Read Quechua Bolivia DC Bible YACHAY 19 Bible Online

YACHAY 19 - Quechua Bolivia DC Bible bible

YACHAY 19

¹Mana creejkunataqa jasut'iy sinch'itapuni wajtaykorqa. Qanqa yacharqankiña imatachus ruwanankuta.

²Paykunaqa nillarqanku aylluyki ripunanta, usqhayta ripullachunkuña, nispa. Chantapis, yuyasqankuta tijraspa, aylluykita mask'aj llojserqanku.

³Waqasharqankuraj wañusqasninkoj ñaupaqenkupi. Ujta unancharqanku aylluykej qhepampi riyta. Ripullachunku, niytawantaj, ayqejkunata jina taripaj rerqanku.

⁴Jasut'ichikusqankurayku, chaykama chayarqanku, pasasqanmanta qonqapuspa. Chayraykumari, jasut'ichikusqankumanqa waj jasut'iykunata yapachikorqanku.

⁵Ajinamanta, aylluyki sumajta purikushajtintaj paykunaqa wañorqanku llajtankumanta karunchasqas.

⁶Ruwasqasniykipis, chaypacha, wawasniyki mana ni ima nachikunankupaj, waj jinaman tukorqa.

⁷Uj phuyoqa llanthunwan jarakojkunata qhataykorqa. Maypichus ñaupajta yaku karqa, qhajpacha ch'aki jallp'alla rikhurimorqa. Puka qochaj chaupimpi, cheqanchana ñan rikhurimorqa, qhallallaj pampapis sinch'i yaku chaupipi.

⁸Chaynejta tukuy runasniyki pasallarqanku, makiykiwan yanapachikuspa, chay t'ukunapaj imasta ñawisninkuwan rikuspa.

⁹Imaynatachus caballosqa qhorasta mask'aj rinku, ajinallatataj paykunapis rillarqanku. Kusikuywan phinkiykachaj kanku, ovejas jina.

¹⁰Paykunaqa yuyarikullasharqankuraj imachus kasqanmanta chay llajtapi maypichus kasharqanku llajtankumanta karunchasqas. Yuyarikorqanku imaynamantachus jallp'a junt'asqa karqa mana uywaswanchu, manachayqa ch'uspiswan. Yuyarikorqankutaj, mana challwaschu rikhurisqanmanta mayupi, manachayqa k'aylankulislla.

¹¹Chaymantataj rikoj kanku p'isqosta waj jinamanta rikhurimuyta, maypachachus yarqhaywan atipachikuspa sumaj mikhuyta mañakoj kanku.

¹²Codornizkunaqa qochamanta llojsimorqanku sajsachinankupaj.

¹³Castigo urmarqa chay juchasapa llajtayojkunaj patankuman. Ñaupajtaraj chayqa willasqaña karqa sinch'i qhon qhonkunanejta. Chay runasqa maychus kajllata jap'erqanku sajra sonqoyoj kasqankurayku. Paykunaqa karu llajtayoj runasta mana khuyakuspalla ñak'arichej kanku.

¹⁴Sodoma llajtayojkunaqa mana wajyarqankuchu llajtankuman mana rejsisqa runasta. Egipciosrí, wata runasman tukucherqanku karu llajtayojkunata, pikunachus llank'aspa paykunata yanapaj kanku.

¹⁵Sodoma llajtayojkunaqa jasut'isqas karqanku jawa runasta jap'isqankumanta contras jinata.

¹⁶Egipciosqa, ñaupajta tukuy sonqo israelitasta reciberqanku. Chantaqa, israelitas kikin derechosniyojña kajtinku, llakicherqanku manchay sinch'ita llank'achispa.

¹⁷Chayrayku ciegoyarqanku, imaynatachus Sodoma llajtayojkuna ciegosman tukorqanku kashajtinku cheqan sonqoyoj Lotpa wasi punkumpi, ajinata. Chaypachaqa, tukuy laqha laqhalla karqa. Runasqa tanteyaspalla wasi punkusninkuta mask'aj kanku.

¹⁸Kay mundopi kajqa waj layaman tukorqa. Imaynatachus pillapis charangonta waqachin uj takiyllata waj layamanta, ajinata. Chayta ninchejman imachus pasasqanta rikuspalla:

¹⁹Jallp'allapi kausakoj animalkunaqa yakunta purerqanku. Yakupi kausakoj animalkunapis jallp'aman llojsimorqanku.

²⁰Ninaqa yaku ukhupi astawan larwarimorqa. Yakutaj mana thasnuyta aterqañachu.

²¹Ninaqa mana ruphaykucherqachu pisi kallpayoj animalkunata, nina chaupinta pasajkunata. Nitaj unuyacherqachu Maná nisqa mikhunata, janaj pachamanta uraykamoj chayta, unuyachinallapajña kajtimpis, anchata chhullunkaman rijch'akusqanrayku.

²²Tukuy imapipuni, Señor, aylluykita jatunyacherqanki atiytataj qorqanki. Ni mayllapipis ni jayk'ajllapis yanapaymantaqa q'ellikorqankichu.