Read Quechua Bolivia DC Bible YACHAY 9 Bible Online

YACHAY 9 - Quechua Bolivia DC Bible bible

YACHAY 9

¹Ñaupa tatasniypa Diosnin, khuyakoj Señor. Qanqa simi nisqaykiwan tukuy imata ruwarqanki.

²Qanqa yachayniykiwan runata ruwarqanki ruwasqasniyki patapi sayarinampaj.

³Qanqa runata ruwarqanki kay pachata kamachinampaj sumaj sonqowan cheqan sonqowantaj. Qan runata ruwarqanki, allinta runa masisninta cheqanyachinampaj.

⁴Qoway ari yachayta, ladoykipi sayaj chayta. Amataj qharqowaychu wawasniyki chaupimanta.

⁵Noqaqa kamachiyki kani, warmi kamachiykej wawan. Mana kallpayojchu kani. Pisi watasllata kausasaj. Noqallamantaqa manapuni yachaymanchu imachus cheqan kaj, nitaj kamachisqasniykitapis umaypi jap'iymanchu.

⁶Mayqenllapis may sumajpuni kajtimpis runas ukhupi, sichus mana jap'ikunchu qanmanta jamoj yachayta, chay runataqa mana valechenqankuchu.

⁷Qampuni ajllawarqanki aylluykita kamachinaypaj, cheqanyachinaypajtaj qhari wawasniykita, warmi wawasniykita ima.

⁸Qan niwarqanki uj templota oqharinayta ajllasqa orqoyki patapi. Niwarqankitaj uj altarta ruwachinayta chay llajtapi maypichus tiyakunayki toldo kashan chaypi. Chay toldoqa yuyarichiwayku qallariymantapacha wakichikusqayki wasimanta.

⁹Qanwan khuska kashan yachay. Payqa ruwasqasniykita yachan. Payqa kashallarqaña mundota ruwashajtiyki. Payqa yachan imachus walej ñawisniykej ñaupaqempi. Yachantaj imachus kamachisqaykiman jina ruwasqa kashan.

¹⁰Llimphu janaj pachamanta payta kachampuway. Payta kachaykuy lliphipej tiyanaykimantapacha, yanapanawampaj, rikuchinawajpajtaj imachus sumaj ñaupaqeykipi.

¹¹Payqa tukuy imata yachan, rejsintaj. Payqa unanchakuywan yanapawanqa tukuy ruwasqasniypi. Glorianwantaj waqaychawanqa.

¹²Chaypachaqa, ruwasqasniy gustasonqanku. Noqaqa aylluykita kamachisaj cheqan kaywan. Chantapis, tataypa tiyanampi tiyakunaypaj jina kasaj.

¹³Mayqen runataj Diospa munayninta yachayta atinmanri? Pitaj yachanman imatachus Dios munasqanta?

¹⁴Runaj yuyaynenqa pisilla. Umallikuspapis runas pantanku.

¹⁵Wañupoj aychaqa espirituta llasayachin. T'urumanta ruwasqa kasqanrayku, aychaqa mana saqenchu espíritoj waranqa yuyakusqasnin phawananta.

¹⁶Ñak'aymanta umaykupi jap'iyku tukuy kay pachapi kajta. Qayllaykupi kajtapis ancha trabajowan tariyku. Pitaj janaj pachapi kajtaqa rikunri?

¹⁷Pitaj munayniykita yachanmanri? Manachu chay runalla pimanchus yachayta qorqanki, pimanchus janaj pachamanta santo espirituykita kachamunki?

¹⁸Chay jinamanta, runasqa cheqan ñanta jap'iyta aterqanku. Chay jinamantataj, runasqa yacharqanku imatachus walej ñaupaqeykipi. Yachaynejta paykunaqa salvakorqanku.