Read Quechua Bolivia DC Bible YACHAY 18 Bible Online

YACHAY 18 - Quechua Bolivia DC Bible bible

YACHAY 18

¹Ajllakusqasniykipajrí chaypachaqa jatun k'anchaymin karqa. Egipciosqa, paykunata mana rikushajtinkupis, nisqankuta uyarej kanku. Uyarispataj, kusikuyniyojmin kasqankuta nej kanku, mana paykunapis ñak'arisqankumanta.

²Agradecekorqankutaj mana chejnikuywan kutichikusqankumanta.

³Qanqa, aylluykiman mana laqhata chayachimorqankichu, manachayqa, sayashaj ninata chayachimorqanki. Chay ninaqa, mana ruphaykuchej inti jina aylluykipaj karqa. Aylluyki mana yachashajtin maymanchus rishasqanta, chay ninaqa ñanta rikucherqa, pusaspa chay kusikunapaj jatun puriypi.

⁴Mana allintachu kausakusqankurayku egipciosqa k'anchayta mana jap'ikuyta aterqankuchu. Laqha ukhupi watasqas jina qhepakorqanku, jap'iykusqankurayku wawasniykita, mayqenkunanejta kamachikusqasniykej mana tukukoj k'anchaynin tukuy kay pachaman chayamunan karqa.

⁵Egipciosqa wañuchiyta munaj kanku tukuy wawasta, ajllasqa aylluykimanta kajkuna chaykunata. Wijch'usqa wawasmantaqa ujsitulla mana wañuchisqachu karqa. Qantaj, chay ruwasqankumanta castigarqanki ashkha wawasninkuta qhechuspa. Tukuyninkutataj ujllapi p'ultiykucherqanki k'ajaj phiña yakupi.

⁶Ñaupa tatasniyku yacharqankuña imatachus chay ch'isipi kananta. Ajinamanta, sonqochasqas kasharqanku, rikuspa junt'akusqanta paykunaman nisqankuta.

⁷Aylluykimanta kajkunaqa suyasharqanku cheqan sonqoyoj runas kacharichisqas kanankuta. Suyasharqankutaj paykunata chejnikojkuna chinkachisqas kanankuta.

⁸Contrasniykuta castigachishajtiyki, kikimpacha noqaykuta k'anchaywan pilluchawarqayku, qanman qayllanaykuta nispa.

⁹Chay jawa, cheqan sonqoyojkunaj wawasninku, pakayllamanta rikuchikusta jaywaj kanku. Paykunapurataj ninakorqanku Diospa kamachisqanta junt'anankuta. Uj tratota ruwaspa, nerqanku ujllachasqas kanankuta kusiypipis llakiypipis. Chantaqa, chay kikimpacha ñaupa tatasninkoj takiykunasninkuta takiyta qallarerqanku.

¹⁰Paykuna sonqochakuspa takikushajtinku, contrasninku fierota qhaparikoj kanku, sonqo nanaytataj waqaj kanku wawasninku wañupusqankumanta.

¹¹Ujllapitaj ñak'arej kanku wiraqochispis wata runaspis. Kikillantataj ñak'arej kanku tukuy runaspis, kamachejkunapis.

¹²Sapa ayllu ukhupi wañusqas karqanku mana yupayta atina. Tukuyninku kikillantataj tukuchisqas karqanku. Kausakojkunaqa pisilla karqanku ayasta p'ampanankupaj. Pachampi chinkachisqas kasqankoqa llajtankumanta aswan sumachaj kaj runas.

¹³Ajinamanta, pikunachus layqasninkupi sonqonkuta churarqanku, mana creeyta munaspa paykunaman willasqa kasqanta, yacharqankuña, wawasninkuta wañusqasta rikuytawankama, ayllunchejpa runasnin Diospa wawasnin kasqankuta.

¹⁴Chaupi tuta, tukuynejpi allin kaytaj, ch'in kaytaj karqa.

¹⁵Chaypacha, tukuy atiyniyoj parlasqaykeqa uraykamorqa janaj pachamanta, maypichus qan kamachej jina sayarinki chaymanta. Imaynatachus kachaykukun mana atipachikoj maqanakoj runa, ajinallatataj nisqaykeqa kachaykukorqa chay jallp'a chaupipi, chinkayman wajyasqa chaypi. Chay nisqayki uraykamorqa khuchunawampis kanman jina, imatachus kananta rikuchispa.

¹⁶Chaymantataj, tukuy imata wañuywan junt'aykucherqa. Nisqaykej umanqa janaj pachaman chayarqa, chakintaj pampapi karqa.

¹⁷Chayllapi, chay runasqa mosqoyninkupi rikusqankuwan manchachikoj kanku. Qharkatitiyta qallarerqankutaj, imaynatachus ni jayk'ajpis yuyarqanku, ajinata.

¹⁸Mayllapipis urmashajtinkutaj wañuywan atipachikuspa, sut'ita yachakorqa imajtinchus wañusqankoqa.

¹⁹Mosqoyninkupi chaytaqa yachasqankuña, ama wañunankupaj mana yachaspalla imajtinchus wañusqankuta.

²⁰Cheqan sonqoyojkunapis wañorqanku. Paykunamantaqa ashkha runas ch'in pampapi wañorqankoqa. Chaywampis, phiñakuyniykeqa mana unaypajchu karqa.

²¹Rikhurimorqa ari uj mana juchayoj runa, pichus sayarqa aylluykita jark'anampaj. Chaypajqa, sacerdote kasqanmanta yuyarikuspa, qanmanta mañakorqa, q'osñichipusorqataj. Ajinamanta, aylluykita perdonacherqa. Phiñakuyniykitataj thañicherqa. Chay jawa, llakiy tukorqa. Chayta ruwaspa rikucherqa kamachiyki kasqanta.

²²Payqa chay nanayta atiparqa mana kallpanwanchu nitaj maqanaswanchu. Parlakusqanwan castigachejpa phiñakuyninta thasnorqa, yuyarichispa ñaupa tatasman nisqa kasqanta, yuyarichispataj paykunawan ruwasqa tratomanta.

²³Ayasqa patampi patampi tauqasqa kasqankumantaña, pay sayarerqa. Phiñakuytaqa karuncharqa, jark'arqataj kausakojkunaman pusaj ñampi.

²⁴Qhoysu p'achampi mundontin churasqa karqa. Rumimanta ruwasqa tawa sinrupi qelqasqa karqa ñaupa tatasniykoj lliphipej sutisninku.

²⁵Chayta rikuspa, wañuchejqa manchachikuywan karunchakorqa. Phiñakuyniykita rikuspalla wanarqankuña.