Read Quechua Bolivia DC Bible ECLESIÁSTICO 1 Bible Online

ECLESIÁSTICO 1 - Quechua Bolivia DC Bible bible

ECLESIÁSTICO 1

¹Imachus yachay Tukuy ima laya yachayqa Señormanta jamun, paywantaj qhepakapun wiñaypaj.

²Pitaj yupayta atinman qocha cantopi t'iyuta, paraj sut'uyninta, wiñay kajtapis?

³Pitaj chayayta atinman janaj pachaj aysakuyninman, kay pachaj tukukuyninman, kay pachaj ukhunmantaj? Chantaqa, yachaymampis?

⁴Manaraj ni ima ruwasqa kashajtin, yachayqa ruwasqaña karqa ñaupamantapacha. Ajinallataj, unanchaypis, umachakuypis.

⁵Pimantaj yachaypa saphin rejsichisqa karqari? Pitaj yachaypa sonqompi pakasqa kajman chayarqari?

⁶Ujlla yachayniyojqa, manchachikunapaj jina. Pichus tiyanampi tiyasqa kashan, chaymin.

⁷Paymin yachaytaqa ruwarqa. Payqa yachayta qhawarqa, tanteyarqataj imaynachus kasqanta.

⁸Paymin yachayta t'akaykorqa tukuy ima ruwasqasninman. Munasqanman jina yachaymantaqa qorqa tukuy kausakojman. Payta munakojkunamantaj mana mich'akuspalla qorqa. Señorta yupaychana

⁹Señorta yupaychajqa kusikuyniyoj kanqa. Llakiyta mana rejsenqachu. Kusikuywantaj pilluchasqa kanqa.

¹⁰Señorta yupaychaspa, runaqa sonqonta kusichin. Kusikuywan junt'a kaspataj, unayta kausakonqa.

¹¹Señorta yupaychajqa allillanta wañuyman chayanqa. Wañupojtintaj tukuy runas sumajta parlanqanku paymanta.

¹²Runaqa yachayta jap'ikuyta qallarin Diosta may respetowan qhawaspa. Cheqan sonqoyoj runaqa yachayta jap'ikunña mamampa wijsanmantapacha.

¹³Runas chaupipi pay tiyakorqa, wiñaymantpacha. Paykunawan kakullanqapunitaj mana sayk'uspalla.

¹⁴Yachaywan junt'asqamin pichus Señorta respetowan qhawan. Yachayqa poqoyninwan runasta sajsachin.

¹⁵Paykunaj wasisninkuta munasqankuwan junt'achenqa. Pirwasninkupis tipiywan junt'a kanqa.

¹⁶Señorta respetakojqa yachaywan umanta pilluchakun. Yachayqa allin kayta, sano kaytataj t'ikarichin.

¹⁷Yachayqa runa pataman parata jina chayachimun tukuy imata rejsinapaj atiyta, umayoj kajtataj. Yachayqa payman k'askakoj runataqa may pataman oqharin.

¹⁸Yachaypa saphinmin Diosta respetay. Ramasnintaj unay kausay.

¹⁹Juchayojpuni pichus qhasimanta phiñakun. Phiñakoyqa runata chinkayman urmachin.

²⁰Llamp'u sonqoyoj runaqa pacienciakullan unaytapis. Chantaqa kusikuy payman chayamun.

²¹Payqa yachallan, mayk'ajchus parlanan tiyan. Chaykamataj ch'inlla kakun. Chaymanta ashkha runas tukuyman nenqanku umayoj kasqanta.

²²Yachaypa ukhunmanta, runa atinman orqhoyta unanchakuyta. Juchasapataj manapuni munanchu Diosta yupaychaytaqa.

²³Yachayniyoj kayta munanki chayqa, Diospa kamachisqasninta junt'ay. Señortaj yachayta ashkhata qollasonqa.

²⁴Señorta yupaychajqa, umayojtaj yachayniyojtaj. Señorqa munakun payman k'askakoj llamp'u sonqoyoj runata.

²⁵Ama q'ellikuychu Señorta yupaychakuymanta. Ama payman qayllaychu puraj uyawan.

²⁶Amataj puraj uya kaychu runaspa ñaupaqenkupi. Imallatapis ninaykipaj, ñaupajta umachakuyraj.

²⁷Ama qan kikiykita jatunyachikuychu. Urmawajtaj, p'enqaytataj umaykiman apachimuwaj.

²⁸Señorpis pakasqasniykita rikuchinman, tukuy rikushajtinkutaj pampaman wijch'usunkiman.

²⁹Mana qayllarqankichu ari payman, payta yupaychaj. Sonqoykitaj llullakuywan junt'a kasharqa.