Read Quechua Bolivia DC Bible YACHAY 6 Bible Online

YACHAY 6 - Quechua Bolivia DC Bible bible

YACHAY 6

¹Uyariychej, reykuna, unanchaychejtaj. Yachakuychej, mundontimpi kamachejkuna.

²Sumajta uyarikuychej, ashkha runaswan kasuchikojkuna.

³Patapi kaj Señorqa atiyta kamachiytapis qosunkichej. Paypuni tapusonqachej ruwasqasniykichejmanta yuyakusqasniykichejmantapis.

⁴Qankunaqa, Diospa reinompi yuyanaykichej karqa. Chaywampis, mana allintachu cheqanyacherqankichej. Diospa kamachisqasnintaqa manapuni junt'arqankichejchu. Manataj kausarqankichejchu Diospa munayninman jina.

⁵Señorqa jamusonqachej ujllata, mayta phiñakuspa. Payqa ari, atiyniyojkunata sinch'ita cheqanyachin.

⁶Payqa llamp'u sonqoyojkunata khuyakun, juchasninkutataj pampachan. Kallpayojkunamantarí cuentata mañanqa allintapuni tapuspa.

⁷Diosqa tukuy runaspata Señormin. Payqa tukuyta uj munakuyllawan munakun. Payqa patapi sayarejkunamantaqa mana manchachikunchu. Payqa jatun runasta juch'uy runastapis ruwarqa. Payqa tukuy runastapuni qhawaykun.

⁸Atiyniyojkunataqa astawan sinch'ita juchasninkumanta tapun.

⁹Kayta qankunata niykichej, kamachejkuna, yachayniyoj kanaykichejpaj, amataj cheqan ñanmanta karunchakunaykichejpaj.

¹⁰Ajllasqa aylluman yaykonqanku Diospa leyninta junt'ajkunaqa. Chay leywan yachachikojkunaqa sinch'ita sayayta atenqanku contrasninkoj ñaupaqenkupi.

¹¹Chayrayku, nisqasniyta uyarikuyta munapayaychej. Tukuy sonqo nisqasniyta mask'aychej, yachayniyojtaj kankichej.

¹²Yachayqa mana wañoj k'anchaywan lliphipin. Yachayta munajkunaqa, payta usqhayllata tarinku. Yachayta mask'ajkunaqa paywan tinkukunku.

¹³Paypuni munakusqasninwan tarichikun.

¹⁴Sut'iyayta sayarejqa payta mask'aspa mana sayk'unchu. Kikin wasi punkumpi tiyarikushajta tarimpacha.

¹⁵Paypi unanchakojqa may umayoj runamin. Tutantinta mask'ajqa, qhajpacha llakiyninta ayqechenqa.

¹⁶Kikin yachaypis, kayman jaqayman rin, payta mask'ajkunawan tinkoj. Paykunata ñampi taripan munakuywan. Tukuy yuyasqankupitaj taripaj llojsin.

¹⁷Runaqa, tukuy sonqo yachayta munashajtin, qallarishanña yachayniyoj kayta. Yachayta mask'aspaqa, rikuchishanña yachayta munakusqanta.

¹⁸Yachayta munakojqa, Diospa kamachisqasninta junt'an. Diospa nisqasninta junt'aspaqa, wiñay kausayniyojpuni kanqa.

¹⁹Wiñay kausaytaj runata Diosman qayllachin.

²⁰Chayraykoqa, yachayta munapayayqa reyta tukuchin cheqamanta reyman.

²¹Llajtasta kamachejkuna, unayta kamachinaykichejpajqa yachayniyoj kayta mask'aychej. Chaywan yachakonqa cheqamanta reykuna kayta munasqaykichejta.

²²Kunan nisqaykichej imachus yachayqa. Nisqaykichejtaj maymantachus jamusqanta, mana ni imallatapis pakaspa, qallariyninmantapuni qallarispa. Sut'itataj yachachisqaykichej, cheqan kajta willaspa.

²³Ch'akirachej envidiawanqa mana atipachikusajchu. Envidiaqa mana kayta atinchu yachaywan khuska.

²⁴Kay mundoqa salvakonqa ashkha yachayniyojkuna kajtillan. Umachakoj reyqa ayllunta ñaupajman purichin.

²⁵Chayraykoqa, nisqasniywan yachachikuychej, allin kajtataj jap'inkichej.