Read Quechua Bolivia DC Bible YACHAY 7 Bible Online

YACHAY 7 - Quechua Bolivia DC Bible bible

YACHAY 7

¹Noqapis wañunay tiyan. Tukuy runas jina, noqapis jallp'amanta ruwasqa runamanta jamuni. Mamaypa wijsampi aychallikuni.

²Chunka killa junt'ata mamaypa yawarnimpi runaman tukuni tataypa mujunnejta, mosqoy kusiyrayku.

³Nacekuspaqa, noqapis tukuyninku jina samarqani. Tukuyninkuta jap'ikoj kay pachaman chayamorqani. Tukuyninku jinallataj, nacekuytawanqa waqaniraj.

⁴Janantaswan mayt'uykuwarqanku, jatun munakuywantaj uywaykuwarqanku.

⁵Tukuy reykunapis ajinallatataj kay mundoman chayamorqanku.

⁶Tukuy runasqa uj jinallamantatajpuni kay mundoman jamunku, uj jinallamantataj kay mundomanta llojsenqanku.

⁷Chayraykoqa, Diosmanta mañakorqani. Diostaj umayojta ruwawan. Majakorqani, yachaytaj jamuwarqa.

⁸Noqapajqa, yachay aswan allin, reypa tojnunmanta nisqaqa, aswan allintaj reypa tiyananmanta nisqaqa. Yachayniyoj kaywanqa, ashkha qolqeyoj kayqa mana ninakunmanchu.

⁹Ni mayqen lliphipej rumillapis yachaymantaqa aswan sumajchu ñawisniypaj. Mundontimpi kaj qorispis ñaupaqempeqa t'iyu qotulla. Qolqepis t'urullaqa.

¹⁰Yachaytaqa noqa munakorqani mana onqosqa kaymanta astawan. Munakorqanitaj k'acha kaymanta astawan. K'anchaymantapis yachaytaqa astawan munakorqani. Yachaypa lliphipiynenqa manapuni wañunchu.

¹¹Yachaywan khuska tukuy ima sumaj jamuwarqa. Yachaynejta, qhapajmampis tukullarqani, mana yupayta atina sumaj imaswan.

¹²Tukuy chay allinkunamantaqa junt'asqa kasqaymanta kusikorqani, chaykuna yachaymanta jamusqanrayku. Manataj yacharqanichu yachaypuni tukuy chaykunajpa mamanku kasqantaqa.

¹³Imatachus llimphu sonqowan yachakorqani, makiy kicharisqa wajkunaman yachachini. Yachaypa qhapaj kaynintaqa mana noqallapajchu waqaychayman.

¹⁴Yachayqa runaspaj mana tukukoj qhapajkunasniyojmin. Chaykunata jap'ikojkunaqa, Diosmanta allin qhawasqas kanku.

¹⁵Diosninchej yanapawachun maychus kajta parlanaypaj. Yanapallawachuntaj qowasqasninman jina yuyanaypaj. Paypuni yachaytaqa qhatin. Paypuni yachayniyojkunata pusan.

¹⁶Noqanchejqa makisnimpi kashanchej. Kikillantataj nisqanchejpis, yuyasqanchejpis, ruwasqanchejpis.

¹⁷Paypuni tukuy ima kajta cheqanta yachachiwarqa. Paynejta yachani imaynamantachus kay pacha ruwasqa kashan, yachanitaj imapajchus tukuy imas.

¹⁸Paypuni yachachiwan kay mundomanta: Pachaj qallariyninta, tukukuyninta, chaupi kajninta ima. Yachachiwarqataj intej puriyninmanta. Chantaqa, yachillawarqataj imaynatachus sapa wata chiriykamun, ruphaykamun, paraykamun, ch'akiykamun ima.

¹⁹Kikillantataj, paynejta yachakuni wataj muyuykamuyninta, qoyllurkunajpa tiyakusqasninkutapis.

²⁰Chaymanta, yachakunitaj ima layamantachus tukuy kausajkuna kanku. Chantapis, imaynamantataj animalkuna kausakullanku. Yachallanitaj supaykunaj atiyninkumanta, runaspa yuyakusqasninkumantapis. Chantaqa, jallp'amanta p'utumoj tukuy ima laya plantasmanta yachallanitaj. Jinallataj, saphej kallpanmanta yacharqoni.

²¹Pakasqa kajta sut'i kajtataj yacharqani. Tukuy imata ruwajqa yachachiwarqa. Chaymin yachay.

²²Paypi kashan rejsej santotaj espíritu, k'ata kaj, ashkha rikhuriyniyoj, mayllamampis yaykoj, kuyurikoj, sat'iykukoj, llimphu, sut'i, llamp'u, khuyakoj, t'ojsej,

²³mana jark'achikoj, yanapaj, runasta munakoj, mana sayk'oj, sinch'i, mana llakikoj, tukuy imata atej, tukuy imata qhawaj, tukuy espiritusman yaykoj: yuyayniyoj espiritusman, llimphu espiritusman, sut'i espiritusmampis.

²⁴Yachayqa, tukuy kuyukojkunamantaqa astawan kuyuykun. Llimphu kayninrayku, tukuy imaman sat'iykullan yaykullantaj.

²⁵Yachayqa, Diospa atiynimpa phukuynin. Tukuy Atiyniyoj Diospa glorianmanta llimphu p'utuynin. Yachaymanqa ni ima ch'ichi kaj yaykunmanchu.

²⁶Yachayqa, wiñay k'anchaypa lliphipiynin. Diospa ruwasqanmantataj mana ch'ichichasqa rikuchina. K'acha kayninmantaqa rikhurimuypis.

²⁷K'atalla kajtimpis, yachayqa tukuy imata ruwayta atin. Mana wajman tukuspalla, tukuy imata mosojyachin. Watamanta wata sumachaj sonqosman yaykorqollan, Diospa wawasninman tukuchinampaj, paypa sutimpi parlanankupajtaj.

²⁸Diosqa, yachaywan khuska kakojkunallata munakun.

²⁹Yachayqa intimanta aswan k'achapuni, tukuy qoyllurkunamantapis aswan jatunmin. K'anchaywan ninakuspaqa, yachayqa atipan.

³⁰K'anchaypa qhepampitaj tuta jamun. Yachaytarí sajraqa manapuni atipanmanchu.