspa. Mana suyaspalla chay manchachikuywan jap'iykuchikorqanku.

¹⁵Ajinamanta, tukuyninkupuni, mayllapipis kajtinku jap'iykuchikoj kanku, mana wisq'anayoj carcelman yaykuspa.

¹⁶Llank'aj runas, michejkuna, karu chajraspi kajkunapis, tukuyninku ujllata nanaykuchikoj kanku mana ayqeyta atispa, laqhaqa tukuyninkutapuni jap'eqasqanrayku.

¹⁷Uyarej kanku wayraj phukuyninta. Uyarillajtaj kanku p'isqosta takirikojta sach'as patapi. Chantaqa, yakutapis uyarej kanku sinch'ita thutumojta. Qaqastapis uyarillarqankutaj ch'allpajtinku.

¹⁸Ningrisninkuman chayarqa animalkunaj sarusqanku. Jinallataj, monte animalpa qhaparikuynimpis. Chaymantataj, qaqaj simimpis uyarikullarqataj kutichikushajtin. Tukuy chay uyarikusqankoqa kikimpachapi paykunata sayaykurichej kharkatitiywan.

¹⁹Waj runasrí, lliphipej k'anchaywan k'anchaykuchikuspa, kusisqalla ruwasqasninkuta ruwaj kanku.

²⁰Chay egipcio runasllapaj manchay llasa ch'isi uraykamorqa. Chay laqhaqa niyta munarqa chay waj laqha maymanchus yaykunanku karqa. Paykunapajqa, kikin paykuna aswan llakichejkuna karqanku laqhamantaqa.