Read Quechua Bolivia DC Bible YACHAY 4 Bible Online

YACHAY 4 - Quechua Bolivia DC Bible bible

YACHAY 4

¹Aswan sumaj cheqan sonqoyoj kayqa, wawasniyoj kaymantaqa. Cheqan sonqoyoj runamanta tukuy yuyarikunku. Paypa sutenqa wiñaypaj rejsisqa kakun. Chay runataqa Diospis runaspis allinta qhawanku.

²Cheqan sonqoyoj runa kausashajtinraj, tukuy pay jina kayta munanku. Ripojtintaj waqanku. Chay runaqa wiñay kausayman chayan, uman pilluchasqa atipasqanmanta, t'inkata mask'asqanrayku.

³Sajra runaspa yupa miraynenqa mana ñaupajmanchu renqa. Qhenchachakojkunaj wawasnenqa, mana saphiyoj sach'asman rijch'akunku, manataj sinch'itachu sayanqanku.

⁴Laqhesnin rikhurimojtimpis, ch'akikapullanqa, mana saphin kasqanrayku. Wayrapis wajtakamonqa sik'inankama.

⁵Ramasnenqa ñañitusllarj kashaspa p'akikonqanku. Poqoynimpis mana wiñanqachu. Ni pejpa mikhunan kanqa.

⁶Diosninchej runasmanta cuentata mañajtenqa juchamanta nacerqanku chay wawasta, tata mamasninkoj contrampi sayanqanku.

⁷Sumaj runaqa, wayna kaynimpi wañojtimpis, samarenqa.

⁸Machu runasqa, mana ashkha watasninkuraykuchu respetachikunku.

⁹Umayojqa yuraj chujchasniyojman rijch'akun. Mana juchallikuspa kausakoj runaqa, ashkha watasniyoj kajman ninakun.

¹⁰Sumaj runaqa Diospaj allin qhawasqa. Chayraykoqa, Dios payta munakorqa. Juchasapaspa chaupinkupi kausarqa. Diosrí payta apakaporqa.

¹¹Diosqa apakamporqa, sajraqa mana umanta pejtuykunampaj nitaj pantachinampaj.

¹²Sajra kayqa sumajmanta p'achallikuspa, sumaj kajta laqhayaykun. Llimphu sonqoyoj runaqa juchawan atipachikunman.

¹³Sumaj runaqa pisi watasllapi chayanña maymanchus wajkuna anchata kausaspa chayanku, chayman.

¹⁴Diosqa usqhayllata payta sajra kaymanta ayqecherqa, Dioswan munachikusqanrayku. Runasqa chayta rikuspapis, mana entiendenkuchu.

¹⁵Umankuman mana yaykunchu chay yuyayqa. Mana entiendeyta atinkuchu Diosninchej munakusqanta khuyakusqantataj pikunatachus pay ajllakorqa chaykunata. Mana entiendenkuchu Diosqa qhawasqanta paypa ajllakusqan aylluta.

¹⁶Sumaj runaj wañupusqanqa chay runaspa ñaupaqenkupi kakushanraj uj k'amiy jina. Sumajta kausakoj waynasqa kausayninkuwan k'aminku anchata kausakoj machu runasta.

¹⁷Runasqa yachayniyojpa wañuyninta rikonqanku, manataj yachanqankuchu imatachus Dios paymanta munarqa, nitaj entiendenqankuchu imapajchus wajyacherqa.

¹⁸Payta rikuspa qhesachanqanku. Señortaj paykunamanta asirikonqa.

¹⁹Paykuna wañupojtinku, mana ni pi k'umuykukonqachu. Wañusqa ukhupi wiñaypaj qhesachasqas kanqanku. Umamanta wijch'uchikonqanku, mana ni parlaytapis atispa. Señorqa paykunata sik'irparenqa, tukuyninkutataj t'unarparichenqa. May llakisqas qhepakonqanku. Paykunamantaqa mana ni pi yuyarikonqañachu.

²⁰Señor tapuyta qallarejtin juchasninkumanta, paykuna manchachikuywan qayllanqanku. Mana allin ruwasqasninkoqa sut'ita rikhurimonqa paykunata tumpaspa.