Read Quechua Bolivia DC Bible YACHAY 3 Bible Online

YACHAY 3 - Quechua Bolivia DC Bible bible

YACHAY 3

¹Sumaj runaspa almasninku Diospa makisnimpi kashanku. Llakeyqa mana paykunaman qayllanqachu.

²Mana umayojkunaqa yuyanku sumaj runas wañupusqankuta. Kay mundomanta ripusqankoqa paykunapaj llakiy.

³Noqanchejmanta ripusqankoqa paykunapaj phutiy. Sumaj runasrí, sonqo tiyasqa kashanku.

⁴Runaspa ñawisninkupajqa jasut'isqas jina karqanku. Jinapis, paykunaqa ama wañunankuta suyarqanku.

⁵Pisillata ñak'arispa, jatuchaj allinkunata jap'enqanku. Diosqa paykunata pruebaman churarqa. Chantaqa, paypa sonqonman jina kasqankuta rikorqa.

⁶Imaynachus qorita takanku, ima layachus kasqanta yachanankupaj, ajinallatataj Diosqa paykunata pruebaman churarqa. Paykunatataj recibenqa, imaynatachus runaj jaywananta recibin, ajinata.

⁷Señor jamojtin, paykuna lliphipenqanku. Imaynatachus ichhoqa ninawan jap'ichikuspa jatunyan, ajinallataj paykunapis jatunyanqanku.

⁸Paykunaqa runasta kamachenqanku, ayllus patapitaj sayarenqanku. Señortaj reyninku kanqa wiñaypaj.

⁹Señorpi sonqonkuta churajkuna cheqan kajta jap'enqanku. Señorpi creejkuna, ladompi qhepakonqanku munakuywan. Diosqa pikunatachus ajllakorqa munakuymin, paykunatataj yanapan.

¹⁰Sajra runasqa castigachikonqanku sajra yuyayninkuman jina, imaraykuchus sumaj runasta qhesacherqanku; Señormantataj karunchakorqanku.

¹¹Llakisqas qhepakonqanku yachayniyoj kayta qhesachajkuna. Suyasqankoqa qhasilla. Sayk'usqankupis qhasilla, mana ni imapaj sirvinchu. Ruwasqankoqa wayra wayralla.

¹²Warmisninku mana ni imayojchu kanku umasninkupi. Wawasninkurí sajra sonqoyoj kanku. Paykunamanta jamojkuna maldicisqas kanqanku.

¹³Mana wawayoj warmeqa kusisqa kanqa sichus mana juchallikorqachu. Mana pantarqa chayqa, kusisqa kanqa. Kausakusqanman jina t'inkata jap'enqa, Señor jamojtin runasta cheqanyachej.

¹⁴Kusisqallataj mana yumayta atej qhareqa, pichus ni jayk'aj leypa contrampi falterqachu, pichus ni jayk'aj Señorpa contrampi yuyarqachu. Señorpi sonqonta churasqanrayku, paypaj uj t'inka wakichisqas kanqa. Sumaj cheqataj paypaj kanqa Señorpa templompi.

¹⁵Cheqan sonqoyoj runaqa, allinta llank'anman chayqa, sumaj poqoykunata pallanqa. Yachaypa saphenqa mana ch'akikapunchu.

¹⁶Qhenchachakoj tata mamaspa wawasninkoqa mana ñaupajman purenqankuchu. Juchamanta nacekusqankurayku, chinkanqanku.

¹⁷Machuyajtinkupis, mana valechenqankuchu. Machu kayninkupi, ni pi paykunata respetanqachu.

¹⁸Waynasllaraj wañupojtinkoqa, manaña ni imata suyanqankuchu. Jucio p'unchaypi mana ni pi kanqachu paykunata sonqochaj.

¹⁹Sajra runaspa tukukuynenqa mayta llakikunapaj kanqa.