Read Quechua Bolivia DC Bible YACHAY 8 Bible Online

YACHAY 8 - Quechua Bolivia DC Bible bible

YACHAY 8

¹Yachayqa kallpanta chayachin kay pachaj qallariyninmantapacha tukukuyninkama. Sumajtapunitaj tukuy imata kamachin.

²Yachaytaqa noqa munakorqani, mask'arqanitaj wayna kasqaymantapacha. Munarqanitaj warmiyman tukunanta. K'acha kayninta munakojqa noqa kani.

³Sut'ita rikhurin may sumaj paqarimuyniyoj kasqanta, imaraykuchus Dioswan khuskapuni kashan. Tukuy imaj Señornin payta munakorqa.

⁴Yachayqa Diospa yachasqanta yachallantaj. Ajllantaj imatachus Diosqa ruwanan tiyan.

⁵Sichus qhapaj kayqa munakunapaj kay kausaypi, imataj aswan qhapaj yachaymantaqa, pichus tukuy imata ruwan?

⁶Sichus unanchakoyqa tukuy imata ruwan chayqa, wajchu tukuy imata ruwanman?

⁷Sichus mayqenllapis cheqanyachiyta munan chayqa, k'acha kajqa ruwasqampa poqoyninmin. Yachayqa yachachin maychus kajta ruwayta. Yachachintaj unanchakuyta, cheqanyachiyta, kallpayoj kajtataj. Tukuy chaykunaqa, tukuy imamanta astawan runata yanapan.

⁸Pillapis munajtin ashkhatapuni yachakuyta, payman qayllachun. Payqa yachan imatachus ñaupa wataspi pasarqa. Nillantaj imatachus jamunan tiyan. Mana sut'i nisqantapis ch'iparan payqa. Mana ch'uwa tapunastapis kutichikullan. T'ukuna imas manaraj jamushajtinku, yachanña jamunan kasqanta. Jamoj watasmantapis yachanña.

⁹Chayrayku nerqani noqaj kausaqey kananta, yachaspa atisqanta noqawan khuska kayta kusiypi, yachaspataj sonqochaykuwayta atisqanta llakiypi, phutiypi ima.

¹⁰Noqa nej kani: Paynejta rejsisqapuni kanqa sutiy runas ukhupi, nispa. Waynapis kajtiy, machu runasqa allinta qhawawanqanku, nej kani.

¹¹Nillarqanitaj: Cheqanyachejtiy, noqamanta nenqanku: Umayojqa, nispa. Atiyniyojkunaqa, rikuwaspa t'ukusqas qhepakonqanku.

¹²Ch'inyajtiy, parlanayta suyanqanku. Parlajtiy, ningrisninkuta kicharenqanku. Anchatapuni parlashajtiy, makisninkuta simisninkuman churanqanku.

¹³Yachaynejta wiñaypaj kausasaj. Qhepaypi jamojkunaqa noqamanta yuyarikullanqankupuni.

¹⁴Llajtaspa kamachejnin kasaj. Ashkha laya runasta kamachisaj.

¹⁵Runasta ñak'arichej kamachejkuna, sutillayta uyariytawanqa, manchachikonqanku. Aylluypaj k'acha sonqo kasaj. Maqanakupitaj wapu kasaj.

¹⁶Wasiyman kutirispa, yachaypa ladompi samarikusaj. Yachayqa mayqempatapis ladompi kaspaqa, chay runata mana llakichinchu. Paywan kausaspaqa mana ni pi ñak'arinchu, manachayqa, kusirikumpacha.

¹⁷Tukuy chayta umaypi muyurichishaspa, sonqoypitaj waqaychaspa, rikuni wiñay kausay jamusqanta paywan khuska kausasqanchejnejta.

¹⁸Rikunitaj anchata kusikusqanchejta paypa kausaqesnin kajtinchej. Paypa nisqanta ruwaspataj, mana tukukuyniyoj imaswan qhapajchakunchej. Paywan khuskachakuspa, unanchakuyta yachanchej. Paywan tanta kasqanchejrayku, rejsisqasman tukunchej. Chayrayku, kayman jaqayman kachaykukoj kani, imaynatataj yachaytaqa pusakampuyman, nispa.

¹⁹Wawallaraj kajtiy, llamp'u sonqoyoj kasqani. Sumaj sonqota qowasqanku.

²⁰Astawampis, sumaj kasqayrayku, llimphu ukhuman yaykusqani.

²¹Ninitaj: Mana yachayniyoj kayta atiymanchu, mana Diospuni yachayta qowajtin. Umayojña yachajqa pichus chayta qon. Chaypachaqa, Diosman kutirispa, kay jinata mañakorqani: