Read Quechua Bolivia DC Bible YACHAY 5 Bible Online

YACHAY 5 - Quechua Bolivia DC Bible bible

YACHAY 5

¹Sumaj runarí, chay kuti sayasqalla kanqa mana manchachikuspa, payta ñak'arichejkunaj ñaupaqenkupi, paypa ruwasqanta qhesachajkunaj ñaupaqenkupi.

²Sumaj runata rikuspa, sajra runasqa t'ukuywan kharkatitenqanku. Mushphasqas qhepakonqanku paykuna salvakusqankumanta.

³Sonqonkuta nanachikuspa waqanqanku. Nenqankutaj paykunapura:

⁴Kaychu pimantachus asirikoj kanchej? Kaychu pitachus asipayaspa qhatiykachaj kanchej? Mana yuyayninchejpichu karqanchej. Kausayninta rikuspa, locochá, nej kanchej. Wañupuynintaj p'enqay, nej kanchej.

⁵Kunanqa, qhawaychejmá. Diospa wawan jina qhawasqa kashan. Diosqa ajllakusqan ayllu chayaqeta jaywaykun.

⁶Noqanchejrí anchatapuni karunchakorqanchej cheqan kaj ñanmanta. Cheqan k'anchayqa mana k'anchaykuwanchejchu. Inti sut'iyaypis mana rikhurimunchu noqanchejpaj.

⁷Noqanchejqa sajraman chinkaymantaj pusaj ñanta jap'erqanchej. Ch'innejpitaj purej kanchej. Señorpa ñannintaqa mana rikorqanchejchu.

⁸Wapu kayninchejqa imamantaj sirviwarqanchej? Imapajtaj oqharikorqanchej, qhapajkuna kanchej, nispa?

⁹Tukuy chaykunaqa llanthu jina pasakaponqa, imaynachus wayraqa palabrasta apakapun, ajinata.

¹⁰Barcosqa mar qochanta rinku, mana lastrota saqespa risqankumanta. Ajinallataj noqanchejpis.

¹¹P'isqosqa phawanku mana señalta saqespa phawasqankumanta. Ajinallataj noqanchejpis. P'isqosqa lijrasninkuwan wayrata jasut'inku sinch'ita silbarichispa. Lijrasninkuta thalaspa ñanta kicharikunku, mana señalesta saqespa phawasqankumanta. Ajinallataj noqanchejpis.

¹²Wach'inaqa phawaykun imatachus wach'inanta mask'aspa. Ajinallataj noqanchejpis. Wayra ujta kicharikun, chaypachataj kikimpi wisq'aykukun. Manaña ni pi yachanmanchu maymanchus chay wach'ina ripusqantaqa. Ajinallataj noqanchejpis.

¹³Kikillantataj ari noqanchej. Nacekuytawampacha, pisi watasmantawan tukukapunchej. Mana ni ima allin kajta saqerqanchejchu, imaraykuchus sajra ukhullapi kausakorqanchej.

¹⁴Sajra runaj suyakuynenqa ichhuman rijch'akun, wayrawan apachikusqa chayman. Rijch'akullantaj chhulla phosoqoman, wayrawan apachikusqa chayman. Imaynachus q'osñi chinkapun wayrapi, ajinallataj sajra runaj suyakuynenqa chinkapumpacha. Purej runamantaqa, pichus uj ch'isilla qorpachakun, mana ni pi yuyarikunchu. Ajinallataj, sajra runamantapis mana yuyarikonqankuchu.

¹⁵Sumaj runasqa wiñaypaj kausanku. Mink'ankoqa Señorpa makisnimpi kashan. Patapi kajqa paykunata qhawan.

¹⁶Chayraykoqa, Señor paykunaman qonqa lliphipej reinota, k'acha pillutawan. Señorqa paykunata makinwan yanapanqa, kallpanwantaj jark'anqa.

¹⁷Señorqa phiñakuyninwan p'achallikonqa maqanakuman rinampaj jina. Paypa ruwasqasninta wakichenqa contrasninta castigachinampaj.

¹⁸Cheqan kajwantaj p'achallikonqa uj corazawan jina. Cheqanyachiywan rikhurenqa, monterayoj jina.

¹⁹Sumaj kaynenqa mana atipachikoj jark'anan kanqa.

²⁰K'ajaj phiñakuyninta khuchuna jinata filoyachenqa. Mundontimpis paywan tanta maqanakuman yaykonqa, mana umayoj runaspa contrampi.

²¹Phuyusmantapacha qhon qhonkuna lliphirispa rikhurimonqanku sumaj aysasqa wach'ina arco jina, kacharikonqankutaj imallatapis wajtaj.

²²Manchayta phiñakuspa ch'ijchipis uraykamonqa rumi para jina. Jatun qochaj yakun, contrankupi phiñakullanqataj. Mayusqa paykunata apakaponqanku mana khuyakuspalla.

²³Wayra oqharikuytawanqa, paykunata picharparenqa sinch'itapuni phukuspa. Sajra kayqa atiyniyojkunata tiyanasninkumanta pampaman urmachimonqa.