Read Quechua Bolivia DC Bible YACHAY 2 Bible Online

YACHAY 2 - Quechua Bolivia DC Bible bible

YACHAY 2

¹Mana allintachu yuyaspa, sonqonkupi nerqanku: Pisillataj llakiytaj kausayninchejqa. Runaqa wañunantapuni tiyan. Mana yachakunchu ni mayqenllapis kutiripusqanta wañupusqanmantaqa.

²Ujta sapa ujninchej kausakuyta qallarerqanchej. Chaymantataj, ripullasunchejtaj. Wajkunaqa ni yachanqankupischu kasqanchejta. Samayninchejpis q'osñi jinalla. Yuyakusqanchejqa sonqonchejpa k'anchaynin.

³Chay k'anchay wañojtin, ukhunchejqa ushphaman tukonqa, espiritunchejrí wayra jinalla ayqerikaponqa.

⁴Wataswanqa ni pi yuyarikonqañachu sutisninchejmanta. Mana ni pi yachanqachu ruwasqanchejta. Kausayninchejqa pasakaponqa phuyoj puriynin jina. Kamanchaka jinallataj chinkaponqa, intimanta qhatiykachasqa, ruphayninwan atipachikusqa.

⁵Kausayninchejqa llanthoj puriynin. Tukukuyninchejman chayaspaqa, manaña qhepaman kutiriyta atinchejchu.

⁶Chayraykoqa, imachus sumaj kay mundonchejpi, noqanchejpaj kachun. Kay mundopi kajwanqa kusikunachej, imaynachus waynas kusikunku, ajinata.

⁷Sumachaj vinoswan machaykukuna. Q'apayniyoj perfumeswampis jawiykukuna. T'ikas rikhurimojtin pallakapunapuni.

⁸Rosa t'ikaswan pilluchaykukuna, manaraj ismushajtin.

⁹Qochukunasninchejpi ni pipis noqanchejmanta faltakuchun. Tukuynejpi kusikusqanchejmanta lastrosta saqerparina. Chaymin kausayqa. Chaypajmin kaypi kashanchej.

¹⁰Sarurparinachej mana qolqeyoj cheqan kaj runata. Warmi sapamantapis mana khuyakunachu. Machu runaj yuraj chujchasnintapis mana qhawanachu.

¹¹Mana kallpayoj runaqa mana ni imapaj sirvinchu. Chayraykoqa, kallpallanchejqa leyninchej kachun.

¹²Cheqan sonqoyoj runamanqa tojllata churaykunachej. Payqa ñanninchejpi jark'anasta churawanchej. Payqa mana munanchu ruwasqanchejta tukunanchejta. Payqa k'amiykuwanchej Diospa leyninta p'akisqanchejmanta. Payqa rimawanchej mana yachasqanchejman jinachu kausasqanchejmanta.

¹³Payqa nin Diosta rejsisqanta. Señorpa wawan kani, nispa nintaj.

¹⁴Yuyasqanchejqa, paypaj k'aminallapuni. Paytaqa ni rikullaytapis atinchejchu.

¹⁵Kausakusqanqa mana waj runaspa kausakusqanku jinachu. Tukuy ruwasqanqa waj jinapuni.

¹⁶Payqa qhesachawanchej, ñawisnimpaj mana valorniyoj kasqanchejrayku. Manapuni munanchu noqanchejwan puriyta ch'ichichasqas kanchejman jina. Pay nin sumachaj runas wañupuytawan kusisqas kasqankuta. Umanta oqharin, Diosqa tatay, nispa.

¹⁷Kunanqa rikuna cheqantachus parlasqanta. Allinta yacharqona maymanchus rishasqanta.

¹⁸Cheqamantachus sumaj runa Diospa wawanqa, Diosqa yanapanqa, contrasninkoj makisninmantapis kacharichenqa.

¹⁹Maldiciykuna paytaqa, ñak'arichina ima. Pacienciayojchus manachus chayta rikusunchej. Rikusunchejtaj mayk'ajkamachus sayaykonqa.

²⁰P'enqay wañuywan wañorqochina. Payqa nishan: Kanqapuni noqata qhawawajqa, nispa.

²¹Sajra runasqa chay jinata yuyanku. Chayta yuyaspa pantanku. Kikin sajra kayninkoqa paykunata chharpuyachin.

²²Diospa pakasqa yuyayninkuta mana yachankuchu. Nitaj yuyankuchu sumaj runapajqa t'inka wakichisqa kasqanta. Llimphu sonqoyoj runaspajqa t'inka mana kanqachu, nispa ninku.

²³Diosqa runata ruwarqa wañunampaj. Kikin lantinman jina Dios ruwarqa runataqa.

²⁴Supaypa phiñakuyninrayku wañuy kay pachaman yaykorqa. Chayrayku, supaypa wawasnin kajkunaqa wañuponqanku.